ភ្នំពេញ៖ លោក Péter Szijjártó រដ្ឋមន្រ្តីការបរទេស និងពាណិជ្ជកម្មហុងគ្រី រួមជាមួយលោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេសខ្មែរ នៅថ្ងៃទី៣ វិច្ឆិកានេះ បានអញ្ជើញជាអធិបតី សម្ពោធជាផ្លូវការការិយាល័យ តំណាងស្ថានទូតហុងគ្រីប្រចាំកម្ពុជា នៅសណ្ឋាគារកាំបូឌីយ៉ាណា ។
ក្នុងឱកាសនោះលោកឧបនាយករដ្ឋមន្រ្តី ប្រាក់ សុខុន បានមានប្រសាសន៍ថា លោកពិតជាមានសេចក្តីសោមនស្សរីករាយណាស់ ដោយបានចូលរួមក្នុងពិធី សម្ពោធជាផ្លូវការការិយាល័យ តំណាងស្ថានទូតហុងគ្រីប្រចាំកម្ពុជា ក្នុងឱកាសនៃទស្សនកិច្ចផ្លូវការជាលើកទី២ របស់លោករដ្ឋមន្ត្រីការ បរទេសហុងគ្រីនៅកម្ពុជា ។ លោកថា ” វាឆ្លុះបញ្ចាំងពីចំណងមិត្តភាព ជាប្រពៃណី ទំនាក់ទំនងសហប្រតិបត្តិការជិតស្និទ្ធ ដែលមានស្រាប់រវាងប្រទេស និងប្រជាជនយើងទាំងពីរ”។
លោកឧបនាយករដ្ឋមន្ត្រីបន្តថា “មុននេះ យើងបានផ្លាស់ប្តូរទស្សនៈគ្នាទៅវិញទៅមក ស្តីពីបញ្ហាដែលជាផលប្រយោជន៍រួម ព្រមទាំងបានពិភាក្សាបន្ថែម អំពីវិធានការ និងមធ្យោបាយ ដើម្បីពង្រីកបន្ថែមដល់ កិច្ចសហប្រតិបតិ្តការទ្វេភាគីដ៏ស្អិតរមួត និងសម្បូរបែបរបស់ប្រទេសយើងទាំងពីរ”។
ឧបនាយករដ្ឋមន្ត្រី ប្រាក់ សុខុន ជឿជាក់ថា ការសម្ពោធការិយាល័យនេះ នឹងនាំការឈានទៅរកភាព ជាដៃគូរអភិវឌ្ឍន៍លើគ្រប់វិស័យ ដើម្បីជាផលប្រយោជន៍រួម របស់ប្រជាជនយើងទាំងពីរ ។ លោកក៏បានជូនពរការិយាល័យ តំណាងស្ថានទូតហុងគ្រី បំពេញបេសកកម្មប្រកបដោយ ជោគជ័យនៅព្រះរាជាណាចក្រកម្ពុជា។
ប្រមុខការទូតកម្ពុជា អះអាងប្រាប់លោករដ្ឋមន្រ្តី Péter Szijjártó ថា ក្រសួងការបរទេស នឹងធ្វើការយ៉ាងជិតស្និទ្ធជាមួយ ការិយាល័យតំណាង ស្ថានទូតហុងគ្រីនៅភ្នំពេញ ព្រមទាំងបន្តផ្តល់នូវ កិច្ចសហប្រតិបត្តិការគ្រប់ជ្រុងជ្រោយ ដើម្បីឲ្យការិយាល័យតំណាង អាចបំពេញបេសកកម្មរបស់ខ្លួននៅកម្ពុជា ៕
