ភ្នំពេញ ៖ អស់រយៈពេលជាង១០ថ្ងៃមកហើយ ដែលជនជំនាញខាងក្លែងបន្លំ និងប្រើប្រាស់លិខិតក្លែងលួចលក់អចលនវត្ថុរបស់អ្នកដទៃម្នាក់ ត្រូវបានតំណាងអយ្យការ និងចៅក្រមចេញដីកាឃុំខ្លួនដាក់ពន្ធនាគារ។
យោងតាមរបាយការណ៍ គឺបញ្ជាក់យ៉ាងច្បាស់ថា ឈ្មោះ យឹម ចាន់ថន ពិតជាបានប្រព្រឹត្តនូវសកម្មភាព លួចលក់អចលនវត្ថុអ្នកដទៃ និងក្លែងលិខិតផងដែរ។ ជនសង្ស័យរូបនេះ ត្រូវបានចៅក្រមសម្រេចឃុំខ្លួនបណ្ដោះអាសន្ន ដើម្បីបើកការស្រាវជ្រាវ និងស៊ើបសួរបន្តទៀត។
ក្នុងអំឡុងពេលដែលចៅក្រម កំពុងតែបើកការស៊ើបសួរនេះ មានមន្ត្រីមួយរូប ដែលម្នាក់ត្រូវបានប្រភពបង្ហើបឱ្យដឹងថា ជានាយករងរដ្ឋបាលសាលាខេត្ត បានខ្នះខ្នែងរត់ការ ជាមួយស្ថាប័ននគរបាល ក៏ដូចជា តុលាការ ដើម្បីកុំអោយមានការឃាត់ខ្លួន ជនសង្ស័យយកទៅដាក់ពន្ធនាគារ ឬមន្ទីរឃុំឃាំង ដោយពួកគេហានចំណាយប្រាក់ប្រមាណ ជិត២ម៉ឺនដុល្លារឯណោះ ព្រោះយកដីគេលក់ បានច្រើនណាស់ ចែកគ្នា ដូចសម្លរកំពិស ។
តែទោះបីជាយ៉ាងនេះក្តី ការខិតខំប្រឹងប្រែងរបស់លោកមន្ត្រីរូបនោះ ហាក់មិនទទួលលទ្ធផលល្អប្រសើរឡើយ អ្វីដែលជាការកត់សម្គាល់ និងធ្វើឲ្យមានមន្ទិលសង្ស័យនោះ គឺហេតុអ្វីបានជាលោកម្នាក់នេះ ខ្នះខ្នែងដើម្បីជួយរត់ការឲ្យជនសង្ស័យឈ្មោះ យឹម ចាន់ថននេះ បានរួចផុតពីការចោទប្រកាន់ និងរួចពីពន្ធនាគារបែបនេះ?។
យោងតាមប្រភពដែលស្និទ្ធិក្នុងសាច់រឿងនេះ ក៏បានបង្ហើបប្រាប់ផងដែរថា «លោកអភិបាលរងស្រុកឈ្មោះ កង បុនណាត ក៏មានដីពាក់ព័ន្ធនៅក្នុងសាច់រឿងរបស់ជនសង្ស័យឈ្មោះ ញឹមចាន់ថននេះដែរ តែលោក កង បុនណាត មិនបានដាក់ឈ្មោះខ្លួនឯងនោះទេ គឺដាក់ឈ្មោះក្រុមគ្រួសារម្នាក់ ក្នុងចំណោមក្រុមគ្រួសាររបស់គាត់ជាច្រើននាក់ ។ ទោះបីជាបែបនេះក្តី សមត្ថកិច្ចមិនបានបញ្ជាក់អំពីឈ្មោះអ្នកដែលឈរជាម្ចាស់ដីចំនួន៤ហិកតានោះទេ គឺរង់ចាំឲ្យតុលាការបើកការស៊ើបសួរ និងដឹងច្បាស់ជាងនេះ។
ដោយឡែក លោក ជេត ដុំ មិនមានប្រភពណាបញ្ជាក់អំពីទំនាក់ទំនងរបស់លោកជាមួយឈ្មោះ យឹម ចាន់ថន ឡើយ មូលហេតុដែលលោកខ្នះខ្នែងជួយរត់ការនេះ ទំនងជាមានការពឹងពាក់ និងទទួលលាភសក្ការ:ពីមន្ត្រីម្នាក់នៅសាលាខេត្តកំពង់ស្ពឺ ដែលមានការពាក់ព័ន្ធជាមួយជនសង្ស័យឈ្មោះ ញឹម ចាន់ថននេះ។
ប្រភពដែលស្និទ្ធិក្នុងសាច់រឿងនេះ បានបង្ហើបផងដែរថា ទោះបីជាមានការខ្នះខ្នែងពីលោកទាំងពីរក្នុងការរត់ការ ដើម្បីឲ្យជននេះបានរួចផុតពីពន្ធនាគារក្តី តែចៅក្រមមិនបានឯកភាពតាមការស្នើសុំនេះឡើយ។ គេរង់ចាំមើលថា ក្រោយពេលដែលចៅក្រមបើកការស៊ើបសួរ តើនៅមានមនុស្សប៉ុន្មាននាក់ទៀតដែលជាប់ជំពាក់វាក់វិននៅក្នុងរឿងលួចលក់អចលនវត្ថុអ្នកដទៃ និងក្លែងលិខិតនេះ?។
នៅព្រឹកថ្ងៃទី១៥ ខែឧសភា ឆ្នាំ២០២២នេះ អ្នកយកព័ត៌មានយើងបានទាក់ទងសុំការពន្យល់បកស្រាយពីលោក ជេត ដុំ នាយករងរដ្ឋបាលសាលាខេត្តកំពង់ស្ពឺ ដោយលោកបានបំភ្លឺថា «តាមពិតលោកមិនបានអន្តរាគមន៍អីនោះទេ គ្រាន់តែមុនពេលឃាត់ខ្លួន១ថ្ងៃឈ្មោះយឹម ចាន់ថន បានមកជួបខ្ញុំ ខ្ញុំមិនដឹងសាច់រឿងច្បាស់ទេ ហើយខ្ញុំក៏បានទាក់ទងជាមួយលោកស្នងការរង ខ្ញុំគ្រាន់តែចង់សុំលោកស្នងការរងថា ពេលគាត់ (យឹម ចាន់ថន) ចូលមកអោយមានការឃាត់ខ្លួន សុំអោយសុខសុវត្ថិភាពសិន ព្រោះម្នាក់នឹងដឹងរឿងច្រើនជុំវិញបញ្ហានឹង។ ក្រោយមកខាងសមត្ថកិច្ចបានកសាងសំណុំរឿងបញ្ជូនទៅតុលាការ ហើយក៏មានចេញដីកាឃុំខ្លួនតែម្តង»។
ដោយឡែក លោកកង បុនណាត វិញ បានប្រាប់ផងដែរថា «លោកស្គាល់ឈ្មោះ យឹមចាន់ថននេះ តាមរយៈគេបាញ់រឿងឱ្យមើលតាមប្រព័ន្ធ Messenger តែប៉ុណ្ណោះ តែលោកមិនដឹងថាគេចាប់រឿងអីនោះទេ។ លោកបានបញ្ជាក់ថា លោកមិនមានការពាក់ព័ន្ធរឿងដីធ្លីខាងលើនេះឡើយ ហើយលោកក៏អត់ដឹងរឿងអីដែរ មិនដូចការលើកឡើងខាងលើនោះទេ»។
សូមរំលឹកថា ជនដែលចៅក្រមសម្រេចចេញដីកាឃុំខ្លួននេះ មានឈ្មោះ ញឹម ចាន់ថន ភេទប្រុស អាយុ៥៨ឆ្នាំ មានទីលំនៅភូមិតាំងគម្ពីរ ឃុំទំព័រមាស ស្រុកសំរោងទង ខេត្តកំពង់ស្ពឺ ត្រូវបានសមត្ថកិច្ចឃាត់ខ្លួនកាលពីថ្ងៃទី០៥ ខែឧសភា ឆ្នាំ២០២២ នៅចំណុចភូមិ-ឃុំខាងលើ ហើយត្រូវបានចៅក្រមចេញដីកាសម្រេចឃុំខ្លួនលេខ៦១០៧ ចុះថ្ងៃទី៦ ខែឧសភា ឆ្នាំ២០២២។
ប្រភពពីមន្ត្រីសមត្ថកិច្ចនៃស្នងការដ្ឋាននគរបាលខេត្តកំពង់ស្ពឺ បានឲ្យដឹងថា ជនឈ្មោះ យឹម ចាន់ថននេះ គឺជាមុខសញ្ញាដែលជំនាញខាងក្លែងឯកសារលក់ អចលនវត្ថុរបស់អ្នកដទៃ ដែលកន្លងមកមានអ្នកប្តឹងជាច្រើននាក់មកហើយ តែជននេះមានខ្នងបង្អែកម្នាក់ ជាមន្ត្រីសាលាខេត្ត (ប្រធានការិយាល័យ) ចាំជួយជ្រោមជ្រែងនាពេលកន្លងមក ទើបរូបគេចេះតែមានសំណាង គេចផុតពីការចាប់ខ្លួន រហូតមក ទើបតែលើកនេះ ទំនងជាអស់លក្ខណ៍ហើយមើលទៅ ទើបជាប់ខ្នោះរបស់សមត្ថកិច្ចបែបនេះ។
ប្រភពដដែលបន្តថា ដំណាក់កាលតំណាងអយ្យការ និងចៅក្រមស៊ើប គឺមានអ្នករត់ការ (ខ្នងបង្អែក) ខ្វះខ្វែងដោយពួកគេហ៊ានចំណាយលុយជិត២ម៉ឺនដុល្លារ ដើម្បីឱ្យជនម្នាក់នេះ បានរួចខ្លួនវិញ តែទោះបីជាខ្នងបង្អែករបស់ជននេះ ខិតខំខ្នះខ្នែងរត់ការយ៉ាងណាក៏ដោយ ដើម្បីភាពយុត្តិធម៌ គឺគ្មាននរណាម្នាក់អើពើនឹងការស្នើសុំឲ្យមានការដោះលែងនេះដែរ។
សកម្មភាព និងការប្រព្រឹត្តិលួចលក់អចលនវត្ថុរបស់អ្នកដទៃនេះ បើយោងតាមប្រភពពីមន្ត្រីសមត្ថកិច្ច គឺមិនមែនមានតែរូបគេម្នាក់នោះទេ ដែលប្រព្រឹត្តនៅមានគ្នីគ្នា ៧ទៅ៨នាក់ទៀតដែលសុទ្ធសឹងជាអ្នករួមគំនិត ហើយអ្នកដែលធំជាងគេ និងធ្វើជាខ្នងបង្អែកនោះ គឺជាមន្ត្រីសាលាខេត្ត និងអនុប្រធានមន្ទីរមួយរូប ជាអ្នកនៅពីក្រោយខ្នងពួកគេ។ តែទោះជាយ៉ាងណា ជនឈ្មោះ យឹម ចាន់ថននេះ ទំនងជាមិនព្រមជាប់គុកម្នាក់ឯងនោះទេ។
មហាជនរង់ចាំមើលថា តើខ្នងបង្អែករបស់ជននេះ អាចរត់ការដើម្បីឲ្យឈ្មោះ យឹម ចាន់ថន បានរួចខ្លួនពីពន្ធនាគារដោយរបៀបណា?
ដោយឡែកប្រភពពីអ្នករស់នៅភូមិតាំងគម្ពី សុំមិនបញ្ចេញឈ្មោះឯណោះវិញ ក៏បានបញ្ជាក់យ៉ាងច្បាស់ថា អ្នកដែលរត់ការឲ្យជនម្នាក់នេះ គឺជាអ្នកធ្លាប់ទទួលបានផលប្រយោជន៍ពីជននេះ តាមរយៈការឲ្យដីដែលជាដីរបស់អ្នកដទៃទៅឲ្យខ្នងបង្អែករបស់គេ។ មូលហេតុនេះហើយ ទើបបានជាខ្នងបង្អែករបស់ជននេះ ស្វះស្វែង ដើម្បីឲ្យមានការដោះលែងជននេះ។ និយាយជារួមទៅ ការអោយដីទៅខ្នងបង្អែករបស់ជននេះ នាពេលកន្លងមក គឺជននេះយកដីរបស់អ្នកដទៃដែលមិនមែនជារបស់ខ្លួនអោយទៅខ្នងបង្អែករបស់គេជាច្រើនហិកតា តាមរយៈក្លែងឯកសារ ដែលមានមន្ត្រីជាអ្នកជំនាញខាងក្លែង។
ព័ត៌មានបន្ថែមនឹងមានផ្សាយជូននៅពេលក្រោយ ៕
