មន្រ្តីជាន់ខ្ពស់អាល្លឺម៉ង់៖ អឺរ៉ុប និងអាមេរិក ចាំបាច់ត្រូវរួមគ្នានៅក្នុង សង្គ្រាមត្រជាក់ថ្មី ប្រឆាំងនឹងចិន

បរទេស៖ ទំនាក់ទំនងរវាងសហរដ្ឋអាមេរិក និងអឺរ៉ុប ដែលជាសម្ព័ន្ធមិត្តដ៏សំខាន់របស់ខ្លួន បានធ្លាក់ចុះដល់កម្រិតទាបគ្រប់ពេល ក្រោមការដឹកនាំរបស់ប្រធានាធិបតី ដូណាល់ត្រាំ។ លោក ត្រាំ និងរដ្ឋបាលរបស់លោក បានខ្វែងគំនិតគ្នាជាមួយអ៊ឺរ៉ុប លើបញ្ហាផ្សេងៗគ្នាចាប់ពី កិច្ចព្រមព្រៀងនុយក្លេអ៊ែរអ៊ីរ៉ង់ រហូតដល់ការផ្លាស់ប្តូរអាកាសធាតុ និងសូម្បីតែការចាប់ផ្តើមធ្វើ សង្គ្រាមពាណិជ្ជកម្មជាមួយសហភាពអឺរ៉ុប។

យោងតាមសារព័ត៌មាន Sputnik ចេញផ្សាយនៅថ្ងៃទី២៨ ខែកញ្ញា ឆ្នាំ២០២០ បានឱ្យដឹងថា លោក Peter Beyer ដែលទទួលបន្ទុកកិច្ចសហប្រតិបត្តិការ អាត្លង់ទិករបស់អាល្លឺម៉ង់ បាននិយាយថា អឺរ៉ុបនិងសហរដ្ឋអាមេរិក ចាំបាច់ត្រូវតែរួបរួមគ្នានៅក្នុង“ សង្រ្គាមត្រជាក់ថ្មី” ប្រឆាំងនឹងប្រទេសចិនដោយមិនគិត ពីអ្នកដែលកាន់កាប់ការិយាល័យ Oval Office នោះទេ បន្ទាប់ពីការបោះឆ្នោត ប្រធានាធិបតីខាងមុខនេះ។ មន្ត្រីរូបនោះបានកត់សម្គាល់ថា ភាគីទាំងពីរមានផលប្រយោជន៍ រួមច្រើនជាងភាពខុសគ្នា។

លោក Beyer បាននិយាយនៅក្នុង បទសម្ភាសន៍ជាមួយ AFP ថា “អឺរ៉ុបនិងសហរដ្ឋអាមេរិក ត្រូវតែរួមគ្នាដើម្បីប្រឈមមុខ នឹងបញ្ហាប្រឈមដ៏ធំធេង ដែលប្រទេសចិនបង្កើត។ សង្គ្រាមត្រជាក់ថ្មីរវាង សហរដ្ឋអាមេរិកនិងចិន បានចាប់ផ្តើមរួចហើយ ហើយនឹងមានឥទ្ធិពល លើសតវត្សរ៍នេះ” ។

មន្ត្រីរូបនោះបាននិយាយទៀតថា បើទោះបីជាអ្នកប្រជាធិបតេយ្យលោក ចូប៊ីដិន ឈ្នះការបោះឆ្នោតប្រធានាធិបតី នៅខែវិច្ឆិកាក៏ដោយ ក៏បញ្ហាចម្រូងចម្រាសរវាងអឺរ៉ុប និងសហរដ្ឋអាមេរិក នឹងមិនត្រូវបានដោះស្រាយ នៅមួយយប់នោះទេ ប៉ុន្តែបានកត់សម្គាល់ថា ទំនាក់ទំនងរវាងប្រទេសទាំងពីរ នឹងកាន់តែសមហេតុផលអាចគណនាបាន និងអាចទុកចិត្តបានម្តងទៀត ហើយវានឹងងាយស្រួល ក្នុងការធ្វើការជាមួយលោក ប៊ីដិនជាង លោក ត្រាំ ។ ជាមួយគ្នានេះលោក Beyer បានទទួលស្គាល់ថា ជ័យជំនះរបស់លោក ដូ ណាល់ត្រាំ ក្នុងការបោះឆ្នោតនាពេលខាងមុខ មិនមែនមានន័យថាចំណងទាក់ទង រវាងសម្ព័ន្ធមិត្តទាំងពីរ នឹងចុះខ្សោយនោះទេ ៕

ប្រែសម្រួលៈ ណៃ តុលា