ភ្នំពេញ៖ ដោយផ្សព្វផ្សាយតាមបទបញ្ជា របស់នាយឧត្ដមសេនីយ៍ វង្ស ពិសេន អគ្គមេបញ្ជាការកងទ័ព ឧត្តមសេនីយ៍ទោ ហ៊ុល សំអុន មេបញ្ជាការកងពលតូចដឹកជញ្ជូនលេខ៩៩ បានបញ្ជាឲ្យនាយទាហាន នាយទាហានរង និងពលទាហានទាំងអស់ ត្រៀមខ្លួនចេញអន្តរាគមន៍ ទប់ស្កាត់ការរាលដាលនៃជំងឺកូវីដ១៩ ក្នុងឱកាសបុណ្យចូលឆ្នាំខ្មែរខាងមុខនេះ ។
យោងតាមបណ្ដាញសង្គមហ្វេសប៊ុក របស់កងពលតូចដឹកជញ្ជូនលេខ៩៩ នៅថ្ងៃទី៣ មេសានេះ បានសរសេរថា ក្នុងបទបញ្ជាចុះថ្ងៃទី៣១ ខែមីនា ឆ្នាំ២០២០ នាយឧត្តមសេនីយ៍ វង្ស ពិសេន បានបញ្ជាឱ្យទ័ពទាំងអស់រក្សាកម្លាំងខ្លួនក្នុងបន្ទាយ មិនអនុញ្ញាតឲ្យយោធិនចេញក្រៅកងឯកភាព ឬបន្ទាយជាដាច់ខាត, មិនត្រូវប្រមូលផ្ដុំជប់លៀង ឬពិធីផ្សេងៗនាំឲ្យប៉ះពាល់ ដល់វិធានការការពារមេរោគខូវីដ-១៩ (Covid-19) និងត្រូវត្រៀមកម្លាំងជាស្រេចដើម្បីអន្តរាគមន៍ ទប់ស្កាត់ការរីករាលដាលនៃជំងឺកូវីដ១៩។
ក្នុងបទបញ្ជានោះបានលើកឡើង “នាយកខុទ្ទកាល័យអគ្គបញ្ជាការដ្ឋាន មេបញ្ជាការប្រភេទទ័ពនិងទ័ពជំនាញ នាយកស្ថាប័ន និងសាលាចំណុះអគ្គបញ្ជាការដ្ឋាន ត្រូវចាត់តាំងអនុវត្តបទបញ្ជានេះ ឱ្យមានប្រសិទ្ធភាពខ្ពស់ចាប់ពីពេល ចុះហត្ថលេខានេះតទៅ រហូតដល់មានបទបញ្ជាថ្មី និងរាយការណ៍ជាប្រចាំមកទីចាត់ការ កលយុទ្ធអគ្គបញ្ជាការដ្ឋាន” ៕
