កំពង់ចាម ៖ អភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទ ក្រហមខេត្តកំពង់ចាម លោកអ៊ុន ចាន់ដា នាព្រឹកថ្ងៃទី ១២ ខែមិថុនា ឆ្នាំ២០២០ នេះ រួមដំណើរជាមួយក្រុមការងារ បានអញ្ជើញ ចុះជួបសំណេះសំណាល និងនាំយកអំណោយមនុស្សធម៌ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទៅផ្តល់ជូន ប្រជាពលរដ្ឋងាយរងគ្រោះ ខ្វះខាតជីវភាព មកពី ៣ឃុំ ក្នុងស្រុកកងមាស ខេត្តកំពង់ចាម ។
ក្នុងឱកាសនោះ ប្រធានគណៈកម្មាធិការសាខា លោក អ៊ុន ចាន់ដា បានពាំនាំប្រសាសន៍ផ្តាំផ្ញើសួរសុខទុក្ខពីសំណាក់ លោក ហ៊ុន ណេង ប្រធានកិត្តិយសសាខា ជាពិសេស សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេច តែងតែយកចិត្តទុកដាក់គិតគូរពីសុខទុក្ខរបស់បងប្អូនប្រជាពលរដ្ឋ ជនរងគ្រោះ និងជនងាយរងគ្រោះ ដោយគ្មានរើសអើងឡើយ។
ជាមួយគ្នានោះដែរ លោក អ៊ុន ចាន់ដា បានក្រើនរំលឹកបន្ថែមដល់មន្ត្រី បុគ្គលិក និងប្រជាពលរដ្ឋទាំងអស់ សូមបង្កើនការប្រុងប្រយ័ត្នខ្ពស់បន្តទៀត ក្នុងការ ចូលរួមបង្ការ និងទប់ស្កាត់ការឆ្លងនៃជម្ងឺកូវីដ ១៩ ដែលកំពុងបន្តគម្រាមកំហែង ជាប់ជានិច្ច ដោយសារតែប្រទេសនានាក្នុងពិភពលោក កំពុងរងការរាតត្បាត ដោយជម្ងឺ ដ៏កាចសាហាវមួយនេះ នៅឡើយ ។
ដូចនេះ ត្រូវតាមដានព័ត៌មាននិងអនុវត្តជាប្រចាំ តាមសារអប់រំ នានា របស់ក្រសួងសុខាភិបាល ក៏ដូចជាអនុសាសន៏ដ៏ខ្ពង់ខ្ពស់របស៎សម្តេចតេជោ ហ៊ុន សែន ដែលតែងបានដាស់តឿនអោយជនរួមជាតិ កុំធ្វេសប្រហែស ឬ ភ្លេច ជម្ងឺកូវីដ ១៩ នេះ អោយសោះ ហើយត្រូវមានម៉ាស់ ទឹកអាល់កុល ឬ ជែល ដាក់តាមខ្លួនជាប់ ជាប្រចាំផងដែរ។
ក្នុងឱកាសនោះផងដែរ លោក ប្រធានគណៈកម្មាធិការសាខា បានអំពាវនាវ ដល់ប្រជាពលរដ្ឋ សូមឲ្យមានការប្រុងប្រយ័ត្នជំងឺគ្រុនឈាម ព្រោះរដូវនេះជារដូវធ្លាក់ភ្លៀង ធ្វើឲ្យកើតមូសខ្លា ដែលអាចខាំចម្លងជំងឺគ្រុនឈាមមកមនុស្សបាន ជាពិសេស សូមប្រុងប្រយ័ត្នចំពោះក្មេងៗ ។ ដោយឡែក អ្នកប្រើប្រាស់ផ្លូវថ្នល់ទាំងអស់ សូមចូលរួមអនុវត្ត និងគោរពច្បាប់ចរាចរណ៍ផ្លូវគោក អោយបានគ្រប់ៗគ្នា ដើម្បីការពាររក្សាជីវិតខ្លួនឯង និងជីវិតអ្នកដទៃ ស្របតាមទិសស្លោក ” ថ្ងៃនេះ ថ្ងៃស្អែក កុំអោយមានគ្រោះថ្នាក់ចរាចរណ៍ ” ។
សូមបញ្ជាក់ថា អំណោយដែលចែកជូនប្រជាពលរដ្ឋចំនួន ៦៣ គ្រួសារនោះ ក្នុងមួយគ្រួសារទទួលបាន ៖ អង្ករ ២៥ គ.ក្រ, ទឹកត្រី ១យួរ, ទឹកស៊ីអ៊ីវ ១យួរ , ត្រី ខ ១០ កំប៉ុង, អាវយឺត ២ , ម៉ាស់ ៥បន្ទះ និង ថវិកាមួយចំនួន ។
ក្រោយបញ្ចប់ពិធី លោក អ៊ុន ចាន់ដា និងសហការី បានបន្តអញ្ជើញប្រគល់ផ្ទះ ១ខ្នង រួមជាមួយ គ្រឿងឧបភោគបរិភោគ , សម្ភារផ្ទះបាយ និងថវិកាមួយចំនួន ជូន អ្នកស្រី វិត ស៊្រាង ជាស្ត្រីមេម៉ាយទ័លលំបាក រស់នៅភូមិ ឃុំ ពាមជីកង ស្រុកកងមាស សម្រាប់ស្នាក់អាស្រ័យផងដែរ ។
