ភ្នំពេញ៖ អង្គភាពស៊ីម៉ាក់កម្ពុជា និង ក្រុមប្រឹក្សាយោបល់របស់ទីភ្នាក់ងារ កិច្ចសហប្រតិបតិ្តការអន្តរជាតិ(JICA) របស់ជប៉ុន នៅថ្ងៃទី១៨ ខែកុម្ភៈ ឆ្នាំ២០២២ បានចុះហត្ថលេខាលើកំណត់ហេតុ លើគំនូសប្លង់បច្ចេកទេសសំណង់ ដែលត្រូវសាងសង់ និងកំណត់ភារកិច្ចទទួលខុសត្រូវ របស់ភាគីទាំង២ ដែលជាលទ្ធផល នៃការសិក្សាវាយតំលៃ ចំពោះតំរូវការរបស់ អង្គភាពស៊ីម៉ាក់។
យោងតាមហ្វេសប៊ុករបស់ លោក ហេង រតនា អគ្គនាយកមជ្ឈមណ្ឌល សកម្មភាពកម្ចាត់មីនកម្ពុជា (CMAC) បានឱ្យដឹងថា ក្នុងរយ:ពេលមួយយ៉ាងខ្លី ប៉ុណ្ណោះក្រុមការងារបានសំរេច គោលដៅយ៉ាងច្បាស់លាស់ និងប្រកបដោយជោគជ័យ។
លោក ហេង រនតា សូមវាយតំលៃខ្ពស់ ចំពោះស្មារតីទទួលខុសត្រូវ របស់ក្រុមទីប្រឹក្សាយោបល់ (កុងស៊ីតង់) និងក្រុមការងារបច្ចេកទេសJICA ដែលបានខិតខំបំពេញកិច្ចការនេះ ប្រកបដោយកិច្ចសហការគ្នា ស្អិតរមួតនិងភាតរភាព ដែលក្នុងនោះមានប្រធានក្រុមរបស់ JICA បានឆ្លងកូវីដ១៩ក្នុងបេសកកម្មនេះ ដែលទើបតែជាសះស្បើយ និងបានវិលត្រឡប់ទៅជប៉ុនវិញ។
លោកថា នេះបង្ហាញអំពីការបេ្តជ្ញាចិត្ត យ៉ាងមុតស្រួចដើម្បីបុព្វហេតុ មនុស្សធម៌និងភាពរីកចំរើន របស់កម្ពុជាក្រោមការដឹកនាំរបស់ សម្តេចតេជោ។
លោក ហេង រតនា មានសង្ឃឹមយ៉ាងមុតមាំថា អាគារទាំងឡាយ ទាំងស្ថិតនៅវិទ្យាស្ថានបច្ចេកទេស សកម្មភាពកំចាត់មីន ក្នុងខេត្តកំពង់ឆ្នាំង និងសារមន្ទីរសន្តិភាពសកម្មភាពមីន ស្ថិតនៅខេត្តសៀមរាប នឹងត្រូវឈរខ្ពស់ ត្រដែតឡើង ដើម្បីបំរើតំរូវការវិស័យមីន នៅកម្ពុជាបន្តពីឆ្នាំ២០២៥ទៅមុខទៀត ក្នុងគោលដៅពង្រឹង សមត្ថភាពអង្គភាពស៊ីម៉ាក់ ឱ្យបន្តបេសកកម្ម ដើម្បីដោះស្រាយវិបត្តិសំណល់ យុទ្ធភណ្ឌសង្គ្រាមយូរអង្វែង មានដូចជាគ្រាប់បែកចង្កោម គ្រាប់បែកទម្លាក់ពីយន្តហោះ និងគ្រាប់យុទ្ធភណ្ឌមិនទាន់ផ្ទុះទាំងឡាយដទៃទៀត។
