ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានលើកឡើងថា អភិបាលខេត្តមួយចំនួន មានការរើសអើងចំពោះបណ្តារដ្ឋមន្ដ្រី នៅពេលត្រូវជួបពិភាក្សា លើការងារអ្វីមួយ។
ក្នុងពិធីបូកសរុបលទ្ធផល នៃអង្គសន្និបាតក្រសួងមហាផ្ទៃ ឆ្នាំ២០១៩ នៅថ្ងៃទី២០ ខែកុម្ភៈ ឆ្នាំ២០២០ សម្ដេច ស ខេង បានថ្លែងថា អភិបាលខេត្តនីមួយៗ ត្រូវធ្វើជាតំណាងឲ្យរាជរដ្ឋាភិបាល និងក្រសួងពាក់ព័ន្ធក្នុងការងារសន្ដិសុខ សណ្ដាប់ធ្នាប់សាធារណៈ ក្នុងដែនសមត្ថកិច្ចរបស់ខ្លួន។ជាពិសេស អភិបាលខេត្ត ត្រូវទទួលខុសត្រូវ ចំពោះរាជរដ្ឋាភិបាល ក្រសួងមហាផ្ទៃ និងស្ថាប័នពាក់ព័ន្ធនានា។
សម្ដេចមានប្រសាសន៍ថា “ទាំងអភិបាលខេត្ត និងរដ្ឋមន្ដ្រី ក្រសួងមួយចំនួន លោកយល់ថា ចៅហ្វាយខ្សែបណ្ដោយក្រសួងមហាផ្ទៃ។ ដល់ចឹងគាត់ធ្វើការ ជាមួយប្រធានមន្ទីររបស់គាត់ ហើយចៅហ្វាយខេត្តពេលខ្លះ ក៏រើសអើងទៅទៀត រដ្ឋមន្ដ្រីទៅសុំជួប មិនបានជួបទៀត អាហ្នឹងមិនត្រូវរឿង។ អត់ត្រូវច្បាប់ទេ”។
រដ្ឋមន្រ្តីមហាផ្ទៃបន្តថា អភិបាលខេត្ត ត្រូវទៅជួបរដ្ឋមន្ដ្រី ដោយសារអភិបាលខេត្ត ជាតំណាងរាជរដ្ឋាភិបាល ទៅលើវិស័យទាំងអស់។សម្ដេចថា នៅក្នុងតួនាទីតំណាងរាជរដ្ឋាភិបាល ក្រសួងស្ថាប័ននានា អភិបាលខេត្តត្រូវមានគណនេយ្យភាព ចំពោះរាជរដ្ឋាភិបាល ដើម្បីឲ្យការងារទាំងនេះ ប្រកបដោយភាពរលូន។
សម្ដេចបញ្ជាក់ថា អភិបាលខេត្តនីមួយៗ មានសិទ្ធិគ្រប់គ្រងកិច្ចទាំងអស់ នៅក្នុងដែនសមត្ថកិច្ចរបស់ខ្លួន។ ជាង នេះទៅទៀតអភិបាលខេត្ត ត្រូវមានគណនេយ្យភាពចំពោះប្រជាពលរដ្ឋ និងមានគណនេយ្យភាព ចំពោះរាជរដ្ឋាភិបាល៕
