ភ្នំពេញ ៖ លោក សាម អ៊ីន អ្នកនាំពាក្យ គណបក្សប្រជាធិបតេយ្យមូលដ្ឋាន(គ ប ម) បានថ្លែងថា ១០ធ្នូ ដែលជាទិវាសិទ្ធិមនុស្ស ជាសំណាងល្អហើយ ដែលរដ្ឋធម្មនុញ្ញរបស់កម្ពុជា បានចែងអំពី ការគោរពសិទ្ធិមនុស្សជាមូលដ្ឋាន បើទោះបីការអនុវត្ត នៅមានការខ្វះចន្លោះ មួយចំនួនធំក៏ដោយ ។
អ្នកនាំពាក្យ គ ប ម បានលើកឡើងក្នុងហ្វេសប៊ុកថា “ការគោរពនិងយកគោលការណ៍ សិទ្ធិមនុស្សជាមូលដ្ឋាន បានជួយកាត់បន្ថយ ការរំលោភបំពានផ្សេងៗ រួមទាំងការរំលោភបំពាន ផ្នែកនយោបាយមកលើមនុស្សជាតិ។ ជាសំណាងល្អ រដ្ឋធម្មនុញ្ញ របស់ព្រះរាជាណាចក្រកម្ពុជា ក៏បានចែងអំពីការគោរពសិទ្ធិមនុស្សជាមូលដ្ឋាន បើទោះបីការអនុវត្ត នៅមានការខ្វះចន្លោះមួយចំនួនធំក៏ដោយ” ។ លោកថា ការគោរពសិទ្ធិមនុស្ស ជាកាតព្វកិច្ចរបស់រាជរដ្ឋាភិបាល និងពលរដ្ឋគ្រប់រូប។
ក្នុងនោះ លោកក៏បានលើកឡើងពីលោក យ៉េង វីរៈ ប្រធានគណបក្សប្រជាធិបតេយ្យមូលដ្ឋាន ដែលធ្លាប់បានបំពេញបេសកកម្មយ៉ាងច្រើន និងសកម្មក្នុងកិច្ចការពារសិទ្ធិមនុស្ស កាលលោកនៅធ្វើការ ក្នុងអង្គការសង្គមស៊ីវិល។ លោកធ្លាប់ជួយប្រជាពលរដ្ឋ និងអ្នកនយោបាយប្រឆាំង ដែលទទួលរង ការរំលោភបំពានសិទ្ធិផ្សេងៗ៕
