ភ្នំពេញ ៖ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម អមដំណើរដោយលោក ម៉ី លីហួត អនុរដ្ឋលេខាធិការ ដែលជាប្រធានមុខព្រួញខេត្តព្រៃវែង លោក ថាំង វីយុទ្ធដា ប្រធាននាយកដ្ឋានធារាសាស្រ្តកសិកម្ម ក្រុមការងារបច្ចេកទេស និងលោកប្រធានមន្ទីរធនធានទឹក និងឧតុនិយមខេត្តព្រៃវែង នារសៀលថ្ងៃអង្គារ ១១កើត ខែកត្តិក ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៧ ខែតុលា ឆ្នាំ២០២០ នេះចុះពិនិត្យស្ថានភាពទឹក ការងារអន្តរាគមន៍ជួសជុលហេដ្ឋា រចនាសម្ព័ន្ធប្រព័ន្ធធារាសាស្រ្ត និងចាត់បញ្ជាក្នុងការបើកទ្វារទឹក ដើម្បីបញ្ជូលទឹកទៅបណ្តាអាងទឹក តំបន់ទំនាបនានាក្នុងខេត្តព្រៃវែង ដើម្បីរក្សាទឹកទុកប្រើប្រាស់ នាពេលខាងមុខ ។
ក្នុងដំណើបេសកកម្មនេះ លោករដ្ឋមន្រ្តី និងក្រុមការងារបច្ចេកទេស បានចុះពិនិត្យការងារជួសជុលបន្ទាន់នូវសំណង់ទ្វារទឹក នៃប្រព័ន្ធធារាសាស្រ្តស្ទឹងជោរ ស្ថិតក្នុងឃុំក្រញ៉ូង ស្រុកកំចាយមារ ខេត្តព្រៃវែង ដែលរងការខូតខាតរបើកទ្វារទឹក ដោយសារជំនន់ទឹកភ្លៀង នាពេលកន្លងមក ដោយបានចាប់ផ្តើមធ្វើការ ជួសជុលភ្លាមៗ បន្ទាប់ពីទទួលបទបញ្ជាផ្ទាល់ ពីលោករដ្ឋមន្រ្តី ដើម្បីធ្វើការបិតទ្វារទឹកជាបណ្តោះអាសន្ន រក្សាទឹកទុក សម្រាប់ផ្តត់ផ្គង់ដល់ការស្រោចស្រព ស្រូវវស្សាចំនួន ២.០០០ ហិតា និងដំណាំរួមផ្សំបន្ថែមទៀត នាពេលខាងមុខ ។
ឆ្លៀតក្នុងឱកាសនោះ លោករដ្ឋមន្រ្តីក៏បានណែនាំបន្ថែម ដល់នាយកដ្ឋានជំនាញ និងមន្ទីរធនធានទឹក និងឧតុនិយមខេត្តព្រៃវែង ត្រូវចាត់បន្តជួសជុល និងកែលម្អបន្ថែមពេលទឹកសម្រក ដើម្បីនិរន្តរភាពនៃការប្រើប្រាស់សំណង់អាងទឹកនេះ ។
សូមជម្រាបជូនថា ថ្នាក់ដឹកនាំក្រសួងធនធានទឹក និងឧតុនិយម នាយកដ្ឋានជំនាញ និងមន្ទីរធនធានទឹក និងឧតុនិយម តាមបណ្តារាជធានី-ខេត្ត ដែលរងផលប៉ះដោយជំនន់ ទឹកភ្លៀងនាពេលថ្មីៗនេះ បានបន្ត និងកំពុងអន្តរាគមន៍យ៉ាងសស្រាក់សស្រាំ និងអនុវត្តន៍តាមប្រសាសន៍ដ៏ខ្ពង់ខ្ពស់ ប្រកបដោយគតិបណ្ឌិតរបស់ សម្តេចមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដោយធ្វើយ៉ាងណាឆាប់រួសរាន់ស្តារឡើងវិញនូវហេដ្ឋារចនាសម្ព័ន្ធធារាសាស្រ្ត ដែលខូតខាតដោយទឹកជំនន់ ដើម្បីទប់រក្សាទុកទឹក ប្រើប្រាស់ប្រចាំថ្ងៃ និងការងារបង្កបង្កើនផល ពេលទឹកសម្រកវិញ ។
បច្ចុប្បន្នក្រសួងធនធានទឹក និងឧតុនិយម កំពុងអនុវត្តនូវវិធីសាស្រ្ត ២ យ៉ាង គឺ ទី ១ អន្តរាគមន៍ខ្ចប់ទឹកទុកឲ្យខានតែបាន និងទី ២ បន្តជួសជុល ពង្រឹងកែលំអរឲ្យបានល្អប្រសើរ តាមលក្ខណ:បច្ចេកទេសនិងលទ្ធភាព ទៅតាមស្ថានភាពជាក់ស្តែង នៃទីតាំងនីមួយៗ ដើម្បីពង្រឹងគុណភាពសំណង់ និងស្តុករក្សារទឹកឲ្យបានច្រើន ជូនបងប្អូនប្រជាពលរដ្ឋ ប្រើប្រាស់ជាពហុប្រយោជន៍បានយូរអង្វែង ៕
