ភ្នំពេញ៖ លោក ពេជ្រ ស្រស់ ប្រធានគណបក្សយុវជនកម្ពុជា បានលើកជាសំណួរខ្លីមួយថា តើកម្ពុជាគួររត់តាម COVID-19 ឬបិទទ្វារផ្ទះ ដើម្បីបញ្ចប់ COVID-19? ។
ការចោទសួររបស់លោក ពេជ្រ ស្រស់ ធ្វើឡើងក្រោយអាជ្ញាធររាជធានីភ្នំពេញ បានប្រកាស និងបង្ហាញពីការរកឃើញទីតាំង ដែលពាក់ព័ន្ធ ក្នុងព្រឹត្តិការណ៍ សហគមន៍ ២០ កុម្ភៈ រហូតដល់ ៧៧កន្លែង ។
លោក ពេជ្រ ស្រស់ បានសរសេរលើបណ្ដាញ សង្គមហ្វេសប៊ុក កាលពីថ្ងៃទី២៦ កុម្ភៈថា «បច្ចុប្បន្នភាពមាន 77ទីតាំង ហើយដែល COVID-19 បានទៅចុះចត ហើយក៏ មិនទាន់ដឹងថា នៅមានប៉ុន្មានទីតាំងទៀតដែរ នឹង មាន COVID-19 បាននឹងកំពុងស្នាក់នៅនោះ…. ដូច្នេះសួរថា តើកម្ពុជាគួររត់តាម COVID-19 ឬបិទទ្វារផ្ទះដើម្បីបញ្ចប់ COVID-19 ? ចម្លើយ..?» ។
សូមរំលឹកថា គិតត្រឹមព្រឹកថ្ងៃទី២៧ កុម្ភៈនេះ កម្ពុជាបានរកឃើញអ្នកឆ្លងកូវីដ១៩ ចំនួន៧៦៦នាក់ ក្នុងនោះអ្នកជាសះស្បើយចំនួន ៤៧៧នាក់ និងកំពុងសម្រាកព្យាបាលអ្នកជំងឺចំនួន ២៨៧នាក់ ។ ដោយឡែកអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ បានកើនដល់ ២៨៩នាក់ បូកទាំងអ្នកជំងឺ ២នាក់ ដែលក្រុមការងារកំពុងរុករកបន្ថែមទៀត ដើម្បីយកមកដាក់សម្រាកព្យាបាល ៕
