ពោធិសាត់ ៖ នៅថ្ងៃទី ១៣ ខែ វិច្ឆិកា ឆ្នាំ ២០២១នេះ សមត្ថកិច្ចនគរបាលផែនព្រហ្មទណ្ឌ សហការកម្លាំង នគរបាលស្រុកភ្នំក្រវាញ ស្រុកវាលវែង បានធ្វើការស្រាវជ្រាវ យ៉ាងយកចិត្តទុកដាក់ និងឈានដល់ការចាប់ខ្លួន បានឃាតកដែលបានកាប់សម្លាប់ មន្ត្រីរដ្ឋបាលព្រៃឈើម្នាក់ ឈ្មោះសេង វិសាល ភេទប្រុស អាយុ ៥២ ឆ្នាំកាលពីយប់ថ្ងៃទី ០៩ ខែ វិច្ឆកា ឆ្នាំ ២០២១ បណ្តាលអោយស្លាប់បាត់បង់ជីវិត នៅក្នុងទីស្នាក់ការ របស់រដ្ឋបាលព្រៃឈើនោះ គឺសមត្ថកិច្ចឈានដល់ការចាប់ខ្លួនបានហើយកាលពីព្រឹកថ្ងៃទី ១៣ ខែ វិច្ឆិកា ឆ្នាំ ២០២១នេះស្ថិតនៅក្នុងភូមិសាស្ត្រស្រុកភ្នំក្រវាញ ។
បើតាមសមត្ថកិច្ចបានអោយដឹងថា ឃាតកដែលសមត្ថកិច្ច នគរបាលខេត្តពោធិសាត់ ចាប់ខ្លួនបាននោះមានឈ្មោះរឿន រ៉ូ ភេទប្រុសអាយុ ១៥ ឆ្នាំ រស់នៅក្នុងភូមិស្ទឹងតូច សង្កាត់រលាប ក្រុងពោធិសាត់ ខេត្តពោធិសាត់ មុខរបរជាឈ្នួលបំរើ របស់ជនរងគ្រោះ ។
គួររំលឹកថា នៅយប់ថ្ងៃទី ០៩ ខែ វិច្ឆិកា ឆ្នាំ ២០២១ ជនរងគ្រោះឈ្មោះសេង វិសាល ភេទប្រុស អាយុ ៥២ឆ្នាំមុខងារជាមន្ត្រីរដ្ឋបាលព្រៃឈើ ស្រុកវាលវែង ត្រូវបានឃាតកឈ្មោះ រឿន រ៉ូ ជាកូនឈ្នួលយកកាំបិតកាប់ ទៅលើជនរងគ្រោះចំនួន៧កាំបិត បណ្តាលអោយ ស្លាប់បាត់បង់ជីវិត នៅលើគ្រែ ក្នុងបន្ទប់ស្នាក់ការ រដ្ឋបាលព្រៃឈើ ហើយក្រោយធ្វើសកម្មភាព រួចឃាតករូបនោះក៍បានប្លន់ យកសម្ភារះ មួយចំនួន គឺចិញ្ចៀនពេជ្រ ១ វង់ ទូរស័ព្ទដៃម៉ាកអាយហ្វូន ៣ គ្រឿង និង ម៉ូតូ ១ គ្រឿងជិះគេចខ្លួន បាត់ស្រម៉ោល ពីកន្លែងកើតហេតុតែម្តង ។
បច្ចុប្បន្ន ជនសង្ស័យសមត្ថកិច្ច កំពុងកសាង សំណុំរឿងចាត់ការ ទៅតាមផ្លូវច្បាប់៕
