ភ្នំពេញ ៖ គ្រោះថ្នាក់ចរាចរណ៍មួយ បង្កឡើងដោយរថយន្តក្រឡុកស៊ីម៉ង់ត៍ បានបើកលឿន រេចង្កូតរអិលក្រឡាប់ ទៅសង្កត់លើផ្ទះប្រជាពលរដ្ឋ កាលពីវេលាម៉ោង០១និង៣០នាទីថ្ងៃទី២១ ខែវិច្ឆិកា ឆ្នាំ២០១៩ នៅចំណុចភូមិអន្លង់គងថ្មី សង្កាត់ព្រៃស ខណ្ឌដង្កោ បណ្ដាលឲ្យក្មេងស្រីម្នាក់ ត្រូវរថយន្តក្រឡាប់សង្កត់ពីលើស្លាប់ ។
បើតាមប្រភពព័ត៌មាន បានឲ្យដឹងថា នៅមុនពេលកើតហេតុ គេបានឃើញរថយន្តក្រឡុកស៊ីម៉ង់ត៍មួយគ្រឿង បានធ្វើដំណើរតាមបណ្ដោយ ផ្លូវ៥០ម៉ែត្រ ក្នុងទិសដៅ ពីទិសដៅពីជើង ទៅត្បូង ខណៈមកដល់ចំណុចកើតហេតុ ដោយសារតែរថយន្តបើកបរ ក្នុងល្បឿនលឿនពេក ក៏បានរេចង្កូតមកខាងស្ដាំដៃ ក្រឡាប់សង្កត់ ទៅលើលំនៅដ្ឋាន របស់បងប្អូនប្រជាពលរដ្ឋ ដែលនៅក្បែរទីតាំង និងបណ្ដាលឲ្យសង្កត់លើក្មេងស្រីម្នាក់ ដែលកំពុងតែអង្គុយនៅលើចិញ្ចើមផ្លូវ ស្លាប់បាត់បង់ជីវិតយ៉ាងអណោចអធ័មតែម្ដង។
សមត្ថកិច្ចបានឲ្យដឹងថា សពក្មេងស្រីខាងលើមានឈ្មោះ វន សុវាតា អាយុ៤ឆ្នាំ នៅភូមិពោនសិច ឃុំជាន ស្រុកកំចាយមារ ខេត្តព្រៃវែង។
ក្រោយពេលកើតហេតុ គេសង្កេតឃើញមានសមត្ថកិច្ចមូលដ្ឋាន ក៏ដូចជា សមត្ថកិច្ចជំនាញចរាចរណ៍ បានចុះមកដល់ទីតាំងកើតហេតុ ដើម្បីធ្វើការវាស់វែងស្ទូច យករថយន្តបង្កទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយគ្នានៅពេលក្រោយ ហើយចំណែកសាកសពក្មេងស្រី ដែលស្លាប់ដោយសាររថយន្តក្រឡុកស៊ីម៉ង់ត៍ សង្កត់លើ ត្រូវបានសមត្ថកិច្ច ធ្វើលិខិតប្រគល់ឲ្យក្រុមគ្រួសារ ដើម្បីធ្វើបុណ្យតាមប្រពៃណី៕
