ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានឲ្យដឹងថា ដំណក់ប្រេងលើកដំបូង របស់កម្ពុជា ដែលដំណើរការនាពេលនេះ ក៏មានសមទ្ធិផល ឬគុណសម្បត្តិមួយផ្នែកធំរបស់ សម្តេចវិបុលបញ្ញា សុខ អាន ផងដែរ ទោះបីសម្តេច សុខ អាន បានទទួលមរណៈភាពជាច្រើនក៏ដោយ។
ក្នុងពិធីថ្លែងសារពិសេស ពាក់ព័ន្ធព្រឹត្តិការណ៍ «សហគមន៍២៨វិច្ឆិកា» និងសមិទ្ធផលកើតពីនយោបាយ ឈ្នះ-ឈ្នះ នៅ ថ្ងៃទី២៩ ខែធ្នូ ឆ្នាំ២០២០ សម្ដេចតេជោ ហ៊ុន សែន បានថ្លែងថា ប្រេងរបស់កម្ពុជានៅប្លុកA មិនមានពាក់ព័ន្ធជាមួយថៃឡើយ ។ ប្លុកនេះមានចម្ងាយពីថៃ ជាង៣០០គីឡូម៉ែត្រ ហើយចម្ងាយពីខេត្តព្រះសីហនុ ជាង១០០គីឡូម៉ែត្រតែប៉ុណ្ណោះ។
សម្ដេចតេជោ មានប្រសាសន៍ថា «ខ្ញុំសូមយកឱកាស នេះ អរគុណឯកឧត្តម ស៊ុយ សែម និងសហការី ក្រសួងរ៉ែ និងថាមពលដែលបានខិតខំបន្ដការងារនេះ (ការងារប្រេង) ពីសម្ដេចវិបុលបញ្ញា សុខ អាន ហើយខ្ញុំក៏នឹកទៅដល់ សម្ដេចវិបុលបញ្ញា សុខ អាន ដែលគាត់បានប្រឹងប្រែង ទៅលើការងារចរចានានា ទាំងក្រុមហ៊ុននានា តាំងពីតូតាល់ ហើយមានក្រុមហ៊ុនបរទេសច្រើនណាស់ ចិន វៀតណាម បារាំង អាមេរិក ជប៉ុន សាំងហ្គាពួរ ម៉ាឡេ ធ្វើការច្រើនណាស់»។
សម្ដេចតេជោ បន្ដថា «ចឹងនៅពេលដែលអាជ្ញាធរប្រេងកាត ដែលយើងបង្កើតក្រសួងរ៉ែ និងថាមពល ហើយយើង បញ្ចូលអាជ្ញាធរប្រេងកាតនៅក្រោម ក្រសួងរ៉ែ និងថាមពល។ ចឹងក៏មានសមទ្ធិផលគុណសម្បត្តិមួយផ្នែកធំរបស់សម្ដេចវិបុលបញ្ញា សុខ អាន និងបន្ដមកសម្រេចជោគជ័យ នៅក្នុងក្ដាប់ដៃរបស់ ឯកឧត្តម ស៊ុយ សែម និងសហការីរប ស់គាត់»។
បន្ថែមពីនេះ សម្តេចតេជោ ក៏បានប្រកាសឲ្យ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារ ជាតិ យកដំណក់ប្រេងលើកដំបូងរបស់កម្ពុជា យកទៅរក្សាទុកនៅវិមានឈ្នះ-ឈ្នះ ព្រោះថា ដោយសារតែនយោបាយឈ្នះ-ឈ្នះនេះហើយ ទើបទទួលបានសមិទ្ធផលប្រេងនានានេះ។
ជាងនេះទៅទៀត សម្ដេចតេជោ ហ៊ុន សែន ក៏បានប្រកាសថា ថវិកាបានពីការលក់ប្រេងដំបូងរបស់កម្ពុជា នឹងយកទៅ ប្រើប្រាស់ក្នុងវិស័យអាទិភាព២ គឺវិស័យអប់រំ និងវិស័យសុខាភិបាល ដែលជាវិស័យសំខាន់ សម្រាប់កម្ពុជា។ សម្ដេច ចាត់ទុកថា ដំណក់ប្រេងលើកដំបូងរបស់កម្ពុជា ជាពរជ័យជូនចំពោះប្រជាជាតិកម្ពុជាទាំងមូល។
សម្ដេចតេជោបញ្ជាក់ថា «លុយបានមកពីប្រេង ខ្ញុំនឹងឆ្លើយប្រាប់ថា ខ្ញុំនឹងផ្ដល់អាទិភាពទៅលើវិស័យអប់រំ និងសុខាភិបាល។ដំណក់ប្រេងនេះជាពរជ័យសម្រាប់ប្រជាជនកម្ពុជា នៅក្នុងដំណាក់កាលថ្មី ជាប្រភពចំណូលថ្មី»៕
