ភ្នំពេញ៖ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានប្រកាសថា លោកទទួលលទ្ធផលអវិជ្ជមាន ជាលើកទី៤ ពោលគឺពុំមានឆ្លងជំងឺដ៏កាចសាហាវ កូវីដ១៩នោះទេ ។
លោករដ្ឋមន្ត្រី វេង សាខុន បានសរសេរលើបណ្ដាញសង្គម ហ្វេសប៊ុក នៅរសៀលថ្ងៃទី១៨ វិច្ឆិកានេះថា «ខ្ញុំពិតជាមានក្តីរំភើបរីករាយជាពន់ពេក នៅរសៀលថ្ងៃនេះ ក្រោយពីទទួលបានដំណឹង ពីក្រសួងសុខាភិបាល ថា លទ្ធផលនៃការធ្វើតេស្តទៅលើ សំណាកដែលបានផ្តល់ជាលើកទីបួន នាព្រឹកមិញនេះរបស់យើងខ្ញុំករុណា ខ្ញុំ គឺទទួលបានលទ្ធផល អវិជ្ជមានមេរោគកូវិដ ១៩» ។
ទន្ទឹមនិងការសប្បាយរីករាយ លោករដ្ឋមន្ត្រីកសិកម្ម បានថ្លែងអំណរគុណយ៉ាងជ្រាលជ្រៅបំផុត ចំពោះក្រសួងសុខាភិបាល និងមន្ត្រីវិទ្យាស្ថានប៉ាស្ទើរទាំងអស់ ដែលបានយកចិត្តទុកដាក់ខ្ពស់ ក្នុងការយកសំណាក និងធ្វើការវិភាគយ៉ាងសុក្រិតបំផុត ទន្ទឹមនឹងនេះលោកអរព្រះគុណ និងថ្លែងអំណរគុណយ៉ាង ជ្រាលជ្រៅបំផុតចំពោះ ព្រះតេជគុណ ឯកឧត្តម លោកជំទាវ លោក លោកស្រី និងនាងកញ្ញា ដែលបានផ្ញើរសារសំដែង ការព្រួយបារម្ភពីសុខភាពរបស់លោក និងលើសពីនេះទៀត គឺបានផ្ញើរសារជូនពរមករូបលោក ឲ្យរួចផុតពីការឆ្លងមេរោគកូវីដ១៩ ។
ជាមួយគ្នានេះលោករដ្ឋមន្ត្រីកសិកម្ម ក៏បានប្រគេន និងជូនពរ ព្រះតេជគុណ ឯកឧត្តម លោកជំទាវ លោក លោកស្រី និងនាងកញ្ញា សូមទទួលបានពុទ្ធពរទាំងបួនប្រការ កុំបីឃ្លៀងឃ្លាតឡើយ ៕
