ភ្នំពេញ៖ ខណៈជំងឺកូវីដ១៩បំប្លែងថ្មី ប្រភេទអូមីក្រុង កំពុងតែផ្ទុះឡើងខ្លាំង ដោយមួយថ្ងៃ មានឆ្លងជិតដល់ ៣០០នាក់ហើយនោះ រដ្ឋបាលរាជធានីភ្នំពេញ បានកំណត់ឲ្យម្ចាស់ដើមការ បុណ្យ កន្លែងកម្សាន្ត និងការជួបជុំប្រមូលផ្តុំនានា អនុញ្ញាឲ្យអង្គុយត្រឹមគ្នា៧នាក់ប៉ុណ្ណោះ ក្នុងមួយតុ ដើម្បីរក្សាគម្លាតសុវត្ថិភាព ជៀសផុតពីជំងឺនេះ។
យោងតាមសេចក្តីណែនាំ របស់រដ្ឋបាលរាជធានីភ្នំពេញ ក្នុងចំណុចទី២ ក្នុងចំណោម៤ចំណុច ដែលប្រកាសចេញផ្សាយ នៅថ្ងៃទី១០ ខែកុម្ភៈ ឆ្នាំ២០២២នេះ បានឲ្យដឹងថា ចំពោះទីតាំង ប្រមូលផ្តុំមនុស្សច្រើនដូចជា កន្លែងរៀបចំពិធីមង្គលការ ភោជនីយដ្ឋាន ពិធីបុណ្យទាន កន្លែងកម្សាន្ត និងការជួបជុំ ប្រមូលផ្តុំផ្សេងៗ ដែលមានមនុស្សច្រើន ត្រូវណែនាំឲ្យរៀបចំកៅអីអង្គុយ មានគម្លាតសុវត្ថិភាព មិនឲ្យលើសពី ៧នាក់ក្នុង១តុ ។
ក្នុងនោះត្រូវប្រកាន់ខ្ជាប់ នូវវិធានការសុខាភិបាល ក្នុងការទប់ស្កាត់ការឆ្លងរីករាលដាលនៃជំងឺកូវីដ-១៩ ដូចជា បាញ់អាកុល ឬជែលលាងដៃ វាស់កំដៅ រក្សាគម្លាតសុវត្ថិភាព និងពាក់ម៉ាស ហើយការដោះម៉ាសចេញ ក្នុងអំឡុងពេលទទួលទានអាហារ ត្រូវទុកដាក់ឲ្យបានត្រឹមត្រូវ និងត្រូវពាក់ម៉ាសវិញ នៅពេលងើប ចេញពីតុ ។
សូមបញ្ជាក់ថា កាលពីថ្ងៃ៩ កុម្ភៈ ម្សិលមិញនេះ ក្រសួងសុខាភិបាល បានបន្តរកឃើញអ្នកឆ្លងជំងឺកូវីដ១៩ថ្មី ជាអូមីក្រុងចំនួន២៦២នាក់ទៀត កើនឡើងជាងថ្ងៃ៨ កុម្ភៈ ដែលមានចំនួន២២៣នាក់។ គិតមកថ្ងៃ៩ កុម្ភៈ ដដែល ករណីអូមីក្រុង ឆ្លងចូលសហគមន៍ចំនួន១៤២២ ៕
