ភ្នំពេញ៖ នៅក្នុងកិច្ចជំនួប ជាមួយលោក ប៉ាប្លូ កាង (Pablo KANG) ឯកអគ្គរាជទូតអូស្ត្រាលីប្រចាំកម្ពុជា កាលពីថ្ងៃទី១៧ ខែមីនា សម្តេចពិជ័យសេនា ទៀ បាញ់ បានស្នើដល់ភាគីអូស្ត្រាលីឱ្យបង្កើនផ្តល់វគ្គបណ្តុះបណ្តាលអាហារូបករណ៍សម្រាប់ថ្នាក់មូលដ្ឋាន នៅតាមបណ្តាសាកលវិទ្យាល័យនៅកម្ពុជា ដែលបានផ្អាកមួយរយៈពេលកន្លងមក និងទៅសិក្សានៅប្រទេសអូស្ត្រាលី។នេះបើយោងតាមនាយកដ្ឋានព័ត៌មាន ក្រសួងការពារជាតិ។
សម្ដេចស្នេីបន្តរៀបចំកម្មវិធីក្រុមបាញ់កាំភ្លើងជើងគោក ដែលបានផ្អាកដោយសារបញ្ហាជំងឺកូវីដ-១៩ ជួយគាំទ្រដល់ការពង្រឹងសមត្ថភាព នាយទាហាន សិក្ខាកាមកំពុងសិក្សានៅសាកលវិទ្យាល័យ ការពារជាតិ ជួយគាំទ្រលើផ្នែកច្បាប់រដ្ឋបាល និងបច្ចេកទេសដល់មន្ត្រី អគ្គលេខាធិការដ្ឋាន សន្តិសុខលម្ហសមុទ្រជាដើម។
លោកប៉ាប្លូ កាង (Pablo KANG) បានបញ្ជាក់ថា កងទ័ពប្រទេសទាំងពីរ នៅតែបន្តពង្រឹង និងពង្រីកកិច្ចសហប្រតិបត្តិការ ឲ្យបានកាន់តែប្រសើរឡើងថែមទៀត ដូចនឹងអ្វីដែលភាគីទាំងពីរ បានធ្វើរួមគ្នានាពេលកន្លងទៅយ៉ាងដូច្នោះដែរ៕
