ក្រសួង ប្រកាសថា ចាប់ពី ថ្ងៃ២៨មករា ដល់៣កុម្ភៈ សីតុណ្ហភាពមានពី ១៨អង្សាសេ

ភ្នំពេញ ៖ ក្រសួងធនធានទឹក និងឧតុនិយម បានចេញសេចក្តីជូនដំណឹងស្តីពីស្ថានភាពធាតុអាកាសនៅកម្ពុជា ចាប់ពីថ្ងៃទី២៨ ខែមករា ដល់ថ្ងៃទី០៣ ខែកុម្ភៈ ឆ្នាំ២០២០ ដោយតំបន់ជួរភ្នំដងរែក និងខ្ពស់រាបឦសាន ចុះត្រជាក់ដល់១៨អង្សាសេ។

ក្រសួងធនធានទឹកបានបញ្ជាក់ថា តាមរយៈការតាមដានស្ថានភាពអាកាសធាតុជាប់ជាបន្តបន្ទាប់ សង្កេតឃើញថា ចាប់ពីថ្ងៃទី២៨ ខែមករា ដល់ថ្ងៃទី៣ ខែកុម្ភៈ សម្ពាធទាបខ្សោយលើផ្ទៃដី គ្របដណ្តប់លើកម្ពុជា ដែលស្ថានភាពបែបនេះ ធ្វើឲ្យ៖

១៖ តំបន់ជួរភ្នំដងរែក និងខ្ពស់រាបឦសាន

• សីតុណ្ហភាពអប្បបរមា មានពី១៨ ដល់ ២១អង្សាសេ
• សីតុណ្ហភាពអតិបរមា មានពី២៨ ដល់ ៣០​អង្សាសេ

២៖ តំបន់វាលទំនាបកណ្តាល

• សីតុណ្ហភាពអប្បបរមា មានពី២២ ដល់ ២៥អង្សាសេ
• សីតុណ្ហភាពអតិបរមា មានពី៣១ ដល់ ៣៣​អង្សាសេ

នៅថ្ងៃទី២៩ ដល់ ៣១ ខែមករា ផ្នែកខ្លះនៃតំបន់វាលទំនាបភាគខាងក្រោម នឹងអាចមានភ្លៀងធ្លាក់ក្នុងកម្រិតខ្សោយ។

៣៖ តំបន់មាត់សមុទ្រ

• សីតុណ្ហភាពអប្បបរមា មានពី២៤ ដល់ ២៦អង្សាសេ
• សីតុណ្ហភាពអតិបរមា មានពី៣០ ដល់ ៣២​អង្សាសេ

នៅថ្ងៃទី២៨ ដល់ ៣១ ខែមករា ផ្នែកមួយចំនួននៃបណ្តាខេត្តជាប់មាត់សមុទ្រ នឹងអាចមានភ្លៀងក្នុងកម្រិតខ្សោយទៅមធ្យម៕