ភ្នំពេញ ៖ នាយករដ្ឋមន្រ្តីកម្ពុជា សម្តេចតេជោ ហ៊ុន សែន បានបញ្ជាឲ្យកាត់ឆ្វៀលដី ជូនពលរដ្ឋរស់នៅក្នុងតំបន់អភិរក្ស តំបន់សត្វព្រៃ និងតំបន់ការពារផ្សេងៗរបស់រដ្ឋ។
ការសម្រេចនេះធ្វើឡើង នៅព្រឹកថ្ងៃទី ៣ ខែកក្កដា ឆ្នាំ២០២០ ក្នុងសម័យប្រជុំ គណៈរដ្ឋមន្រ្តីពេញអង្គ ក្រោមអធិបតីភាព សម្តេចតេជោ ហ៊ុន សែន។
នាយករដ្ឋមន្រ្តីកម្ពុជា បានចេញបទបញ្ជា និងបញ្ជាក់ច្បាស់ៗជូន រដ្ឋមន្រ្តីក្រសួងបរិស្ថាន ក្រសួងកសិកម្ម និងក្រសួងដែនដី គឺត្រូវតែកាត់ឆ្វៀលដី ជូនបងប្អូនប្រជាពលរដ្ឋ ដែលបានមករស់នៅលើទីតាំងដី ដែលជាគម្របព្រៃឈើ ឬជាតំបន់ការពារ ឬតំបន់អភិរក្សសត្វព្រៃរបស់រដ្ឋ ដូចជានៅកោះកុង ព្រះវិហារជាដើម… ដែលមានពលរដ្ឋ បានមកធ្វើផ្ទះរស់ នៅជាងដប់ម្ភៃឆ្នាំមកហើយ។
សម្តេចថា ព្រោះកន្លងមក រដ្ឋមានតែដីក្នុងផែនទីទេ តាមពិតមានប្រជាពលរដ្ឋ បានកសាងលំនៅដ្ឋាន រស់នៅបង្កើតកូនចៅ រាប់សិបឆ្នាំមកហើយ នៅលើទីតាំងដីទាំងនោះ។ សម្តេចថា នេះជាការដោះស្រាយកង្វល់ ជូនពលរដ្ឋពិតប្រាកដ។ កុំទុកប្រជាពលរដ្ឋឲ្យភ័យខ្លាច អត់ឃ្លាន រត់ទៅចំណាកស្រុកគេតទៅទៀត។
ទន្ទឹមនឹងនេះ នាយករដ្ឋមន្រ្តីផ្តាំថា កុំឲ្យពលរដ្ឋពង្រីកថែមទៀត ព្រោះត្រូវការរក្សាទុក ព្រៃសហគមខ្លះនៅជិតៗ ដើម្បីជាប្រយោជន៍ សហគមរស់នៅផងដែរ។
សម្តេចតេជោ បានឲ្យក្រសួងបរិស្ថាន ក្រសួងកសិកម្ម និងក្រសួងដែនដី ត្រូវដោះស្រាយឲ្យដាច់ស្រេច ក្នុងតែប៉ុន្មានខែខាងមុខ ដើម្បីចេញប្លង់កម្មសិទ្ធិជូនពលរដ្ឋ ហើយកិច្ចការនេះ ត្រូវធ្វើឲ្យបានហ្មត់ចត់និងត្រឹមត្រូវបំផុត៕
