ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ រដ្ឋមន្រ្តីក្រសួងមហាផ្ទៃ មានប្រសាសន៍ ថា ក្នុងរយៈពេល២៦ថ្ងៃ នៃការរឹតបន្ដឹង ច្បាប់ចរាចរណ៍ផ្លូវគោក នៅប្រទេសកម្ពុជា សមត្ថកិច្ច បានធ្វើការឃាត់យានយន្ដល្មើសច្បាប់ ចំនួន៣៨១៨៩គ្រឿង ក្នុងនោះ ម៉ូត២៧៨១២គ្រឿង និងរថយន្ដ ១០៣៧៧គ្រឿង ខណៈគ្រោះថ្នាក់ចរាចរណ៍ ក៏មានការថយចុះ ផងដែរ។
ក្នុងពិធីផ្សព្វផ្សាយ របាយការណ៍ជាតិ ស្ដីពី ការប្រយុទ្ធប្រឆាំង អំពើជួញដូរមនុស្ស ឆ្នាំ២០១៩ និងទិសដៅការងារ ឆ្នាំ២០២០ របស់ គ.ជ.ប.ជ នាថ្ងៃទី២៧ ខែឧសភា ឆ្នាំ ២០២០ នៅស្ដីការ ក្រសួងមហាផ្ទៃ សម្ដេចក្រឡាហោម ស ខេង បានឲ្យដឹងថា មានប្រជាពលរដ្ឋច្រើនលើសលប់ ចូលរួមគាំទ្រ ការរឹតបន្ដឹងច្បាប់ចរាចរណ៍ ព្រមទាំង គោរពច្បាប់ចរាចរណ៍ ផងដែរ។
សម្ដេចក្រឡាហោម មានប្រសាសន៍ថា «លទ្ធផលរឹតបន្ដឹងច្បាប់ចរាចរណ៍ រយៈពេល២៦ថ្ងៃ ពិន័យ ៣៨១៨៩ករណី ក្នុងនោះ ម៉ូតូ ២៧៨១២គ្រឿង ស្មើនឹង៧៣% មួក៧៩% សញ្ញា ចរាចរណ៍ ១០% ស្រវឹង១% លើសចំណុះ១% ទូរស័ព្ទ១%។ ចំណែករថយន្ដ ១០៣៧៧ករណី ស្នើនឹង២៧% ខ្សែក្រវ៉ាត២៧% ល្បឿន៣០% ទូរស័ព្ទ៧% សញ្ញាចរាចរណ៍៨% លើសចំណុះ ៥% អត់បណ្ណបើកបរ៣% អត់ផ្លាកលេខ២% ស្រវឹង១%»។ សម្ដេចក្រឡាហោម មានប្រសាសន៍បន្ដថា ក្នុងរយៈពេល២៦ គ្រោះថ្នាក់ចរាចណ៍ មានការថយចុះ ១១២លើក ស្មើនឹង៣៨% បើគិតរយៈពេលដូចគ្នា ក្នុងឆ្នាំ២០១៩។
សម្ដេចក្រឡាហោម ក៏បានអំពាវនាវទៅដល់ សមត្ថកិច្ចចំពោះគោលការណ៍ រឹតបន្ដឹងច្បាប់ចរាចរណ៍ មិនដកថយឡើយ គឺត្រូវអនុវត្ដបន្ដទៀត ដើម្បីធ្វើយ៉ាងកាត់បន្ថយ គ្រោះថ្នាក់ចរាចណ៍នៅកម្ពុជា។ ជាពិសេស សមត្ថកិច្ច ត្រូវមានការគោរព ក្រមសីលធម៌វិជ្ជាជីវៈ ទន់ភ្លន់ តែម៉ឺងម៉ាត់ ដើម្បីការគាំទ្រ និងចូលរួមពីប្រជាពលរដ្ឋ។ សម្ដេចក្រឡាហោម បន្ថែមថា សម្ថកិច្ចទាំងអស់មិនត្រូវឃាត់រថយន្ដណា ដែលមិនល្មើស ច្បាប់មកសួរនាំឡើយ។ សម្ដេចក្រឡាហោម បន្ដថា បើសិនមានរថយន្ដល្មើសច្បាប់ សមត្ថកិច្ច ត្រូវនាំសួររកឯកសារនានា។
ឆ្លៀតឱកាសនោះដែរ សម្ដេចក្រឡាហោម ស ខេង បញ្ជាក់ថា ប្រជាពលរដ្ឋ អាចខ្ចីយានជំនិះគ្នា បើកបរទៅវិញទៅមកបាន ដោយមិនខុសច្បាប់នោះទេ លើកលែងតែបង្កកំហុសប៉ុណ្ណោះ ទើបមានការអនុវត្ត តាមច្បាប់ចរាចរណ៍ផ្លូវគោក។
សម្ដេចថា ពលរដ្ឋកុំមានការព្រួយបារម្ភខ្លាំងពេក លើការអនុវត្តច្បាប់ចរាចរណ៍នេះ រហូតដល់មិនហ៊ាន ខ្ចីយានជំនិះគ្នាបើកបរនោះ។
សម្ដេចក្រឡាហោម ថា «បើខ្ចី(ម៉ូតូ ឬឡាន)គេមកប្រើ គឺប្រើទៅគ្មានអី។ (បើខ្ចី)ឡានក៏បើកទៅ ម៉ូតូក៏បើកទៅ។ ចៀសវាងតែម្យ៉ាងទេ កុំឲ្យតែបុកគេ ហើយកុំធ្វើខុសច្បាប់ បានន័យថាបើកឲ្យវាត្រូវច្បាប់ មានពីណាគេឆែកឯណា ហើយវាមិនមែនជាការ ដាក់កុងត្រូលត្រួតពិនិត្យរដ្ឋបាលទេ ទាល់កាលណាគាត់ខុស ទើបបានឃាត់។ តែកាលណាខុសគេឃាត់នោះ គេសួរហើយ ក្រដាសស្នាមនៅឯណា អាឡានខ្ចីគេអត់មានក្រដាសស្នាម អាហ្នឹងខុសហើយ។ តែប៉ុណ្ណឹងតើ »។
នាពេលថ្មីៗនេះ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានធ្វើការព្រមានជាចុងក្រោយ ដល់ស្នងការ គ្រប់រាជធានី-ខេត្ត ទាំងអស់ មិនត្រូវដាក់បារ៉ាស់ ដើម្បីស្ទាក់ចាប់ រថយន្តគេបន្តទៀត នោះទេ ខណៈរថយន្ត កំពុងធ្វើចរាចរណ៍ធម្មតា ដោយពុំមានខុស នឹងបទល្មើសច្បាប់ចរាចរណ៍ ហើយត្រូវដកបារ៉ាស់ឲ្យអស់ ត្រឹមថ្ងៃទី២៦ ឧសភា នេះ ។
សូមរំលឹកថា រាជរដ្ឋាភិបាល តាមរយៈក្រសួងមហាផ្ទៃ បានចាប់ផ្តើមរឹតបន្តឹងច្បាប់ ចរាចរណ៍ ផ្លូវគោកថ្មី ចាប់ពីថ្ងៃទី១ ខែឧសភា ឆ្នាំ២០២០ ដើម្បីកាត់បន្ថយការគ្រោះ ថ្នាក់ចរាចរណ៍ ខណៈកាលពីឆ្នាំ២០១៩ បញ្ហាគ្រោះថ្នាក់ចរាចរណ៍ បានបណ្តាលឲ្យមនុស្ស ជិតពីរពាន់នាក់ បានស្លាប់ និងរាប់ម៉ឺននាក់ បានរងរបួសធ្ងន់–ស្រាល៕ដោយ ៖ អេង ប៊ូឆេង
