ភ្នំពេញ ៖ ឌួង ឆាយ បានបង្ហាញសារ នៅក្នុងហ្វេសប៊ុក នាមុននេះបន្តិច ដោយលើកសំណេរយ៉ាងខ្លី ដោយបានសូមទោស និងទទួលស្គាល់ កំហុសគ្រប់យ៉ាងរបស់ខ្លួន ។
សាររបស់ឌួង ឆាយ ក្នុងហ្វេសប៊ុកនាថ្ងៃរសៀលថ្ងៃ១៧ មីនានេះ បង្ហាញថា “ដោយមានការឆ្ងល់ ពីពូមីងបងប្អូនទាំងអស់គ្នា កូនប្រុសស្រីរបស់ខ្ញុំ បានទៅដល់ផ្ទះជាមួយម្តាយគេវិញ តាំងពិម្សិលមិញរួចហើយ ។ ខ្ញុំបាទសូមទោស និងទទួលស្គាល់ កំហុសគ្រប់យ៉ាងជារបស់ខ្ញុំ”។
ក្រោយពីមានសំណើពីសម្ដេចតេជោ ហ៊ុន សែន នាយរដ្ឋមន្រ្តី នៃកម្ពុជា ស្នើឲ្យបញ្ចប់គោរមងារជាឧកញ៉ារបស់ឌួង ឆាយ សម្តេចសាយ ឈុំ ប្រមុខរដ្ឋស្ដីទីកម្ពុជា បានក្រាបទូលថ្វាយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ដើម្បីស្នើសុំបញ្ចប់គោរមងារ ជាឧកញ៉ា។ នេះបើយោងតាមលិខិតរបស់សម្តេច សាយ ឈុំ ប្រមុខរដ្ឋស្តីទី នៃកម្ពុជាទូលថ្វាយព្រះមហាក្សត្រនាថ្ងៃទី១៧ ខែមីនា ឆ្នាំ២០២១ ។
សូមបញ្ជាក់ថា ការស្នើសុំបញ្ចប់គោរមងារ ឧកញ៉ាឌួង ឆាយ នេះ ក្រោយពីសម្តេចតេជោបញ្ចេញសារ តាមខមិននៅលើការឡាយ របស់អតីតភរិយា ឌួង ឆាយ ដែលបានបង្ហាញពីសកម្មភាពយ៉ាងច្រើន វាយទាត់ធាក់ទៅលើអតីតប្រពន្ធ កាលពីថ្ងៃ១៦មីនា ។
ខមិនដែលសម្តេចតេជោ ដាក់នៅខាងក្រោមនោះ មានន័យលើកជាសំណួរថា “ហេតុអីដួងឆាយឃោឃៅដល់កម្រិតនេះ?”៕
