ភ្នំពេញ៖ លោកឧត្តមសេនីយ៍ឯក ម៉ៅ សុផាន់ មេបញ្ជាការរងកងទ័ពជើងគោក មេបញ្ជាការកងពលតូចលេខ៧០ នៅរសៀលថ្ងៃទី១៨ ខែមេសា ឆ្នាំ២០២២នេះ បានអញ្ជេីញបេីកកម្មពិធីប្រជុំផ្សព្វផ្សាយ ផែនការធានាសកម្មភាពចាក់វ៉ាក់សាំងកូវីដ-១៩ ដូសទី៣ និងដូសទី៤ ជំហានទី១ សម្រាប់ប្រជាពលរដ្ឋ និងកម្មករ និយោជិក នៅក្នុង និងជុំវិញភូមិសាស្រ្តរាជធានីភ្នំពេញ នាទីបញ្ជាការកងពលតូចលេខ៧០។
សូមជម្រាបផងដែរថា ការចុះចាក់វ៉ាក់សាំងកូវីដ-១៩ដូសទី៣ និងទី៤ ជំហានទី១ជូនប្រជាពលរដ្ឋ និងកម្មករ និយោជិក នៅក្នុងនិងជុំវិញភូមិសាស្រ្តរាជធានីភ្នំពេញ នឹងចាប់ផ្តេីមដំណេីការពីថ្ងៃទី២០ ខែមេសា រហូតដល់ថ្ងៃទី៣០ ខែមេសា ឆ្នាំ២០២២នេះតទៅ។
ក្នុងឱកាសនេះដែរ លោកឧត្តមសេនីយ៍ឯក បានមានប្រសាសន៍ថា គោលដៅអនុវត្តផែនការចាក់វ៉ាក់សាំងកូវីដ-១៩ដូសទី៣ និងដូសទី៤ ជំហានទី១ជូនប្រជាពលរដ្ឋ និងកម្មករ និយោជិក នៅក្នុងនិងជុំវិញ ភូមិសាស្ត្ររាជធានីភ្នំពេញ សំដៅពង្រឹង និងពង្រីកភាពស៊ាំក្នុងសហគមន៍ អោយកាន់តែល្អប្រសេីរឡេីង ព្រមទាំងរក្សាបាននិរន្តរភាពនៃដំណេីរការសកម្មភាពសង្គម-សេដ្ឋកិច្ច ជាប្រក្រតី។ ជាពិសេសដេីម្បីបន្តប្រយុទ្ធប្រឆាំងចំពោះការឆ្លងរាលដាល នៃជំងឺកូវីដ-១៩មេរោគបំប្លែងថ្មី ប្រភេទអូមីក្រុង(Omicron) ដែលបានចម្លងចូលទៅក្នុង សហគមន៍កម្ពុជា ចាប់តាំងពីដេីមឆ្នាំ២០២២នេះ។
ជាមួយគ្នានេះដែរ លោកមេបញ្ជាការកងពល បានរំលឹកផងដែរថាកន្លងមកនេះ កងពលបានចូលរួម ក្នុងយុទ្ធការចាក់វ៉ាក់សាំងកូវីដ-១៩ របស់ក្រសួងការពារជាតិ ក្នុងនោះបានចាក់វ៉ាក់សាំង ជូនកងទ័ព និងគ្រួសារកងទ័ព ទាំង៨ខណ្ឌ។ ជាពិសេសកងពលក៏ធ្លាប់បានចូលរួម ក្នុងយុទ្ធនាការចាក់វ៉ាក់សាំង ជូនប្រជាពលរដ្ឋ កម្មករ កម្មការនីដែលរស់នៅ ក្នុងតំបន់ក្រហម នៃខណ្ឌមានជ័យ និងខណ្ឌពោធិ៍សែនជ័យ ដែលមាន ៦សង្កាត់ ក្នុងរាជធានីភ្នំពេញ ដោយទទួលបានលទ្ធផលល្អ និងបានត្រៀមខ្លួនជាស្រេចអនុវត្តដាច់ខាត នូវបទបញ្ជារបស់ប្រមុខរាជរដ្ឋាភិបាល ក្រសួងការពារជាតិ អគ្គបញ្ជាការ នៃកងយោធពលខេមរភូមិន្ទ និងបញ្ជាការដ្ឋានទ័ពជេីងគោក។
លោកឧត្តមសេនីយ៍ឯក ម៉ៅ សុផាន់ បានកោតសសេីរ ដល់មេបញ្ជាការរង នាយទាហាន នាយទាហានរង និងពលទាហានទាំងអស់ ដែលបានខិតខំប្រឹងប្រែងតស៊ូ លះបង់ពុំខ្លាចនឿយហត់ និងការធ្វើពលិកម្មគ្រប់បែបយ៉ាងប្រកបដោយការគោរពវិន័យ ការគោរពបទបញ្ជា សាមគ្គីឯកភាពគ្នាជាធ្លុងមួយ គួបផ្សំនឹងស្មារតីទទួលខុសត្រូវខ្ពស់ របស់មេបញ្ជាការគ្រប់ជាន់ថ្នាក់ ក្នុងការបែងចែក និងចាត់ចែងអនុវត្តការងារប្រកបដោយជោគជ័យ ក្នុងរយៈពេលកន្លងមក៕
