ភ្នំពេញ៖ ថ្នាក់ដឹកនាំ ធនាគារអភិវឌ្ឍន៍ជនបទ និងកសិកម្ម (ARDB Bank) នៅថ្ងៃទី៤ ខែឧសភា ឆ្នាំ២០២១ បានប្រជុំពិភាក្សា ជាមួយតំណាងអង្គការ FAO ស្តីពីការរៀបចំគម្រោងស្តីពី ភាពជាដៃគូ រវាងស្ថាប័នសាធារណៈ សង្គម និងឯកជន សម្រាប់កសិកម្ម បែបអេកូឡូស៊ី និងភាពធននឹងការរស់នៅ តាមបណ្តោយទន្លេសាប ភាគខាងជើង (Public-Social-Private Partnerships for Ecologically-Sound Agricultural and Resilient Livelihoods in Northern Tonle Sap Basin–PEARL) នៃមូលនិធិអាកាសធាតុសកល (Global Climate Fund–GCF) ដែលដឹកនាំដោយអង្គការ FAO និងមានកិច្ចសហការពីក្រសួងកសិកម្ម រុក្ខាប្រមាញ់ និងនេសាទ ។
តាមការបញ្ជាក់ ធនាគារអភិវឌ្ឍន៍ជនបទ និងកសិកម្ម បានឲ្យដឹងថា គម្រោងនេះមានគោលបំណង ពង្រឹងភាពធន់នឹងការប្រែប្រួលអាកាសធាតុ សម្រាប់កសិករ និងសហគមន៍ នៅភាគខាងជើងទន្លេសាប (កំពង់ធំ,សៀមរាប,ព្រះវិហារ និងឧត្តរមានជ័យ) តាមរយៈភាពជាដៃគូ រវាងស្ថាប័សាធារណៈ សង្គម និងឯកជន ដោយពង្រឹងការប្រើប្រាស់ បច្ចេកវិទ្យាក្នុងការបន្សាំ នឹងអាកាសធាតុ, ជំរុញកសិកម្ម ដែលមានតម្លៃខ្ពស់, បង្កើនការទទួលព័ត៌មានទីផ្សារ និងទទួលបានឥណទាន ដែលមានអត្រាការប្រាក់ទាប ស្របតាមផែនការអាជីវកម្ម។
គម្រោងនេះមានទឹកប្រាក់សរុបចំនួនប្រមាណ ៤០លានដុល្លារអាមេរិក ដែលគ្រោងនឹងផ្តល់ជូនកសិករ និងតួអង្គខ្សែច្រវាក់តម្លៃ ចំនួន ៥០០.០០០ នាក់ ។ គម្រោងនេះមានរយៈពេល ៨ ឆ្នាំ។
គួរបញ្ជាក់ថា កិច្ចប្រជុំនេះមានគោលបំណងពិភាក្សា អំពីកិច្ចសហការជាមួយធនាគារ អេ អ ឌី ប៊ី ក្នុងនាមជាអ្នកគ្រប់គ្រងទុនបង្វិល (Revolving Fund) ដោយសារធនាគារ អេ អ ឌី ប៊ី នឹងត្រូវចាត់តាំង ដោយរាជរដ្ឋាភិបាល ដែលជាស្ថាប័នមួយ អាចប្រើប្រាស់ (Direct Access Entity)មូលនិធិ GFC។ ទុនបង្វិលជាសមាសភាគមួយ ក្នុងចំណោមសមាសភាគដទៃ ក្នុងគម្រោងនេះដែលមានទឹកប្រាក់ ប្រមាណ ៧ លានដុល្លារអាមេរិក៕
