ភ្នំពេញ ៖ លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានថ្លែងថា វិស័យព័ត៌មាន គឺជាឧបករណ៍ដ៏ចាំបាច់ សម្រាប់ ការប្រើប្រាស់នាំមកជាប្រយោជន៍ ដល់ការថែរក្សាស្ថិរភាព នយោបាយ ធានាបាននូវឱកាស ដើម្បីអភិវឌ្ឍន៍ប្រទេសជាតិ ។ យោងតាមការចេញផ្សាយ ក្រសួងព័ត៌មាន។
ក្នុងពិធីអបអរសាទរ ខួប១០ឆ្នាំ នៃការបង្កើតវិទ្យុជាតិ FM នគរភ្នំ 103 MHz និងខួប ៤ឆ្នាំ ថ្ងៃកំណើតទូរទស្សន៍ជាតិ ខេត្តសៀមរាប កាលពីថ្ងៃទី២៦ ខែមករា ឆ្នាំ២០២១ លោក ខៀវ កាញារីទ្ធ បានឲ្យដឹងថា ដើម្បីឈានទៅរកគោលដៅ នៃការធ្វើឲ្យមានគុណភាព និងប្រសិទ្ធភាព ចាំបាច់ណាស់ គឺការទំនាក់ទំនងល្អ ជាមួយ បណ្តាស្ថាប័ននៃប្រភពព័ត៌មាន ទាំងឡាយ ដូចជា មន្ទីរ អង្គភាពជុំវិញខេត្ត និងអាជ្ញាធរដែនដីគ្រប់លំដាប់ថ្នាក់ ។
លោកអំពាវនាវ ទៅកាន់បណ្តាស្ថាប័ន អង្គភាពនានា ដែលពាក់ព័ន្ធត្រូវយកចិត្តទុកដាក់ឡើងវិញ ទៅលើការរៀបចំតួ នាទីអ្នកនាំពាក្យប្រចាំអង្គភាពរបស់ខ្លួន ដើម្បីឆ្លើយតប និងចូលរួមបន្សាបព័ត៌មានមិនពិត ដែលបង្កឲ្យមានបាតុភាពមិន ល្អក្នុងសង្គម។
លោកបន្តថា ដើម្បីគុណប្រយោជន៍ របស់អ្នកនាំពាក្យ និងអាចនិយាយបានថា ជាបទពិសោធន៍មួយនោះ គឺជោគជ័យ នៃការដឹកនាំប្រយុទ្ធ ប្រឆាំងជម្ងឺកូវីដ-១៩ របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដែលត្រូវបានពិភព លោកទទួលស្គាល់។ លើសពីនេះទៀត អ្វីដែលជាកត្តាជោគជ័យនេះ នោះគឺការរៀបចំក្រុមអ្នកនាំពាក្យ ដែលមាន សមត្ថភាពគ្រប់គ្រាន់ ធ្វើការ២៤ម៉ោង ហើយមជ្ឈដ្ឋាននានានៅជុំវិញមានទំនុកចិត្ត៕
