ភ្នំពេញ ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានគាំទ្រចំពោះផែនការវិនិយោគវារីវប្បកម្ម សមុទ្រ របស់ក្រុមហ៊ុន ជីន យូ តាំង(ខេមបូឌា) ហ្វីសឺរី ឯ.ក ដែលការវិនិយោគនេះ គឺពិតជាសំខាន់សំរាប់ជួយ ដល់ការអភិវឌ្ឍន៍ វិស័យជលផលនៅប្រទេសកម្ពុជា ។
តាមរយៈគេហទំព័រហ្វេសប៊ុកផ្ទាល់ខ្លួនលោក វេង សាខុន បានថ្លែងថា ផែនការវិនិយោគវារីវប្បកម្មសមុទ្ររបស់ក្រុម ជីន យូ តាំង ពិតជាសំខាន់សំរាប់ជួយ ដល់ការអភិវឌ្ឍវិស័យជលផល ប្រទេសកម្ពុជា ជាពិសេសបានចូលរួមបង្កើត ការងារជូនប្រជាពលរដ្ឋ បង្កើនទាំងផលត្រីសមុទ្រធម្មជាតិ និង ផលត្រីចញ្ចឹម សំរាប់ផ្គត់ផ្គង់ក្នុងស្រុក ។
លោករដ្ឋមន្ត្រី បានណែនាំឱ្យក្រុមហ៊ុនដែលវិនិយោគ ត្រូវបញ្ជូនឯកសារវាយតម្លៃលើផល ប៉ះពាល់បរិស្ថាន និងសង្គមលើគម្រោង វិនិយោគវារីវប្បកម្មសមុទ្រនេះ មកក្រសួង និងជាពិសេសត្រូវធ្វើការស្នើសុំ និងមានការអនុម័ត ពីក្រុមប្រឹក្សាអភិវឌ្ឍន៍កម្ពុជា ជាមុនសិន ទើបក្រសួងកសិកម្ម រុក្ខាប្រមាញ់ និងនេសាទ អាចចុះកិច្ចព្រមព្រៀង លើការអនុវត្ដគម្រោង នេះជាមួយក្រុមហ៊ុន ។
តំណាងក្រុមហ៊ុន ជីន យូ តាំង(ខេមបូឌា) ហ្វីសឺរី ឯ.ក បានឱ្យដឹងថា ក្រុមហ៊ុនបានវិនិយោគវារីវប្បកម្ម តាមបែបចិញ្ចឹមត្រីសមុទ្រក្នុងបែ នៅជិត តំបន់កោះដែកគោល និងកោះថាស ដែលដំណាក់កាលទី១ នៃផែនការវិនិយោគ លើផ្ទៃទឹកសមុទ្រចំនួន ១ ៩៨៤ហិកតា។ បន្ទាប់ពីបានចុះហត្ថលេខាលើអនុស្សារណៈ នៃការយោគយល់រវាងក្រសួង និង ក្រុមហ៊ុនកាលពីថ្ងៃទី៣១ ខែមករា ឆ្នាំ២០១៧ និងទទួលបានការណែនាំពីរដ្ឋមន្ត្រី និងមន្ត្រីជំនាញ កន្លងមកក្រុមហ៊ុន បានធ្វើការពិនិត្យ សិក្សានិងពិភាក្សាជា មួយក្រសួងពាក់ព័ន្ធ ជាពិសេសលើការសិក្សា វាយតម្លៃលើផលប៉ះពាល់ បរិស្ថាន និងសង្គម ទទួលបានលទ្ធផលយ៉ាងល្អប្រសើរ ដោយក្រសួងពាក់ព័ន្ធបានសម្រេច កំណត់យកតំបន់កោះថាស ជាតំបន់សាកសម និងមានសក្ដានុពលបំផុត សំរាប់ក្រុមហ៊ុនធ្វើការវិនិយោគ ៕
