ភ្នំពេញ៖ លោកស្រី គ្រីស្ទីន ផាកូ (Kristin Parco) ប្រធានបេសកម្ម អង្គការទេសន្តប្រវេសន៍ (IOM) កម្ពុជា និងលោក ហ៊ី យូជុនរ៉ូ នាយកប្រចាំប្រទេស នៃកូយកា (KOICA) ប្រចាំកម្ពុជា នៅទី ៤ ខែកញ្ញាឆ្នាំ ២០២០ ចុះហត្ថលេខាលើកិច្ចព្រមព្រៀងភាពជាដៃគូ / អនុស្សរណៈនៃការយោគយល់គ្នា ដើម្បីផ្តល់ជំនួយសុខភាព ជាបន្ទាន់ ដល់ជនចំណាកស្រុ កដែលវិលត្រឡប់ មកពីប្រទេសថៃ។
យោងតាមសេចក្តីប្រកាសព័ត៌មានរបស់ KOICA ដែលមជ្ឈមណ្ឌលព័ត៌មានដើមអម្ពិល ទទួលបាន នៅថ្ងៃសុក្រ ទី០៤ ខែកញ្ញា ឱ្យដឹងថា ភាពជាដៃគូថ្មីនេះ មានគោលបំណងពិសេស ដើម្បីការពារជនចំណាកស្រុក ដែលវិលត្រឡប់ និងសហគមន៍ ពីហានិភ័យ នៃការឆ្លងកូវីដ១៩ ក្នុងទ្រង់ទ្រាយធំ តាមរយៈប្រព័ន្ធ ការពារកូវីដ ១៩ ។ ជនចំណាកស្រុកជាង ១១ ម៉ឺននាក់បានវិលត្រឡប់ មកប្រទេសកម្ពុជាវិញ ចាប់តាំងពីខែមីនាឆ្នាំ ២០២០ បន្ទាប់ពីការបិទអាជីវកម្ម និងការបាត់បង់ការងារ នៅក្នុងប្រទេសថៃ និងប្រទេសជិតខាង។
អង្គការទេសន្តប្រវេសន៍ (IOM) កម្ពុជា បាននិងកំពុងជួយដល់ជនចំណាកស្រុក ដែលវិលត្រឡប់មកវិញ នៅតាមច្រកព្រំដែន ក្នុងមណ្ឌលដាច់ដោយឡែក និងនៅតាមខេត្តរបស់ពួកគេ។ ឥឡូវនេះដោយមានការគាំទ្រពីកូយកា IOM នឹងបន្តផ្តល់ព័ត៌មានអំពីការការពារកូវីដ១៩ ដល់ជនចំណាកស្រុកនិងសហគមន៍ម្ចាស់ផ្ទះធ្វើឱ្យប្រសើរឡើងនូវប្រសិទ្ធភាពនៃការប្រមូលសំណាកគំរូរបស់ កូវីដ១៩ នៅតាមខេត្តនិងផ្តល់នូវកញ្ចប់ស្បៀងអាហារ និងអនាម័យចាំបាច់ ដល់ជនចំណាកស្រុក ដែលនៅដាច់ដោយឡែកពីគ្នា។
លោកស្រី គ្រីស្ទីន បានអត្ថាធិប្បាយថា“ ការគាំទ្រពីកូយកានឹងជួយដោះស្រាយនូវសេចក្តីត្រូវការជាបន្ទាន់របស់ជនចំណាកស្រុក និងសហគមន៍ដែលវិលត្រឡប់ ពីចំណុចចូល ដល់មណ្ឌលដាច់ស្រយាលនិ ងតំបន់ត្រឡប់មកវិញ។ កិច្ចខិតខំប្រឹងប្រែង និងកិច្ចសហប្រតិបត្តិការរួមគ្នា ដូចជាជាមួយកូយកា និងរដ្ឋាភិបាលកម្ពុជា មានសារៈសំខាន់ណាស់ក្នុ ងការពង្រឹងសមត្ថភាពជាតិ និងការរៀបចំនិងការឆ្លើយតបរបស់ថ្នាក់ជាតិនិងមូលដ្ឋាន នៅក្នុងវិបត្តិរាតត្បាតនេះ”។
កម្មវិធីនេះនឹងចាប់ផ្តើមដំណើរការដំបូង រហូតដល់ខែធ្នូឆ្នាំ ២០២០ ហើយនឹងត្រូវអនុវត្ត នៅខេត្តបន្ទាយមានជ័យ សៀមរាប បាត់ដំបង ឧត្តរមានជ័យ និងខេត្តព្រៃវែង ដែលមានចំនួនជនចំណាកស្រុកវិលត្រឡប់មកវិញច្រើនជាងគេ។ យ៉ាងហោចណាស់ ជនចំណាកស្រុក និងសមាជិកសហគមន៍ ១០ ម៉ឺននាក់នឹងទទួលបានអត្ថប្រយោជន៍ពីកម្មវិធីនេះ៕
