បរទេស៖ ប៉ូលីសបាននិយាយថា មន្រ្តីប៉ូលីសចូលនិវត្តន៍អាយុ ៧៣ឆ្នាំម្នាក់ បានស្លាប់កាលពីថ្ងៃច័ន្ទ ពោលគឺរយៈពេល ៥ថ្ងៃបន្ទាប់ពីបានចាក់វ៉ាក់សាំង AstraZenica ។
យោងតាមសារព័ត៌មាន Bangkok Post ចេញផ្សាយនៅថ្ងៃទី១៥ ខែមិថុនា ឆ្នាំ២០២១ បានឱ្យដឹងថា នៅម៉ោងប្រហែល ៣រសៀលមន្ត្រីចូលនិវត្តន៍រូបនេះ បានដួលនិងសន្លប់បាត់ស្មារតី នៅផ្ទះ ក្រុមអ្នកជួយសង្គ្រោះ Ruam Katanyu Foundation បានមកដល់ភ្លាមៗហើយ ព្យាយាមជួយសង្គ្រោះជីវិតដោយប្រើ CPR ប៉ុន្តែមិនបានជោគជ័យទេ។
ប្រពន្ធជនរងគ្រោះបាននិយាយថា នៅរសៀលថ្ងៃច័ន្ទ ប្តីរបស់គាត់បានត្អូញត្អែរពីការពិបាកដកដង្ហើម និងឈឺក្រពះ ហើយបន្ទាប់មកបាត់បង់ស្មារតី។ គាត់បានទូរស័ព្ទទៅអង្គភាពសង្គ្រោះបន្ទាន់។
អ្នកស្រី Wannaporn ដែលជាប្រពន្ធអ្នកស្លាប់បាននិយាយថា ការស្លាប់របស់ប្តីរបស់គាត់អាចទាក់ទង ទៅនឹងការចាក់វ៉ាក់សាំងបង្ការជំងឺកូវីដ១៩ ។ ប្តីរបស់គាត់មានជំងឺលើសឈាម ទឹកនោមផ្អែម និងជំងឺសរសៃឈាមកក ប៉ុន្តែមិនបានបង្ហាញរោគសញ្ញាអ្វីនោះទេ ៕
ប្រែសម្រួលៈ ណៃ តុលា
