ភ្នំពេញ ៖ លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានឲ្យដឹងថា ដើម្បីការពារព្រៃឈើ និងសត្វព្រៃ បានគង់វង្ស គឺបង្កើតមុខរបរថ្មី ជូនប្រជាពលរដ្ឋ នៅតំបន់ការពារធម្មជាតិ ហើយគាំទ្រផ្នែកបច្ចេកទេស និងបង្កើតចំណូល សម្រាប់ពួកគាត់ ។ នេះយោងតាមគេហទំព័រហ្វេសប៊ុករបស់ ក្រសួងបរិស្ថាន។
ក្នុងដំណើរទស្សនកិច្ចសិក្សា នៅដែនជម្រកសត្វព្រៃស្រែពក ខេត្តមណ្ឌលគិរី នាពេលថ្មីៗនេះ លោក នេត្រ ភក្ត្រា បានថ្លែងថា គោលនយោបាយ របស់រាជរដ្ឋាភិបាលកម្ពុជា ដែលមានក្រសួងជាសេនាធិការ បាននិងកំពុងតែគ្រប់គ្រង តំបន់អភិរក្សនៅកម្ពុជា។
លោកបញ្ជាក់ថា «គោលនយោបាយបង្កើតមុខរបរថ្មី ឱ្យពលរដ្ឋនេះ មានប្រសិទ្ធភាពពីព្រោះថា ប្រជាពលរដ្ឋ ដែលគាត់រស់នៅជុំវិញតំបន់ការពារធម្មជាតិ និងនៅក្នុងតំបន់ការពារធម្មជាតិមួយចំនួន ភាគច្រើនមុខរបររបស់គាត់ គឺប្រមូលអនុផលព្រៃឈើ ក៏ប៉ុន្តែមុខរបររបស់គាត់ខ្លះ គឺចូលព្រៃកាប់ឈើ ចូលព្រៃបរបាញ់សត្វ ដាក់អន្ទាក់ជាដើម ។ ការណ៍ទាំងនេះវាបំផ្លិចបំផ្លាញ ទៅលើធនធានធម្មជាតិ ។ ដូច្នេះដើម្បីការពារព្រៃឈើ របស់យើងការពារសត្វព្រៃរបស់យើង នៅក្នុងព្រៃនេះឲ្យបានគង់វង្ស នោះគឺការបង្កើតនៅជម្រើសថ្មី ជូនដល់ប្រជាពលរដ្ឋ បង្កើតនូវមុខរបរថ្មី ជូនដល់ប្រជាពលរដ្ឋហើយគាំទ្រ ផ្នែកបច្ចេកទេស និងបង្កើតនូវចំណូលសម្រាប់ពួកគាត់» ។
លោកបន្ដថា «នៅក្នុងស្រុកកោះញែក ខេត្តមណ្ឌលគិរី ជាភូមិសាស្ត្រមួយ ដែលមានដែនជម្រកសត្វព្រៃស្រែពកនេះ គឺយើងពិតជាឃើញមាននូវការវិវត្តិថ្មី នៃគោលនយោបាយនេះគឺ ការទទួលបាននូវផលប្រយោជន៍ ពីការអនុវត្តនេះគឺប្រជាពលរដ្ឋគាត់ផ្លាស់ប្តូរ មុខរបរគាត់មកដាំបន្លែ គាត់មកប្រមូលនូវអនុផលព្រៃឈើ ដោយការពារព្រៃឈើ ការពារសត្វព្រៃ ជីវចម្រុះនៅក្នុងព្រៃនេះ ពួកគាត់ បានទទួលចំណូលច្រើន»។
លោកបន្ថែមថា ទាំងនេះគឺជាថវិកាដែលប្រជាសហគមន៍ ប្រមូលបានពីអនុផលព្រៃឈើ នៅក្នុងតំបន់ការពារធម្មជាតិ ហើយចំណុចមួយទៀត គឺការបង្កើតមុខរបរថ្មី ដូចជាប្រជាពលរដ្ឋដាំបន្លែ បង្ការ មានម្ទេស ប៉េងប៉ោះ ស្បៃក្តោប ត្រប់ និង ផលិតផលបន្លែបង្ការផ្សេងៗទៀត បានផ្តល់ចំណូលឲ្យពួកគាត់៕
