ភ្នំពេញ ៖ មុខសញ្ញាជួញដូរ និងប្រើប្រាស់ដោយខុសច្បាប់ នូវសារធាតុញៀនចំនួនពីរករណីផ្សេងគ្នា ត្រូវបានកម្លាំងជំនាញ នៃកងរាជអាវុធហត្ថរាជធានីភ្នំពេញ ចុះធ្វើការបង្រ្កាបនៅទីតាំងជាក់ស្តែង ដោយឃាត់ខ្លួនបានជនសង្ស័យចំនួន ៤នាក់ ព្រមទាំងវត្ថុតាងគ្រឿងញៀន ជាង៣០កញ្ចប់ និងសម្ភារៈសម្រាប់សេពមួយចំនួនផងដែរ។
ការបង្រ្កាបនេះផងដែរធ្វើឡើង ដើម្បីអនុវត្តន៍ គោលនយោបាយភូមិ-ឃុំមានសុវត្ថិភាព ជាពិសេសបង្រ្កាបរាល់បទល្មើស ដែលកើតមាននៅក្នុងមូលដ្ឋាន ក៏ដូចជាអនុវត្ត ទៅការណែនាំចង្អុលបង្ហាញ ពីលោកឧត្ដមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការកងរាជអាវុធហត្ថរាជធានីភ្នំពេញ។
ករណីទី១ ៖ កម្លាំងមូលដ្ឋានអាវុធហត្ថ ខណ្ឌពោធិ៍សែនជ័យ សហការជាមួយកម្លាំងជំនាញ ការិយាល័យស្រាវជ្រាវ បទល្មើសគ្រឿងញៀន កងរាជអាវុធហត្ថរាជធានីភ្នំពេញ ចុះធ្វើការឆែកឆេរដោយ ឃាត់ខ្លួនបានជនសង្ស័យ ចំនួន៣នាក់ ពាក់ព័ន្ធករណីជួញដូរ និងប្រើប្រាស់ ដោយខុសច្បាប់នូវសារធាតុញៀន កាលពីវេលាម៉ោង ១៥:១០នាទី ថ្ងៃទី០៣ ខែមិថុនា ឆ្នាំ២០២០ នៅចំណុច ផ្លូវលំ ភូមិអង្គកែវ សង្កាត់ចោមចៅ៣ ខណ្ឌពោធិ៍សែនជ័យ ។
ជនសង្ស័យទាំង៣នាក់ឈ្មោះ ៖
១-ឈ្មោះ ប៊ិន វាសនា ហៅ ម៉ង់ ភេទប្រុស អាយុ៣៤ឆ្នាំ មុខរបរមិនពិតប្រាកដ
២-ឈ្មោះ ប៊ិន ផានិត ហៅ ម៉ូង ភេទប្រុស អាយុ២៤ឆ្នាំ មុខរបរមិនពិតប្រាកដ។
៣-ឈ្មោះ អាត សុខមាន ហៅ ពេជ្រ ភេទប្រុសអាយុ១៤ឆ្នាំ មុខរបរមិនពិតប្រាកដ។
ដកហូតវត្ថុតាងរួមមាន ៖ -ក្រាមសថ្លា3កញ្ចប់ (ធំ01តូច2), – ជញ្ជីងថ្លឹងថ្នាំញៀន2គ្រឿង និងនិងសម្ភារៈសម្រាប់សេពមួយចំនួន។
ករណីទី២ ៖ កម្លាំងមូលដ្ឋានអាវុធហត្ថខណ្ឌកំបូល បានធ្វើការឃាត់ខ្លួនជនសង្ស័យ ចំនួន១នាក់ ពាក់ព័ន្ធករណីជួញដូរ និងប្រើប្រាស់ដោយខុសច្បាប់នូវសារធាតុញៀន ស្ថិតនៅចំណុច ភូមិ គល់ សង្កាត់កន្ទោក ខណ្ឌកំបូល រាជធានីភ្នំពេញ កាលពីវេលាម៉ោង១៥:៣០នាទី ថ្ងៃទី០៣ ខែមិថុនា ឆ្នាំ២០២០ ។
ជនសង្ស័យ ឈ្មោះ ទៀង សាអ៊ីម ភេទប្រុស អាយុ២៦ឆ្នាំ មុខរបរ កម្មកររោងចក្រ ទីកន្លែងកំណើត ភូមិក្រសាំងជីម៉ែ ឃុំវាល ស្រុកគងពិសី ខេត្តកំពង់ស្ពឺ បច្ចុប្បន្នស្នាក់នៅ ភូមិគល់ សង្កាត់កន្ទោក ខណ្ឌកំបូល រាជធានីភ្នំពេញ។
ដកហូតវត្ថុតាងរួមមាន ៖ -ក្រាមពណ៌សថ្លាចំនួន២៧កញ្ចប់ (២កញ្ចប់ធំល្មម)
បច្ចុប្បន្នជនសង្ស័យទាំង០៤នាក់ ត្រូវបានបញ្ជូនទៅការិយាល័យស្រាវជ្រាវបទល្មើសគ្រឿងញៀននៃកងរាជអាវុធហត្ថរាជធានីភ្នំពេញ ដើម្បីធ្វើការសាកសួរ និងកសាងសំណុំរឿង បញ្ជូនទៅតុលាការផ្តន្ទាទោសតាមនីតិវិធីច្បាប់ ៕
