ភ្នំពេញ៖ ក្រោយពីសាងសង់រួចរាល់ជាស្ថាពរ នៅថ្ងៃទី២៤ ខែកក្កដា ឆ្នាំ២០២០ រដ្ឋបាលរាជធានីភ្នំពេញ បានដាក់ឲ្យប្រើប្រាស់ ស្ពានអាកាសថ្មើរជើង ស្តុបផ្សារដើមគរ ដើម្បីឲ្យប្រជាពលរដ្ឋ ងាយស្រួលក្នុងការឆ្លងថ្នល់ និងមិនប្រឈមគ្រោះថ្នាក់ កើតឡើងជាយថាហេតុ។
លោក ឃួង ស្រេង អភិបាលរាជធានីភ្នំពេញ បានមានប្រសាសន៍ថា ការដាក់ឲ្យដំណើរ ការស្ពានអាកាសថ្មើរជើងថ្មីនេះ គឺជាសមិទ្ធផលមួយ ក្នុងយុគ្គសម័យ កូវីដ១៩ ដែលជាអំណោយ សម្តេចតេជោហ៊ុនសែន នាយករដ្ឋមន្រ្តី នៃព្រះរាជាណាចក្រកម្ពុជា ដើម្បីជួយសម្រួល ដល់ការធ្វើចរាចរណ៍ របស់បងប្អូនប្រជាពលរដ្ឋ ក្នុងរាជធានីភ្នំពេញ។
លោកអភិបាល រាជធានីភ្នំពេញ បានបន្តថា ការសាងសង់ ស្ពានអាកាសថ្មើរជើងនេះ និងជួយកាត់បន្ថយហានិភ័យ នៃការដើរឆ្លងផ្លូវ កាត់បន្ថយការកស្ទះចរាចរណ៍ សម្រួលលំហូចរាចរណ៍ និងលើកកម្ពស់ សោភ័ណភាព រាជធានីភ្នំពេញ ឲ្យកាន់តែស្រស់បំព្រង ។
លោកស្រី អៀង ចាន់ធី ប្រជាពលរដ្ឋ នៅម្តុំផ្សារដើមគរ បានលើកឡើងថា ការសាងសង់ស្ពាននេះ បានធ្វើឲ្យប្រជាពលរដ្ឋ ងាយស្រួល ក្នុងការធ្វើដំណើរ និងអាចកាត់បន្ថយគ្រោះថ្នាក់ ចរាចរណ៍បានផងដែរ ។ បើសិនជារាជរដ្ឋាភិបាល មានថវិកា គ្រប់គ្រាន់ អាចសាងសង់ស្ពានអាកាស មានជណ្តើយន្តទៀត នឹងកាន់តែល្អ នឹងជួយសម្រួលការលំបាក របស់មនុស្សចាស់ ដែលពិបាកឡើងស្ពាន ជាពិសេសនោះ ជនពិការ ដែលត្រូវការរុញរទេះ ។
សូមបញ្ជាក់ថា ស្ពានអាកាសថ្មើរជើងផ្សារដើមគរ នៅលើមហាវិថីម៉ៅសេទុង បានបើកការដ្ឋាន កាលពីថ្ងៃទី២៨ ខែធ្នូ ឆ្នាំ២០១៩ ដែលម៉ៅការសាងសង់ ដោយក្រុមហ៊ុន Space Media ប្រើប្រាស់រយៈពេល សាងសង់៧ខែ ដើម្បីផ្ដល់ភាពងាយស្រួល ដល់ប្រជាពលរដ្ឋ និងសិស្សានុសិស្សឆ្លងកាត់ ដោយថ្មើរជើង ទៅមកសាលារៀន និងបញ្ចៀសគ្រោះថ្នាក់ ជាយថាហេតុ ។ ស្ពានអាកាសផ្សារដើមគរនេះ មានបណ្តោយ ២៨ ម៉ែត្រ ទទឹង ៣,៤ម៉ែត្រ ទទឹងផ្លូវដើរ ផ្នែកខាងក្នុង ២,៨ម៉ែត្រ កម្ពស់៥.៥ម៉ែត្រ៕
