នាយឧត្តមសេនីយ៍ មាស វិរិទ្ធ អំពាវនាវឲ្យ ខេត្តជាប់ព្រំដែន បង្កើនការទប់ស្កាត់រាល់បទ ល្មើសគ្រប់ទម្រង់

ភ្នំពេញ ៖ លោកនាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន បានអំពាវនាវ ទៅដល់ អាជ្ញាធរខេត្ត ជាប់ព្រំដែន ត្រូវបង្កើនការយក ចិត្តទុកដាក់ បង្ក្រាបបទល្មើសគ្រប់ទម្រង់ជាពិសេស ធ្វើឲ្យព្រំដែនមានសន្ដិភាព និងការអភិវឌ្ឍ។

ក្នុងកិច្ចប្រជុំ លទ្ធផលស្ដីពីការត្រួតពិនិត្យ និងវាយតម្លៃការិយាល័យទំនាក់ទំនងព្រំដែន (BLO) ចំនួន១៤ ក្នុងខេត្តចំនួន១១ ឆ្នាំ២០១៩ នាយឧត្តមសេនីយ៍ មាស វិរិទ្ធ បានថ្លែងថា “ខេត្តត្រឡប់ទៅវិញប្រជុំដឹកនាំក្នុងឋានៈជាប្រធាន ដឹកនាំកិច្ច ប្រជុំការងាររួមបង្កើត ជាចលនាមួយ ឲ្យស្រុះគ្នា ហើយបានផលប្រយោជន៍រួម ដើម្បីទប់ស្កាត់រាល់បទ ល្មើគ្រប់ទម្រង់ មិនមែនត្រឹម តែបទល្មើសគ្រឿងញៀនទេ”។

សម្រាប់ លោកឧត្តមសេនីយ៍ទោ ហេង ច័ន្ទដារ៉ា អនុប្រធាននាយករដ្ឋានច្បាប់ បានឲ្យដឹងដែរថា មានខេត្ត និងអភិបាលខេត្តមួយចំនួន មិនយកចិត្តទុកដាក់ទៅលើទីតាំង ការិយាល័យ BLO ព្រមទាំងមិនជួយឧបត្ថម្ភថវិកាទៅដល់ការិយាល័យ BLO តែក្រោយពីទទួលបានសេចក្ដីសម្រេច ពីការកែសម្រួលសមាសភាព តួនាទី និងភារកិច្ចការិយាល័យ BLO ពីឧបនាយករដ្ឋមន្ដ្រី ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀនមក ថ្នាក់ខេត្ត និងមាជិក BLO ទាំងអស់យល់ច្បាស់អំពីតួនាទី និងភារកិច្ចរៀងៗខ្លួន។

សូមជម្រាបថា ការិយាល័យទំនាក់ទំនងព្រំដែន (BLO) មាន១៩មានទីតាំង នៅខេត្តចំនួន១៣ តាមបណ្ដាខេត្តជាប់ព្រំដែន ដូចជា៖កម្ពុជា-ថៃ ,កម្ពុជា-ឡាវ និងកម្ពុជា-វៀតណាម។ ការិយាល័យ BLO មានភារកិច្ចសហការ ជាមួយខេត្តប្រទេសជាប់ព្រំដែន ដើម្បីផ្ដល់ព័ត៌មានឲ្យគ្នា ទៅវិញ ទៅមក ដើម្បីទប់ស្កាត់ បង្ក្រាបការចរាចរគ្រឿងញៀន ព្រមទាំងបទល្មើសផ្សេងៗផងដែរ។ជាពិសេស ការិយាល័យ BLO សម្របសម្រួលការងារពាក់ព័ន្ធ ភូមិ ឃុំ សង្កាត់ គ្មានគ្រឿងញៀន នៅតាមព្រំដែន ជាដើម៕