ភ្នំពេញ៖ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស-មេបញ្ជាការ កងរាជអាវុធហត្ថរាជធានីភ្នំពេញ នាព្រឹកថ្ងៃទី០១ ខែមិថុនា ឆ្នាំ២០២០ បានចុះទៅសួរសុខទុក្ខ លោកឧត្តមសេនីយ៍ត្រី ម៉ក់ សាវុទ្ធី មេបញ្ជាការរង កងរាជអាវុធហត្ថរាជធានីភ្នំពេញ ដែលមានជម្ងឺប្រចាំកាយ កំពុងសម្រាកព្យាបាល នៅមន្ទីរពេទ្យព្យាបាលតម្រងនោមភ្នំពេញ ។
កាយវិកាដ៏សប្បុរសនិងការយកចិត្តទុកដាក់ របស់មេបញ្ជាការរូបនេះ គឺជាទម្លាប់ដែលលោកតែងអនុវត្ត ជាប់ជាប្រចាំជារៀងរហូតមកហើយ ដោយរាល់លើក ដែលលោកឧត្តមសេនីយ៍ឯក រ័ត្ន ស្រ៊ាង បានចុះសួរសុខទុក្ខចំពោះអ្នកក្រោមឱវាទដែលមានជម្ងឺ គឺលោកតែងតែ បាននាំយកនូវ ថវិកានិងគ្រឿងបរិភោគមួយចំនួនទៅជូនអ្នកជំងឺទុកជាអំណោយនិងជួយសម្រាលបន្ទុកព្យាបាលឬ ចេញថ្លៃព្យាបាលជូន អ្នកជំងឺទាំងស្រុងទៅតាម ស្ថានភាពជាក់ស្ដែង។
ក្នុងឱកាសសួរសុខទុក្ខនាថ្ងៃនេះ ក៏មិនខុសពីទម្លាប់មុនៗដែរ លោកឧត្តមសេនីយ៍ឯក រ័ត្ន ស្រ៊ាង ក៏បានសម្ដែងនូវមនោសញ្ចេតនានិងទឹកចិត្តព្រួយបារម្ភចំពោះ អ្នកជំងឺ និងបាននាំយកថវិកា ៥លាន៨សែនរៀល (ថវិកាផ្ទាល់ខ្លួនរបស់លោក រ័ត្ន ស្រ៊ាង ចំនួន៤លានរៀល និងថវិកាចូលរួមចំណែករបស់ មេញ្ជាការរង, នាយរងសេនាធិការ,នាយការរិយាល័យ ដែលទៅជាមួយចំនួន ១លាន៨សែនរៀល) រួមនឹង ភេសជ្ជៈ ៦កេស ផ្លែឈើស្រស់ ១កន្ត្រក ប្រគល់ជូនអ្នកជម្ងឺ ជាអំណោយសួរសុខទុក្ខ និងទុកជាការចែករំលែក សម្រាលបន្ទុកគ្រួសារ ក្នុងការសម្រាកព្យាបាល៕
