បាត់ដំបង៖ ពលរដ្ឋនៅក្រុមទី៧ ស្ថិតក្នុងភូមិសាលាបាឡាត់ សង្កាត់អូរម៉ាល់ ក្រុងបាត់ដំបង ខេត្តបាត់ដំបង ចំនួន៧គ្រួសារ បានសម្ដែងការខឹងសម្បារយ៉ាងខ្លាំង ជាមួយម្ចាស់បុរីផ្ទះល្វែងឈ្មោះ សុវណ្ណរី ដែលបានធ្វើផ្ទះរំលោភយកដី ផ្លូវសាធារណៈរបស់រដ្ឋ ធ្វើឲ្យពួកគាត់ ពិបាកធ្វើដំណើរចេញចូល ។
បើតាមស្ត្រីម្នាក់ ឈ្មោះ វ៉ាន់ សាវឿន អាយុ៣៧ឆ្នាំ រស់នៅភូមិសង្កាត់ខាងលើ បានឲ្យដឹងថា ដីផ្លូវសាធារណៈ ដែលត្រូវខាងបុរីរំលោភយក ពីមុនមកមានប្រវែង ៤ម៉ែត្រកន្លះ ដោយកាលពីឆ្នាំ២០១៩ ខាងបុរីបានបោះរបង ចូលប្រមាណជាង១ម៉ែត្រ ក៏មានការតវ៉ា ពីសំណាក់ពលរដ្ឋ និងបានប្ដឹង ទៅអាជ្ញាធរភូមិឃុំ ដោយខាងបុរីសន្យា នឹងថយវិញ ប៉ុន្តែមិនដឹងយ៉ាងម៉េច ស្រាប់តែនៅពេលចាប់ផ្ដើមធ្វើផ្ទះ គឺនៅតែចូលមកដីផ្លូវដដែល ។
ស្ត្រីដដែលបានបន្តថា មួយវិញទៀត នៅក្នុងគម្រោង របស់បុរីសុវណ្ណរី គឺត្រូវធ្វើផ្ទះក្នុងទំហំផ្ទះដីត្រឹម ១៦៤៣ម៉ែត្រការ៉េ ហើយជាអតីតដី សាច់ញាតិរបស់គាត់ លក់ឲ្យក្រុមហ៊ុន និងមានវិញ្ញាបនបត្រសម្គាល់ ម្ចាស់អចលនវត្ថុ ពីមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តបាត់ដំបង ប៉ុន្តែជាក់ស្ដែងធ្វើលើសប្លង់របស់ខ្លួន គឺកើនទំហំដីរហូតដល់ ១៦៦៦ម៉ែត្រការ៉េ (លើស២៣ម៉ែត្រការ៉េ) ហើយក៏មានមន្ត្រី ខាងផ្នែកសុរិយោដី មកប្រាប់ពួកគាត់ថា ខាងបុរីធ្វើត្រឹមត្រូវ តាមប្លង់របស់គេ ហើយផ្លូវមានត្រឹមតែ ៣ម៉ែត្រប៉ុណ្ណោះ ។
ស្ត្រីខាងលើ បានបន្ថែមថា ក្នុងនាមតំណាង ឲ្យពលរដ្ឋទាំង ៧គ្រួសារ សូមស្នើទៅដល់ថ្នាក់ដឹកនាំ ខេត្តបាត់ដំបង ជួយដោះស្រាយបញ្ហានេះ ដោយឲ្យខាងក្រុមហ៊ុន ទុកដីផ្លូវដូចដើមវិញ និងមិនត្រូវកាយដី ឬធ្វើអ្វីបិទផ្លូវ ដែលជាហេតុ ធ្វើឲ្យពួកគាត់ពិបាក ក្នុងការធ្វើដំណើរ ។
ពាក់ព័ន្ធនឹងបញ្ហានេះ លោក អ៊ួ ដារី ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបាត់ដំបង បានឲ្យដឹងតាមទូរស័ព្ទថា លោកមិនទាន់បានទទួលព័ត៌មាន ពីបញ្ហាបុរីសុវណ្ណរី ធ្វើផ្ទះល្វែងរំលោភដី ផ្លូវសាធារណៈនោះទេ និងសូមច្រាន ពីការលើកឡើង របស់ពលរដ្ឋ ថាមានការខុបខិត ពីជំនាញសុរិយោដីខេត្ត ។
លោកបានបញ្ជាក់ថា លោកនឹងបញ្ជូនមន្ត្រី ឲ្យទៅពិនិត្យមើល ព្រោះខណៈពេលនេះ មន្ត្រីនៃមន្ទីររៀបចំដែនដី ក៏កំពុងចុះពិនិត្យតាមបុរី ឬកន្លែងពុះដីឡូត៍លក់នានា នៅក្នុងខេត្តបាត់ដំបង ពាក់ព័ន្ធនឹងការអនុវត្ត គម្រោងរបស់ខ្លួន ប៉ះពាល់ដល់ដីចំណីផ្លូវ ឬប្រព័ន្ធលូជាដើម៕
