អាមេរិក ផ្តល់៤លានដុល្លារ ថែមទៀត ដល់កម្ពុជា សម្រាប់ប្រយុទ្ធប្រឆាំង កូវីដ-១៩
ភ្នំពេញ ៖ តាមរយៈទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិ (USAID) រដ្ឋាភិបាល សហរដ្ឋអាមេរិកនៅថ្ងៃទី៩ ខែសីហា ឆ្នាំ២០២១នេះ បានប្រកាសផ្ដល់ជំនួយបន្ថែមចំនួន ៤លានដុល្លារ ទៀតដែលជាជំនួយបន្ទាន់ ទាក់ទងទៅនឹងការប្រយុទ្ធប្រឆាំងជំងឺកូវី-១៩ សម្រាប់កម្ពុជា ។ នេះបើតាមសេចក្តីប្រកាសព័ត៌មានរួមរវាងទូតអាមេរិកប្រចាំនៅភ្នំពេញ និង USAID។
ជំនួយនេះ នឹងផ្ដល់ការគាំទ្រទាន់ពេលវេលា ពិសេសដោយយោងលើអំណោយ នាពេលថ្មីៗនេះ របស់សហរដ្ឋអាមេរិក ជាវ៉ាក់សាំង Johnson & Johnson ចំនួន ១,០៦០,១០០ ដូស ដែលត្រូវបានផ្ដល់តាមរយៈយន្តការកូវ៉ា។
លោក W. Patrick Murthy ឯកអគ្គរដ្ឋទូតសហរដ្ឋអាមេរិកប្រចាំកម្ពុជាមានប្រសាសន៍ថា «ការលើកកម្ពស់សន្តិសុខផ្នែកសុខភាពសាកល និងការត្រៀមទប់ទល់នឹងការផ្ទុះឡើងនៃជំងឺមានសារសំខាន់ណាស់ មិនត្រឹមតែដើម្បីការពារសុខភាព និងសុវត្ថិភាពតែប៉ុណ្ណោះទេ តែថែមទាំងដើម្បីធានាវិបុល ភាពនៃសេដ្ឋកិច្ច និងការពារសន្តិសុខរបស់ប្រទេសយើងផងដែរ។ យើងមានមោទនភាពក្នុងការផ្ដល់ការគាំទ្រនេះ ដែលនឹងជួយប្រជាជនកម្ពុជា ក្នុងការការពារខ្លួនគេ អ្នកជិតខាង និងអនាគតនៃសេដ្ឋកិច្ចរបស់គេ»។
បើតាមសេចក្តីប្រកាសដដែល ការផ្តល់ជំនួយបន្ថែមនេះ បន្ទាប់ពីអាមេរិកបានផ្តល់ជាង ១១ លានដុល្លារដល់កម្ពុជា តាំងពីជំងឺនេះបានផ្ទុះឡើង ជាលើកដំបូង។ ការគាំទ្រនេះ បានដល់ប្រជាជនកម្ពុជាជាង ១០ លាននាក់ ដោយមានជាសម្ភារៈលើកកម្ពស់ការយល់ដឹងពីហានិភ័យ តាមទូរទស្សន៍ ប្រព័ន្ធផ្សព្វផ្សាយសង្គមវិទ្យុសារតាមទូរស័ព្ទដៃ និងផ្ទាំងផ្តល់ព័ត៌មាន។
សូមបញ្ជាក់ថា តាំងពីឆ្នាំ១៩៩២ មក អាមេរិកបានចំណាយថវិកាអស់ជាង១,៥៤ ពាន់លានដុល្លារ នៅកម្ពុជា តាមរយៈទីភ្នាក់ងារជំនួយអាមេរិក USAID ។ ថវិកានេះ រួមមាន ៖ ប្រាក់ជាង ៣៧៧ លាន ដុល្លារ ជាជំនួយសម្រាប់ដោះស្រាយបញ្ហានៃការស្លាប់របស់ទារក ក្មេងអាយុក្រោម ៥ឆ្នាំ និងមរណភាពមាតា ជំងឺគ្រុនចាញ់ របេង អេដស៍ កង្វះអនាម័យ កង្វះអាហារូបត្ថម្ភ ភាពក្រិន និងដើម្បីលើកកម្ពស់សមត្ថភាពរបស់កម្ពុជា ក្នុងការធ្វើហិរញ្ញប្បទា និងគ្រប់គ្រងផ្នែកភស្តុភារ និងព័ត៌មានសម្រាប់ប្រព័ន្ធសុខា ភិបាលរបស់ខ្លួន៕
Full Story៖ សម្ដេចតេជោ ឲ្យបញ្ឈប់ការស្នើសុំ ចាក់វ៉ាក់សាំង AstraZeneca ដូសទី៣
ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានក្រសួងស្ថាប័ន្ធពាក់ព័ន្ធ ត្រូវបញ្ឈប់ជាបន្ទាន់ចំពោះការស្នើសុំចាក់វ៉ាក់សាំង AstraZeneca នូវដូសទី៣ ដោយហេតុថា វ៉ាក់សាំង Astra Zeneca មានតម្រូវការចាក់ដូសទី៣ សម្រាប់ឲ្យកម្លាំងជួរមុខដែលកំពុងពង្រាយនៅខ្សែបន្ទាត់ព្រំដែន កម្ពុជា-ថៃប៉ុណ្ណោះ ។
សម្ដេចតេជោ បានមានប្រសាសន៍បែបនេះ ក្រោយពីមានអ្នកមួយចំនួនចាក់វ៉ាក់សាំង AstraZeneca រួចហើយនោះ បានស្នើសុំចាក់វ៉ាក់សាំង AstraZeneca នូវដូសទី៣ទៀត។
តាមរយៈសារសំឡេង នារសៀលថ្ងៃទី៩ ខែសីហា ឆ្នាំ២០២១ សម្ដេចតេជោ បានបញ្ជាឲ្យបញ្ឈប់ការស្នើសុំជាបន្ដទៀតពីសំណាក់ស្ថាប័ន ឬអ្នកដែលចង់ស្នើសុំ។ សម្ដេចថា រហូតមកដល់ពេលនេះមិនទាន់សិក្សារវាងគម្លាត ដូសទី១ ឬដូសទី២ និងដូសទី៣ អំពីវ៉ាក់សាំង AstraZeneca នោះទេ។ សម្ដេច បន្ដ ថា ព្រោះបានសិក្សាតែពីរគម្លាតរបស់ ស៊ីណូហ្វាម និងស៊ីណូវ៉ាក់ តែប៉ុណ្ណោះ ដែលអាចផ្ដល់វ៉ាក់សាំង AstraZeneca សម្រាប់ការចាក់ដូសទី៣ ឬក៏ដូសជំរុញ ។
សម្ដេចតេជោ បញ្ជាក់ថា ចំពោះដូសទី៣ កម្ពុជាពុំមានវ៉ាក់សាំងគ្រប់គ្រាន់ដើម្បីដំណើរការចាក់នោះទេ គឺចាក់ជូនបានត្រឹមតែមន្ដ្រីជួរមុខដែលបានចាក់វ៉ាក់សាំង ស៊ីណូហ្វាម និងស៊ីណូវ៉ាក់ តែប៉ុណ្ណោះ ហើយចំនួននេះក៏មិនទាន់គ្រប់គ្រាន់នោះដែរ។ សម្ដេចបាននិងកំពុងបញ្ជាឲ្យ គណៈកម្មការចំពោះកិច្ចចាក់វ៉ាក់សាំង ធ្វើលទ្ធកម្មស្វះស្វែងរកនូវការទិញវ៉ាក់សាំង AstraZeneca ទៅចាក់ជូនប្រជាពលរដ្ឋដែលបានចាក់ AstraZeneca រួចមកហើយនេះ។
សម្ដេចតេជោ មានប្រសាសន៍ថា «សំណូមពរខ្លះទៀត អ្នកមិនទាន់ចាក់ដូសទី១ បែរជាឃើញ AstraZeneca បានមកដល់ បែរជាសុំចាក់ AstraZeneca ដោយមិនគិតដល់ការលំបាក់របស់រដ្ឋដែលកំពុងខ្វះវ៉ាក់សាំង។ ខ្ញុំសូមអំពាវនាវចំពោះ ឯកឧត្តម លោកជំទាវ លោកឧកញ៉ា លោកស្រី អស់លោក សម្រាប់ចាក់ដូសទី៣ គឺសុំឲ្យផ្អាកការដាក់សំណើស្នើសុំ គឺផ្អាកលុះត្រាតែមានសិក្សាម៉ត់ចត់អំពីគម្លាតរវាង ដូសទី១ ដូសទី២ និងដូសទី៣ ។ ហើយយើងវ៉ាក់សាំងទើបយើងអាចឈានទៅដល់ការចាក់ជូនអ្នកដែលបានចាក់ដូសទី១ ដូសទី២ នៃវ៉ាក់សាំង AstraZeneca សម្រាប់អ្នកដែលមិនទាន់បានចាក់ ហើយបែរជាមកស្នើសុំចាក់ AstraZeneca គឺមិនផ្ដល់ជូននោះទេ»។
សម្ដេចតេជោ មានប្រសាសន៍បន្ថែមថា «ដោយសារយើងមានតម្រូវការចាក់ដូសទី៣ សម្រាប់ឲ្យកម្លាំងជួរមុខរបស់យើង ដែលកំពុងពង្រាយទៅជូនចំពោះខេត្តចំនួន៧ កាលពីថ្ងៃអាទិត្យកន្លងទៅ និងកំពុងបែងចែកទៅបណ្ដាខេត្តដ៏ទៃទៀត បូកនឹងការបញ្ជូនទៅឲ្យកងទ័ព និងកម្លាំងនគរបាលនៅជាមួយ ចាក់ទាំងអតីតយុទ្ធជន និងអ្នកកីឡាចូលប្រកួតស៊ីហ្គេមមុននេះចាក់ស៊ីណូហ្វាម ឬស៊ីណូវ៉ាក់»។
សម្ដេចតេជោ បន្ថែមទៀតថា កម្ពុជាមិនមានលទ្ធភាពដើម្បីស្វែងរក AstraZeneca ចាក់ជូនចំពោះថ្នាក់នាំ ក្រសួងស្ថាប័នពាក់ព័ន្ធ តាមសំណើស្នើសុំនោះទេ។
សម្ដេចតេជោ សង្ឃឹមថា អ្នកចាក់ AstraZeneca ដូសទី១ ឬដូសទី៣ រួចរាល់ហើយនោះ ត្រូវរងចាំឲ្យមានការសិក្សា និងរងចាំឲ្យ AstraZeneca បានមកដល់លើកក្រោយ។ សម្ដេចថា AstraZeneca ដែលជាជំនួយរបស់អង់គ្លេសផុតសុពុលភាពនៅខែកញ្ញានេះ ព្រោះ AstraZeneca មានសុពុលភាពរយៈពេល៦ខែតែប៉ុណ្ណោះ ៕
វីរុសកូវីដ១៩ អាល់ហ្វា បន្តបំប្លែងខ្លួនថ្មីទៀត ទៅជាប្រភេទ E484K អាចទៅកាត់ផ្តាច់ ប្រព័ន្ធភាពសុំាមនុស្ស
ភ្នំពេញ៖ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានមានប្រសាសន៍ថា កម្ពុជា និងពិភពលោក កំពុងមានក្តីកង្វល់យ៉ាងខ្លាំង ពីវីរុសកូវីដ១៩ ឈ្មោះអាល់ហ្វា បានបន្តបំប្លែងខ្លួនថ្មីទៀត ទៅជាប្រភេទ E484K ដែលអាចឈានទៅកាត់ផ្តាច់ នូវប្រព័ន្ធភាពសុំារបស់មនុស្ស ។
លោកស្រី ឱ វណ្ណឌីន បានថ្លែងថា មកដល់ពេលនេះ គេសង្កេតឃើញ វីរុសកូវីដ១៩នេះ បានរាតត្បាតនៅលើសកលលោក ដែលប្រភេទអាល់ហ្វា ត្រូវបានគេរកឃើញបន្តទៀត នូវការបំប្លែងខ្លួនទៅជាប្រភេទ E484K ដែលធ្វើឲ្យពិភពលោក មានការព្រួយបារម្ភខ្លាំង ។
លោកស្រីថា “អ្នកវិទ្យាសាស្រ្តមានការសង្ស័យ ប្រភេទវីរុសនេះ អាចទៅកាត់ផ្តាច់ ឬធ្វើដំណើរឆ្លងកាត់បានទៅនឹង ប្រព័ន្ធភាពសុំារបស់មនុស្ស” ។
លោកស្រីបញ្ជាក់ទៀតថា ដោយសារវីរុសបំប្លែងថ្មីប្រភេទ E484K នេះ ទើបមានការអំពាវនាវ ឲ្យបណ្តាប្រទេសទាំងអស់ ខិតខំទប់ស្កាត់ ធ្វើយ៉ាងណាកុំឲ្យវីរុសប្រភេទ E484K ចរាចរណ៍ក្នុងលក្ខណៈទូលំ ទូលាយ នឹងធ្វើឲ្យវីរុសនេះ មានលទ្ធភាពក្នុងការបំប្លែងខ្លួនតទៅទៀត ខណៈពពួកអាល់ហ្វាបានចរាចរណ៍១៨២ប្រទេសនៅលើសកលលោក។
អ្នកនាំពាក្យក្រសួងសុខាភិបាលបន្តថា “វីរុសដែលបំប្លែងថ្មីនេះ យើងសង្កេតឃើញថាវាបានធ្វើឲ្យ មានការប៉ះពាល់ទៅ ដល់សួតយើងយ៉ាងធ្ងន់ធ្ងរ ។ នេះគឺជាការសង្កេតរបស់យើង ហើយអ្នកវិទ្យាសាស្ដ្រក៏ គេសង្កេតឃើញបែបនេះដែរ” ។
លោកស្រី ឱ វណ្ណឌីន ឲ្យដឹងបន្តទៀតថា វីរុសកូវីដ១៩ ប្រភេទបំប្លែងថ្មីនៅកម្ពុជា មានអាល់ហ្វា និងដែលតា ខណៈវីរុសកូវីដ១៩ បំប្លែងថ្មីទៀតប្រភេទ E484K ដែលជាវីរុសបំប្លែងខ្លួនពីអាល់ហ្វា មិនទាន់រកឃើញនៅកម្ពុជានោះទេ ប៉ុន្តែទាមទារឲ្យប្រជាពលរដ្ឋទាំងអស់ បង្កើនការប្រុងប្រយ័ត្ន៕
លោក គង់ គាំ យល់ស្របឲ្យលោក អ៊ូ ច័ន្ទរ័ត្ន គៀងគរអតីតមន្រ្តី CNRP បង្កើតបក្សផ្សេងទៀត មកជាធ្លុងមួយ ប្រកួតជាមួយបក្ស កាន់អំណាច
ភ្នំពេញ ៖ លោក គង់ គាំទីប្រឹក្សាគណបក្សឆន្ទៈខ្មែរ បានប្រកាសក្នុងបណ្តាញ សង្គមហ្វេសប៊ុកផ្ទាល់ខ្លួន នាថ្ងៃ១០ សីហា ដោយយល់ស្រប ផ្តល់តួនាទីឲ្យលោក អ៊ូ ច័ន្ទរ័្នត ក្នុងនាមជាស្ថាបនិក គណបក្សកែទម្រង់កម្ពុជា ដើម្បីប្រមូលគៀងគរ អតីតមន្រ្តី នៃអតីតគណបក្សសង្រ្គោះជាតិ (CNRP) ដែលបានទៅបង្កើតបក្សផ្សេងទៀត មកជាធ្លុងមួយ ដើម្បីប្រកួតប្រជែង ជាមួយគណបក្សប្រជាជនកម្ពុជា នាពេលបោះឆ្នោតខាងមុខ ។
លោក គង់ គាំ បានថ្លែងក្នុងបណ្តាញ សង្គមហ្វេសប៊ុក នាថ្ងៃ១០ សីហា ថា ការរួបរួមអ្នកប្រជាធិបតេយ្យ មិនអាចគ្រាន់ តែជាវោហាស័ព្ទ នយោបាយនោះឡើយ តែត្រូវប្រែក្លាយទ្រឹស្តី ឲ្យទៅជាសកម្មភាព និង លទ្ធផលជាក់ស្តែង។
លោកថា លោក អ៊ូ ច័ន្ទរ័ត្ន ជាសហស្ថាបនិកម្នាក់ របស់គណបក្សកែទម្រង់កម្ពុជា បង្កើតថ្មីដូចគណបក្ស នយោបាយថ្មីៗដទៃដែរ ដែលមានចេតនា បង្រួបបង្រួម អ្នកនយោបាយអតីត CNRP ដែលបានបង្កើត គណបក្សនយោបាយថ្មីៗ ឲ្យចូលរួមជាធ្លុងមួយ ក្នុងការប្រកួតប្រជែង ជាមួយគណបក្សប្រជាជនកម្ពុជា នាពេលបោះឆ្នោតខាងមុង គឺជាចេតនាល្អ ។
លោកបញ្ជាក់ថា “ដើម្បីអាចសំរេចការជួបពិភាក្សាគ្នា ជាក់ស្តែង គណបក្សឆន្ទៈខ្មែរ យល់ស្របជូនតួនាទី ដល់គណបក្សកែទម្រង់កម្ពុជា ជាអ្នកសម្របសម្រួល អញ្ជើញថ្នាក់ដឹកនាំ និងអ្នកនយោបាយបង្កើត គណបក្សនយោបាយថ្មីៗ (ដែលព្រមព្រៀង) ហើយកំណត់ពេលវេលា និងទីកន្លែងសមស្រប តាមឱកាសដែលអនុគ្រោះ” ។
លោក អ៊ូ ច័ន្ទរ័ត្ន បានប្រាប់មជ្ឈមណ្ឌលព័ត៌មានដើមអម្ពិល នាថ្ងៃ១០ សីហាថា គម្រោង នៃការរួបរួមអ្នកប្រជាធិបតេយ្យ លោកបានរៀបចំទុក ជាយូរមកហើយ ដោយរង់ចាំឲ្យក្រសួងមហាផ្ទៃ ប្រកាសសុពលភាពបក្ស ជាផ្លូវការប៉ុណ្ណោះ នឹងចាប់ផ្តើមធ្វើសកម្មភាព ប្រមែលប្រមូលហើយ ដោយនឹងរិះរកវិធីសម្របសម្រួល ដោយរបៀបណា ដើម្បីឲ្យពួកគេយល់ព្រម ។
លោកបន្តថា “ដោយអាចអញ្ជើញអស់លោកអ្នក នយោបាយនៅក្នុង អតីតគណបក្សប្រឆាំងក្តី ជាមួយអ្នកដែលមិនធ្លាប់ ប្រឆាំងក្តី ក៏អាចជជែកគ្នា ក្នុងស្មារតីបង្រួបបង្រួម” ៕
យុទ្ធនាការបិទខ្ទប់ខេត្តជាប់ព្រំដែន និងយុទ្ធនាការថ្នាក់ជាតិ ១៤ថ្ងៃកន្លងទៅជួយគ្រប់គ្រងមួយកម្រិត នូវការឆ្លងរាលដាលទ្រង់ ទ្រាយធំក្នុងសហគមន៍
ភ្នំពេញ ៖ រាជរដ្ឋាភិបាលកម្ពុជា បានឲ្យដឹងថា ការអនុវត្តវិធានការបិទខ្ទប់បណ្តាខេត្តជាប់ព្រំដែន កម្ពុជា-ថៃ និងសៀមរាប និងយុទ្ធនាការថ្នាក់ជាតិ រយៈពេល ១៤ថ្ងៃ កន្លងមកនេះ បានជួយដល់ការគ្រប់គ្រង និងពន្យារពេលបានមួយកម្រិត នូវការឆ្លងរាលដាលទ្រង់ទ្រាយធំ ក្នុងសហគមន៍នៃមេរោគ កូវីដ-១៩ ប្រភេទ ដែលតា (Delta)។
សូមជម្រាបជូនថា កន្លងមកនេះ ដើម្បីធានាបានប្រសិទ្ធភាពនៃការអនុវត្តវិធានការប្រយុទ្ធ និងទប់ស្កាត់ការឆ្លងរាលដាល នៃជំងឺកូវីដ-១៩ ជាពិសេស ក្នុងបរិបទដែលកម្ពុជាកំពុងប្រឈមនឹងការមកដល់នៃរលកទី៣ នៃការឆ្លងរាលដាល ទ្រង់ទ្រាយធំនៃជំងឺកូវីដ-១៩ ដែលបណ្តាលមកពីមេរោគបំប្លែងខ្លួនថ្មី ប្រភេទដែលតា (Delta) រាជរដ្ឋាភិបាលកម្ពុជា បានសម្រេចដាក់ចេញនូវ «យុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩» នៅទូទាំងប្រទេស និងវិធានការបិទខ្ទប់បណ្តាខេត្តជាប់ព្រំដែន កម្ពុជា-ថៃ និងខេត្តសៀមរាប សម្រាប់រយៈពេល ១៤ ថ្ងៃ គិតចាប់ថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១ ដោយបានដាក់ចេញនូវវិធានការចាំបាច់ មួយចំនួន ដែលត្រូវអនុវត្តជាបន្ទាន់ក្នុងយុទ្ធនាការនេះសំដៅការពារសុខភាព និងអាយុជីវិតរបស់ប្រជាពលរដ្ឋ។
យោងតាមសេចក្ដីណែនាំស្ដីពី «ការបន្ដអនុវត្តយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ -១៩ នាថ្ងៃទី១១ ខែសីហា ឆ្នាំ២០២១ រាជរដ្ឋាភិបាល បានបញ្ជាក់ថា «ជារួម ការអនុវត្តវិធានការបិទខ្ទប់បណ្តាខេត្តជាប់ ព្រំដែន និងខេត្តសៀមរាប និងយុទ្ធនាការថ្នាក់ជាតិ រយៈពេល ១៤ ថ្ងៃ កន្លងមកនេះ បានជួយដល់ការគ្រប់គ្រង និងការពន្យារពេលបានមួយកម្រិតនូវការឆ្លង រាលដាលទ្រង់ទ្រាយធំក្នុងសហគមន៍នៃមេរោគកូវីដ-១៩ ប្រភេទដែលតា (Delta)។ ជាក់ស្ដែង អត្រានៃការ ឆ្លងរាលដាលនៃជំងឺកូវីដ-១៩ ប្រចាំថ្ងៃមានលក្ខណៈថេរ បើទោះជាមេរោគបំប្លែងខ្លួនថ្មី ប្រភេទដែលតា (Delta) បានធ្លាយចូលក្នុងសហគមន៍ ហើយបច្ចុប្បន្ន បានរីករាលដាលរហូតទៅដល់ ១៧ រាជធានី-ខេត្ត ក្តី»។
រាជរដ្ឋាភិបាល បានបន្ដថា ក្នុងគោលបំណងបង្កើនប្រសិទ្ធភាព ក្នុងការបន្តគ្រប់គ្រងហានិភ័យនៃការឆ្លងរាលដាលទ្រង់ទ្រាយធំក្នុងសហគមន៍នៃមេរោគកូវីដ-១៩ ប្រភេទដែលតា (Delta) ជាពិសេស ក្រោយវិធានការបិទខ្ទប់បណ្តាខេត្តជាប់ ព្រំដែនកម្ពុជា-ថៃ និងខេត្តសៀមរាប ត្រូវបញ្ចប់តាមកាលកំណត់ នាថ្ងៃទី១២ ខែសីហា ឆ្នាំ២០២១ រាជរដ្ឋាភិបាល សម្រេចបន្តការអនុវត្ត “យុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩- នៅទូទាំងប្រទេស សម្រាប់រយៈពេល ៧ ថ្ងៃបន្ថែមទៀត រហូតដល់ថ្ងៃទី១៩ ខែសីហា ឆ្នាំ២០២១ ខាងមុខ។
រាជរដ្ឋាភិបាល ក៏បានណែនាំអភិបាលរាជធានី-ខេត្ត នៅទូទាំងប្រទេស ត្រូវបន្តប្រកាន់ខ្ជាប់នូវអភិក្រមម៉ឺងម៉ាត់ប្រកបដោយស្មារតីបុរេសកម្ម និងការទទួលខុសត្រូវខ្ពស់ក្នុងការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩ ហើយក្នុងអំឡុងពេលនៃការបន្តការអនុវត្តយុទ្ធនាការរយៈពេល ៧ថ្ងៃបន្ថែមទៀតនេះ ត្រូវបន្តដាក់ចេញ និងជំរុញអនុវត្តវិធានការរឹតត្បិតចាំបាច់ទាំងឡាយឲ្យកាន់តែមានប្រសិទ្ធភាព និងឲ្យបានព្រមៗគ្នា នៅទូទាំងប្រទេស៕
អាជ្ញាធររាជធានីភ្នំពេញ ដាក់ចេញ វិធានការរដ្ឋបាល រយៈពេល ៧ថ្ងៃបន្ថែមទៀត
ភ្នំពេញ៖ រដ្ឋបាលរាជធានីភ្នំពេញនៅថ្ងៃទី១១ ខែ សីហានេះបានដាក់ចេញ សេចក្ដីសម្រេច ស្តីពីការដាក់ចេញនូវវិធានការរដ្ឋបាល រយៈពេល៧ថ្ងៃបន្ថែមទៀត ដោយផ្អាកជាបណ្តោះអាសន្ន ចំពោះសកម្មភាពការងារ មុខរបរអាជីវកម្មដែល មានហានិភ័យខ្ពស់ នៃការឆ្លងរាលដាលជំងឺកូវីដ-១៩ ការជួបជុំ ឬការប្រមូលផ្តុំ មនុស្ស ជាលក្ខណៈឯកជន និងបម្រាមគោចរ នៅក្នុងភូមិសាស្រ្តរាជធានីភ្នំពេញ ដើម្បីប្រយុទ្ធ និងទប់ស្កាត់ ការឆ្លងរាលដាលនៃជំងឺកូវីដ-១៩។
លោក មុត ចន្ថា ៖ លោក អ៊ូ ច័ន្ទរ័ត្ន ជាឈ្មួញកណ្តាល នយោបាយដែលមិនអាចរួបរួមបក្សផ្សេង មកជាធ្លុងមួយបានឡើយ
ភ្នំពេញ ៖ មនុស្សជំនិតរបស់លោក កឹម សុខា គឺលោក មុត ចន្ថា បានបង្ហាញជំនឿចិត្តយ៉ាងមុតមាំថា លោក អ៊ូ ច័ន្ទរ័ត្ន មិនអាចប្រកូកប្រកាសបក្សផ្សេងដែលចេញពីអតីតគណបក្សសង្រ្គោះជាតិហើយទៅបង្កើតបក្សថ្មីនោះ មករួបរួមគ្នាជាធ្លុងមួយបានឡើយ ។
ក្រៅពីការមិនជឿជាក់ហើយ លោក មុត ចន្ថាបានឌឺដងផ្លែផ្កាទៀតថា លោក អ៊ូ ច័ន្ទរ័ត្ន ក៏ជាឈ្មួញកណ្តាលនយោបាយ ឬថៅកែគក់ជេខាងដើរបង្កើតបក្សនយោបាយផងដែរ ។
ការរួបរួមមិនអាចធ្វើទៅបានដោយសារកត្តាមួយចំនួន ៖ គ្មានឆន្ទៈពិតប្រាកដ , គ្មានគោលបំណងសុចរិត , ចង់ធ្វើធំក្នុងបក្សរៀងៗខ្លួន , បើមានឆន្ទៈរួបរួមម្លេះបក្សតូចៗមិនកើតឡើងទេ ។ នេះជាការលើកឡើងរបស់លោក មុត ចន្ថា តាមរយៈបណ្តាញសង្គមហ្វេសប៊ុកផ្ទាល់ខ្លួននាថ្ងៃ១១ សីហា ។
លោក មុត ចន្ថាបន្តថា “លោក អ៊ូ ចន្ទរ័ត្ន អះអាងថា រួបរួមកម្លាំងអតីតគណបក្សសង្រ្គោះជាតិ ដើម្បីយកឈ្នះគណបក្សកាន់អំណាច។ ខ្ញុំថា កុំទាន់អាលអួតរឿងនេះអី ខណៈដែលខ្លួនគ្មានសមត្ថភាពអាចបង្រួបបង្រួមអ្វីបាន ហើយដែលត្រូវបានគេចោទថា ជាឈ្មួញកណ្តាលនយោបាយ ឬថៅកែគក់ជេខាងដើរបង្កើតបក្សនយោបាយ” ។
លោកលើកជាសំណួរថា តើគួរជូនពរបក្សកម្ទេចដែកទាំងនេះទេ? លោកថា ទោះអុជធូកបួងសួងដល់ព្រះឥន្ទ ព្រះព្រហ្មក៏ទៅមិនរួច គឺចាញ់។ បើស្ថិតក្នុងទម្រង់ និងស្ថានភាពដូចចាប់ក្តាមដាក់ចង្អេរបែបនេះ ។
លោកបន្តថា ដូច្នេះ ពេលលទ្ធផលបោះឆ្នោតនៅពេលខាងមុខចេញ កុំនឹករកលេសដាក់កំហុសលើគណៈកម្មាធិការជាតិរៀបចំការបោះឆ្នោត (គ.ជ.ប)ថា រៀបចំការបោះឆ្នោត មិនសេរី និងមិនយុត្តិធម៌ មិនឯករាជ្យ ហើយក៏កុំចោទបក្សកាន់អំណាច លួចបន្លំ ឬទិញសន្លឹកឆ្នោត ។
ការលើកឡើងរបស់លោក មុត ចន្ថា ក្រោយលោកបានឃើញលោក គង់ គាំ ដែលចេញពីអតីតគណបក្សសង្រ្គោះជាតិ (CNRP) ហើយកូនប្រុស គឺលោក គង់ ម៉ូនីកា ទៅបង្កើតបក្សឆន្ទៈខ្មែរ បានយល់ស្របផ្តល់តួនាទីឲ្យ លោក អ៊ូ ច័ន្ទរ័ត្ន ក្នុងនាមជាស្ថាបនិក គណបក្សកែទម្រង់កម្ពុជា ប្រមូលគៀងគរ អតីតមន្រ្តី នៃអតីតCNRPបានទៅបង្កើតបក្សផ្សេងទៀត មកជាធ្លុងមួយ ដើម្បីប្រកួតប្រជែង ជាមួយគណបក្សប្រជាជនកម្ពុជា នាពេលបោះឆ្នោតខាងមុខ ។ ក្នុងពេលលោក គង់ គាំ គាំទ្របែបនេះ លោក អ៊ូ ច័ន្ទរ័ត្ន បានថ្លែងអំណរគុណ និងស្វាគមន៍។
សូមបញ្ជាក់ថា រហូតមកទល់ពេលនេះមន្រ្តីនៃអតីត CNRP ចំនួន២៤នាក់បានទទួលសិទ្ធិធ្វើនយោបាយឡើងវិញ ហើយក៏បានចេញមកបង្កើតគណបក្សចំនួន៧ផងដែរ។ បក្សទាំង៧នោះរួមមាន ៖ ១-គណបក្សឆន្ទៈខ្មែរ (លោក គង់ មូនីកា និងលោកគង់ គាំ)។ ២-គណបក្សខ្មែរអភរិក្ស (លោក រៀល ខេមរិន្ទ) ៣-គណបក្សខ្មែរស្រឡាញ់ជាតិ (លោកជីវ កត្តា) ៤-គណបក្សកំណែទម្រង់កម្ពុជា (លោក ប៉ុល ហំម និងអ៊ូ ច័ន្ទរ័ត្ន ) ៥-គណបក្សបេះដូងជាតិ (ប្រភពអះអាងថាលោក ថាច់ សេដ្ឋា) ៦-គណបក្សកម្ពុជានិយម «ប.ក» (លោក យ៉ែម បុញ្ញឬទ្ធិ) និងគណបក្សសំឡេង សហគមន៍កម្ពុជា (លោក សា លីម) ៕
កម្ពុជា ស្នើជប៉ុនបន្ដផ្ដល់ ជំនួយវ៉ាក់សាំង Astra Zeneca និងជួយសម្របដល់ការ បញ្ជាទិញវ៉ាក់សាំងបន្ថែម
ភ្នំពេញ ៖ លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានស្នើដល់រដ្ឋាភិបាលជប៉ុន បន្ដផ្តល់ជំនួយវ៉ាក់សាំង Astra Zeneca ក៏ដូចជា គាំទ្រ និងសម្របសម្រួលឲ្យកម្ពុជា អាចបញ្ជាទិញវ៉ាក់សាំង Astra Zeneca បន្ថែមទៀត។
ក្នុងជំនួបពិភាក្សាការងារ ជាមួយលោក Masahiro MIKAMI ឯកអគ្គរាជទូតជប៉ុន ប្រចាំកម្ពុជា នាថ្ងៃទី១១ ខែសីហា ឆ្នាំ២០២១ តាមប្រព័ន្ធ Video Conference លោក អូន ព័ន្ធមុនីរ័ត្ន បានថ្លែងអំណរគុណចំពោះរដ្ឋាភិបាលជប៉ុន តែងតែជួយគាំទ្រទាំងសម្ភារៈ បច្ចេកទេស និងហិរញ្ញវត្ថុ ដល់ការអភិវឌ្ឍកម្ពុជា ។ ជាក់ស្តែង ស្ថិតក្នុងកាលៈទេសៈនៃវិបត្តិសកល ដែលយ៉ាយីដោយសារវីរុសកូវីដ-១៩ នេះ រដ្ឋាភិបាលជប៉ុន បានផ្តល់ជំនួយជាវ៉ាក់សាំង Astra Zeneca សរុបចំនួន ១លានដូស ជូនដល់រាជរដ្ឋាភិបាល និងប្រជាជនកម្ពុជា ដែលនេះជាកាយវិការសប្បុរសធម៌ និងសន្តានចិត្តដ៏ប្រពៃពីភាគីមិត្ត ។
លោកបានបញ្ជាក់ថា «ស្នើសុំដល់រដ្ឋាភិបាលជប៉ុន តាមរយៈឯកអគ្គរាជទូតជប៉ុន ប្រចាំកម្ពុជា ក្នុងការបន្តផ្តល់នូវជំនួយវ៉ាក់សាំង Astra Zeneca ក៏ដូចជា គាំទ្រ និងសម្របសម្រួលឲ្យកម្ពុជាអាចបញ្ជាទិញវ៉ាក់សាំង Astra Zeneca បានបន្ថែមទៀតផងដែរ»។
ជាងនេះទៅទៀត លោកក៏បានថ្លែងអំណរគុណចំពោះកិច្ចខិតខំប្រឹងប្រែងរបស់រដ្ឋាភិបាលជប៉ុន និងប្រជាជនជប៉ុនដែល តែងតែយកចិត្តទុកដាក់ និងផ្តល់នូវកិច្ចសហប្រតិបត្តិការអភិវឌ្ឍដល់កម្ពុជា លើស្ទើរគ្រប់វិស័យ និងចំទិសដៅ ដែលសកម្មភាពទាំងនេះបានឆ្លុះបញ្ចាំង អំពីតួនាទីប្រទេសជប៉ុនជា «ដៃគូអភិវឌ្ឍន៍ជាយុទ្ធសាស្រ្ត» ដ៏សំខាន់ចូលរួមចំណែកជាមួយរាជរដ្ឋាភិបាលកម្ពុជា ក្នុងកិច្ចខិតខំប្រឹងប្រែងជំរុញការអភិវឌ្ឍកម្ពុជា។
ឆ្លៀតឱកាសនោះដែរ រដ្ឋមន្ដ្រីក្រសួងសេដ្ឋកិច្ច និងឯកអគ្គរាជទូតជប៉ុន បានពិភាក្សាលើយន្តការស្តារ និង ការអភិវឌ្ឍលើវិស័យនានា ក្រោយពីស្ថានភាព នៃជំងឺកូវីដ-១៩ ត្រូវបានថមថយ ជាពិសេសការស្តារ និងការជំរុញលើការ វិនិយោគនៅកម្ពុជា ។ មួយវិញទៀត កម្ពុជា បានស្វាគមន៍នូវការ ពិចារណាលើផែនការ ផ្តល់ឥណទានសម្បទាន (ដំណាក់កាលទី ២) សម្រាប់កម្មវិធីគាំទ្រ បន្ទាន់ ដើម្បីឆ្លើយតបទៅនឹង វិបត្តិនៃការរីករាលដាល នៃជំងឺកូវីដ-១៩ ដល់កម្ពុជា ដើម្បីគាំទ្រការអនុវត្តវិធានការ ស្តារសេដ្ឋកិច្ច ក៏ដូចជា វិធានការត្រួតពិនិត្យ ការប្រយុទ្ធប្រឆាំងនឹងជំងឺកូវីដ-១៩ ៕
សម្ដេចតេជោ ទិញឧទ្ធម្ភាគចក្រ Mi-17 ចំនួន៣គ្រឿង ឲ្យកងយោធពលខេមរភូមិន្ទ
ភ្នំពេញ ៖ អគ្គមេបញ្ជាការ នៃកងយោធពលខេមរភូមិន្ទ នាយឧត្ដមសេនីយ៍ វង្ស ពិសេន នាថ្ងៃទី១២ សីហា បានចុះទៅត្រួតពិនិត្យឧទ្ធម្ភាគចក្រ Mi-17 ចំនួន៣គ្រឿង ដែលសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ទើបតែបានទិញឲ្យ ដើម្បីបំពាក់ជូនដល់កងយោធពលខេមរភូមិន្ទ។ នេះយោងតាមគេហទំព័រហ្វេសប៊ុករបស់ អគ្គបញ្ជាការដ្ឋាន នៃកងយោធពលខេមរភូមិន្ទ។
នាឱកាសនោះ នាយឧត្ដមសេនីយ៍ វង្ស ពិសេន បានណែនាំនាយទាហាន នៅទ័ពអាកាស ឲ្យយកចិត្តទុកដាក់ ក្នុងការប្រើប្រាស់ និងថែទាំឲ្យបានល្អ ត្រឹមត្រូវតាមបច្ចេកទេស ។ នាយឧត្ដមសេនីយ៍ ក៏បានថ្លែងអំណរគុណ ចំពោះ សម្ដេចតេជោ ដែលបានបំពាក់ឧទ្ធម្ភាគចក្រ ជូនដល់កងយោធពលខេមរភូមិន្ទ ដើម្បីបម្រើក្នុងកិច្ចប្រតិបត្តិការ បានលឿនទាន់ពេលវេលា ៕
នាឱកាសនោះ នាយឧត្ដមសេនីយ៍ វង្ស ពិសេន បានណែនាំនាយទាហាន នៅទ័ពអាកាស ឲ្យយកចិត្តទុកដាក់ ក្នុងការប្រើប្រាស់ និងថែទាំឲ្យបានល្អ ត្រឹមត្រូវតាមបច្ចេកទេស ។ នាយឧត្ដមសេនីយ៍ ក៏បានថ្លែងអំណរគុណ ចំពោះ សម្ដេចតេជោ ដែលបានបំពាក់ឧទ្ធម្ភាគចក្រ ជូនដល់កងយោធពលខេមរភូមិន្ទ ដើម្បីបម្រើក្នុងកិច្ចប្រតិបត្តិការ បានលឿនទាន់ពេលវេលា ៕
WHO ប្រចាំកម្ពុជា ៖ ការចាក់វ៉ាក់សាំងជំងឺកូវីដ-១៩ ជាយុទ្ធសាស្ដ្រដ៏ខ្លាំង តែមិនមែនជាដំណោះស្រាយ វេទមន្ដ បញ្ចប់ជំងឺនេះទេ
ភ្នំពេញ ៖ លោកស្រី Li Ailan តំណាងអង្គការសុខភាពពិភពលោក (WHO) ប្រចាំកម្ពុជា បានឲ្យដឹងថា ការចាក់វ៉ាក់សាំងបង្ការជំងឺកូវីដ-១៩ គឺជាយុទ្ធសាស្ត្រដ៏ខ្លាំងមួយ ប៉ុន្តែវាមិនមែនជាដំណោះស្រាយវេទមន្ត ដើម្បីបញ្ចប់ជំងឺរាតត្បាតកូវីដ-១៩នោះទេ ដូច្នេះ ប្រជាពលរដ្ឋគ្រប់រូបត្រូវបន្ដអនុវត្តវិធានការសុខាភិបាលឲ្យជាប់ជានិច្ច។
យោងតាមសេចក្ដីប្រកាសព័ត៌មានរបស់អង្គការ WHO ប្រចាំកម្ពុជា នាពេលថ្មីៗនេះ លោកស្រី Li Ailan បានថ្លែងថា «សុទិដ្ឋិនិយមចំពោះវ៉ាក់សាំង អាចបង្កគ្រោះថ្នាក់។ កាលដែលបានចាក់វ៉ាក់សាំងរួចហើយ មិនមានន័យថា អ្នកគួរតែឈប់អនុវត្តវិធានការបង្ការផ្សេងទៀត ដូចជា ការពាក់ម៉ាស់នៅទីសាធារណៈ ការរក្សាគម្លាតសុវត្ថិភាព និងចៀសវាងការជួបជុំ ឬប្រមូលផ្ដុំមនុស្សជាដើមនោះទេ»។
លោកស្រីបន្ដថា ការចាក់វ៉ាក់សាំងតែមួយមុខ មិនមែនជាដំណោះស្រាយវេទមន្តនោះទេ វាគ្រាន់តែជាឧបករណ៍មួយក្នុង ចំណោមឧបករណ៍ដ៏សំខាន់ជាច្រើននៅក្នុងការប្រយុទ្ធនឹងជំងឺកូវីដ-១៩ ដោយវាជួយកាត់បន្ថយ មិនឲ្យឈឺធ្ងន់ធ្ងរ ជួយកាត់បន្ថយការចូលសម្រាកនៅមន្ទីរពេទ្យ និងកាត់បន្ថយការស្លាប់។
លោកស្រីបានបញ្ជាក់ថា «យើងអាចទប់ស្កាត់ការចម្លងជំងឺកូវីដ-១៩បាន លុះត្រាតែយើងបន្តអនុវត្តអន្តរាគមន៍សុខភាពសាធារណៈ មិនមែនឱសថចំគោលដៅបានយ៉ាងតឹងរឹង និងប្រកបដោយប្រសិទ្ធភាព គួបផ្សំនឹងការ ចាក់វ៉ាក់សាំងការពារជំងឺកូវីដ-១៩ផងដែរ។ រឿងសំខាន់នោះ គឺការអនុវត្តនូវវិធានការទាំងនេះ នឹង អនុញ្ញាតឲ្យបណ្តាអាជីវកម្ម និងវិស័យផ្សេងៗទៀត អាចបើកដំណើរការឡើងវិញ ហើយ ប្រជាពលរដ្ឋអាចប្រកបរបរចិញ្ចឹមជីវិតរបស់ពួកគាត់ឡើងវិញប្រកបដោយសុវត្ថិភាព»។
តំណាងអង្គការ WHO ប្រចាំកម្ពុជា ក៏បានលើកឡើងទៀតថា ចំពោះកិច្ចខិតខំប្រឹងប្រែងយ៉ាងសកម្មរបស់រាជរដ្ឋាភិបាល រួមទាំងក្រសួងសុខាភិបាល កន្លងមកបាន ធានានូវការមកដល់នូវវ៉ាក់សាំងការពារជំងឺកូវីដ-១៩ កាន់តែច្រើន ធានាថា ពលរដ្ឋបានចាក់វ៉ាក់ សាំង និងធានាឲ្យមានការគ្របដណ្តប់នៃការចាក់វ៉ាក់សាំងគ្រប់គ្រាន់នៅកម្ពុជា ជាពិសេស ក្នុងចំណោមប្រជាជនដែលងាយរងគ្រោះ ក្នុងចំណោមក្រុមមនុស្សដែលមានហានិភ័យខ្ពស់ និងដែលរស់នៅតំបន់ដាច់ស្រយាល។
យោងតាមរបាយការណ៍របស់ ក្រសួងសុខាភិបាល បានឲ្យដឹងថា គិតត្រឹថ្ងៃទី១២ ខែសីហាឆ្នាំ២០២១ ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងការពារកូវីដ១៩ ជូនមន្រ្តីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេស ចំនួន ៨,៦៣៩,៧៧៣នាក់៕
