ភ្នំពេញ ៖ ក្រោយមានការឆោឡោ បុគ្គលិកស្រីធនាគារ កាណាឌីយ៉ា មួយរូប ទន់ដៃទន់ជើង បណ្តាលអោយដួលសន្លប់ ដែលបណ្តាលមកពីបញ្ហាសុភាពចុះខ្សោយ អស់កម្លាំងត្រូវបាន អាជ្ញាធរភ្នំពេញ និងខាងធនាគារផ្ទាល់ ធ្វើការបំភ្លឺ និងច្រានចោល ចំពោះជនអគតិមួយចំនួន ដែលបានបំភ្លៃព័ត៌មាន បំពុលសង្គម ។
លោក ម៉េត មាសភក្តី បានលើកឡើងថា ប្អូនស្រី សំ សុវណ្ណចរិយា ជាបុគ្គលិក បម្រើការងារនៅធនាគារកាណាឌីយ៉ា បានដួលសន្លប់ នៅក្នុងបន្ទប់ទឹក នៃអគារកាណាឌីយ៉ា នៅព្រឹក ថ្ងៃទី៥ ខែមីនា ឆ្នាំ២០២០នេះ មិនស្លាប់ទេ ពេលនេះប្អូនស្រី កំពុងសំរាកព្យាបាល នៅមន្ទីរពេទ្យកាល់ម៉ែត ។
លោក មាស ម៉េតភក្តី អ្នកនាំពាក្យសាលារាជធានី ភ្នំពេញ បានអោយដឹងថា “ប្អូនស្រី សំ សុវណ្ណ ចរិយា មានជម្ងឺខ្យល់គរ មិនមានវីរ៉ុសកូរ៉ូណា Covid-19 និងមិនស្លាប់ ដូចការផ្សាយរបស់ហ្វេសប៊ុក និងព័ត៌មាន មួយចំនួននោះទេ ” ។
ក្នុងនោះដែរ យោងតាម គណនីផ្លូវការ ធនាគារ កាណាឌីយ៉ា បានអោយដឹងថា ”កាលពីល្ងាចថ្ងៃទី៤ ខែមីនា ឆ្នាំ២០២០ វេលាម៉ោងប្រមាណ៥ល្ងាច មានករណីឆោឡោមួយ បានកើតឡើងនៅច្រកទ្វារចេញខាងក្រោយ របស់វិមានកាណាឌីយ៉ា ដោយមានបុគ្គលិកនារីមួយរូប បានទន់ដៃជើងអស់កម្លាំង ពេលចេញពីធ្វើការ”។
ខាងធនាគារ បញ្ជាក់ថា “ចំពោះករណីនេះ ធនាគារយើង ខ្ញុំសូមបញ្ជាក់ និងជម្រាបជូនសាធារណជន ឱ្យបានជ្រាបថា នេះគឺជាករណីបញ្ហាសុខភាព ដោយសារតែបុគ្គលិកនារីរូបនោះ មានសុខភាពខ្សោយ និងខ្វះជាតិស្ករ ទើបបណ្ដាលឱ្យ ទន់ដៃទន់ជើងបែបនេះ តែមិនមែនសន្លប់ បាត់ស្មារតីឡើយ។ ពេលនេះបុគ្គលិករូបនោះ កំពុងសម្រាកថែទាំសុខភាព នៅមន្ទីរពេទ្យកាល់ម៉ែត្រ ហើយក៏ដឹងខ្លួន និងធូរស្រាលឡើងវិញ ហើយដែរ”។
ខាងធនាគារ កាណាឌីយ៉ា ក៏លើកឡើងទៀតថា “អាស្រ័យដូចបាន ជម្រាបជូនខាងលើ សូមអតិថិជន និង សាធារណជនទាំងអស់ កុំមានការភ័ន្តច្រឡំទៅ នឹងករណីផ្សេង ដូចជាករណីសង្ស័យនៃវីរុស COVID-19 ឬករណីផ្សេងទៀត ដូចដែលគណនី ឬទំព័រហ្វេសប៊ុកមួយ ចំនួនបានចុះផ្សាយ ខុសពីការអះអាងរបស់ធនាគារយើងខ្ញុំ”។
ធនាគារកាណាឌីយ៉ា កំពុងធ្វើការដោយផ្ទាល់ ជាមួយគណនី និងទំព័រហ្វេសប៊ុកទាំងអស់ ខាងលើ ដើម្បីផ្ដល់ព័ត៌មានពិតជុំវិញករណីនេះ៕
