ភ្នំពេញ ៖ ម្ចាស់ហាងផ្ទះឈើម្ហូបខ្មែរថៃចំនួន២នាក់ និងភ្ញៀវចំនួន៨នាក់ សរុបចំនួន ១០នាក់ (ស្រីម្នាក់) ដែលបើកហាង និងចូលទៅផឹកសើល្មើសនឹងបម្រាមគោចរ នៅសង្កាត់ស្ទឹងមានជ័យ២ ខណ្ឌមានជ័យ ត្រូវបានបញ្ជូនទៅសាលាដំបូងរាជធានីភ្នំពេញ នៅព្រឹកថ្ងៃទី១២ ខែសីហា ឆ្នាំ២០២១ ។ នេះបើតាមការចេញផ្សាយរបស់អគ្គស្នងការដ្ឋាននគរបាលជាតិ។
![](https://dap-news.com/wp-content/uploads/2021/08/photo_2021-08-12_11-10-22-1024x682.jpg)
![](https://dap-news.com/wp-content/uploads/2021/08/photo_2021-08-12_11-10-26-1024x682.jpg)
មនុស្ស១៤នាក់ (ស្រី៥នាក់) ត្រូវបានកម្លាំងគណៈបញ្ជាការឯកភាពរដ្ឋបាលខណ្ឌមានជ័យ ក្រោមការដឹកនាំដោយ លោក ពេជ្រ កែវមុនី អភិបាលខណ្ឌ និងជាប្រធានគណៈបញ្ជាការឯកភាពរដ្ឋបាលខណ្ឌ លោក ឌី រ័ត្នខេមរុណ អភិបាលរងខណ្ឌ និងលោកវរសេនីយ៍ឯក ម៉េង វិមានតារា អធិការនគរបាលខណ្ឌមានជ័យ ចាប់ឃាត់ខ្លួនក្រោមបទល្មើសបម្រាមគោចរ ខណៈពួកគេនាំគ្នាប្រមូលផ្តុំផឹកស៊ី នៅក្នុងហាងយីហោ (ផ្ទះឈើម្ហូបខ្មែរ-ថៃ) ដែលមានទីតាំងស្ថិតនៅភូមិភ្នាត សង្កាត់ស្ទឹង២ ខណ្ឌមានជ័យ កាលពីម៉ោង៩យប់ថ្ងៃទី១០ ខែសីហា ឆ្នាំ២០២១ ។
![](https://dap-news.com/wp-content/uploads/2021/08/photo_2021-08-12_11-10-29-1024x682.jpg)
លោកវរសេនីយ៍ឯក ម៉េង វិមានតារា អធិការនគរបាលខណ្ឌមានជ័យ បានបញ្ជាក់ថា ក្រោយពីការឃាត់ខ្លួនមនុស្សទាំង១៤នាក់នោះ មាន ៤នាក់ (ស្រី) ជាបុគ្គលិក ត្រូវបានធ្វើការអប់រំ ។ ដោយឡែកម្ចាស់ហាង និងភ្ញៀវ សរុប ១០ បានបញ្ជូនទៅកាន់ស្នងការដ្ឋាននគរបាលរាជធានីភ្នំពេញ ដើម្បីអនុវត្តបន្តទៅតាមនីតិវិធីច្បាប់ ៕
![](https://dap-news.com/wp-content/uploads/2020/08/1-1.png)