ភ្នំពេញ ៖ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រកម្ពុជាមានព្រះរាជបន្ទូលថា កាលពី២៧ឆ្នាំ មុនពោលគឺនៅថ្ងៃទី២៤ ខែកញ្ញា ឆ្នាំ១៩៩៣ នៅកម្ពុជាមានមហាព្រឹត្តិការណ៍ជាប្រវត្តិសាស្រ្ត ដ៏សំខាន់ចំនួន២ធំៗបានកើតឡើង។
មហាព្រឹត្តិការណ៍ទាំង២នោះ រួមមាន៖ ព្រះរាជពិធីរាជា ភិសេកគ្រងព្រះបរមសិរីរាជ្យសម្បត្តិគ្រាទី២ នៃព្រះករុណា ព្រះបាទ សម្ដេច ព្រះ នរោត្ដម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពដែនដី និងឯកភាពជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត និងទិវាប្រកាសឲ្យប្រើប្រាស់នូវរដ្ឋធម្មនុញ្ញ នៃព្រះរាជាណាចក្រកម្ពុជាឡាយព្រះរាជហស្តលេខា ដោយ ព្រះករុណា ព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ ។
ព្រះរាជពិធីរាជាភិសេកគ្រងព្រះបរមសិរីរាជ្យសម្បត្តិគ្រាទី២ នៃព្រះករុណា ព្រះបាទ សម្ដេច ព្រះ នរោត្ដម សីហនុ ក្នុងព្រះបរមសិរីរាជ្យសម្បត្តិថា ”ព្រះករុណា ព្រះបាទ សម្តេចព្រះ នរោត្តម សីហនុ រាជហរិវង្ស ឧភតោសុជាតិ វិសុទ្ធពង្ស អគ្គមហាបុរសរតន៍ និករោត្ដម ធម្មិកមហារាជាធិរាជ បរមនាថ បរមបពិត្រ ព្រះចៅ ក្រុង កម្ពុជា ធិបតី” ជាទីគោរពសក្ការៈដ៏ខ្ពង់ខ្ពស់បំផុត ៕
