ភ្នំពេញ ៖ លោក ងួន រតនៈ អភិបាលខេត្តបាត់ដំបង បានព្រមានដល់ ក្រុមអ្នករត់តាក់ស៊ី ទាំងអស់កុំលួចលាក់ ដឹកពលករគេចវេះ ពីមណ្ឌលចត្តាឡីស័ក ហើយប្រសិនរកឃើញ នឹងអនុវត្តតាមនីតិវិធីច្បាប់ ដោយមិនលើកលែងទ្បើយ ។ នេះបើតាមការចុះផ្សាយ របស់រដ្ឋបាលខេត្ត។
លោក ងួន រតនៈបានថ្លែងបែបនេះ ក្នុងឱកាសជួបសំណេះសំណាល ជាក្រុមអ្នករត់តាក់ស៊ី នៅច្រកអន្តរជាតិដូង ស្រុកកំរៀងនៅព្រឹកថ្ងៃទី១៦ ខែកុម្ភៈ ឆ្នាំ២០២១ ។
លោកបន្តថា ប្រសិនបើសមត្ថកិច្ចឃើញក្រុមអ្នករត់តាក់ស៊ី លួចដឹកពលករមិនឲ្យធ្វើចត្តាឡីស័ក នឹងត្រូវផ្តន្ទាទោសដោយមិន លើកលែងឡើយ ពីបទជួញដូរមនុស្សខុសច្បាប់។
អភិបាលបន្តទៀតថា ការដឹកជញ្ជូនពលករ ដើម្បីគេចវេះមណ្ឌលចត្តាឡីស័ក គឺជាហនិភ័យខ្ពស់មួយប្រសិនបើពលករនោះមានផ្ទុះជំងឺកូវីដ១៩ នឹងមានការរីករាលដល់បងប្អូនក្រុមគ្រួសារ និងឈានទៅដល់ការផ្ទុះ ក្នុងសហគមន៍ណាមួយជាមិនខាន។
ទន្ទឹងនឹងនេះដែរលោក ងួន រតនៈ បានសង្កត់ធ្ងន់ៗថា បើសមត្ថកិច្ចណាម្នាក់ ហ៊ានដោះលែង អ្នកដឹកជញ្ជូនពលករ ដើម្បីគេចវេះពីមណ្ឌលចត្តាឡីស័ក ដោយមនោសញ្ចេតនាក្តី ឬដោយការសូកប៉ាន់ក្តី នឹងត្រូវទទួលខុសត្រូវចំពោះមុខច្បាប់ដូចគ្នា ៕
