ភ្នំពេញ៖ ស្របពេលដែលពិភពលោក កំពុងព្រួយបារម្ភ ចំពោះការរីករាលដាល នៃជំងឺកូវីដ១៩នោះ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានបន្តអំពាវនាវឲ្យបងប្អូនកងទ័ព ក៏ដូចជាសិស្សនិស្សិត នៅក្រៅប្រទេស ថែរក្សាសុខភាព និងប្រុងប្រយ័ត្នឲ្យខ្ពស់បំផុត ចំពោះជំងឺកូវីដ១៩ ។
តាមរយៈបណ្ដាញសង្គមហ្វេសប៊ុក នៅថ្ងៃទី១១ មិថុនានេះ សម្ដេច ទៀ បាញ់ បានថ្លែងថា «អត្រាចម្លងនៃមេរោគ កូវីត-១៩ នៅតែបន្តកើនឡើងជារៀងរាល់ថ្ងៃ នៅតាមបណ្តាប្រទេសនានា នៅលើពិភពលោក ដូចនេះសូមក្មួយៗ កងទ័ព សិស្សនិស្សិតដែលកំពុងបំពេញបេសកកម្មរក្សាសន្តិភាព និងសិក្សានៅតាមបណ្ដាប្រទេសនានា ត្រូវប្រុងប្រយ័ត្ន និងថែទាំសុខភាព អនាម័យឱ្យបានល្អ ព្រមទាំងអនុវត្តនូវវិធានការការពារឱ្យបានខ្ជាប់ខ្ជួន» ។
សូមរំលឹកថា គិតរត្រឹមថ្ងៃទី១០ មិថុនា ក្រសួងសុខាភិបាល បានព្យាបាលអ្នកជំងឺកូវីដ១៩ ជាសះស្បើយម្នាក់បន្ថែមទៀត ខណៈគ្មានអ្នកឆ្លងថ្មី ជាពិសេសនៅសល់តែអ្នកជំងឺម្នាក់ប៉ុណ្ណោះ ដែលកំពុងសម្រាកព្យាបាលបន្ត ។ សរុបទាំងអ្នកជាសះស្បើយ និងអ្នកកំពុងព្យាបាលមានចំនួន ១២៦នាក់ ៕
