ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានព្រមានដល់អ្នកនយោបាយប្រឆាំង ឲ្យបញ្ឈប់វប្បធម៌នយោបាយមិនល្អ តែងតែនិយាយចោទថា «លួចបន្លំសន្លឹកឆ្នោត បោះឆ្នោតមិនត្រឹមត្រូវ» នៅពេលខ្លួនចាញ់ឆ្នោតម្ដងៗ។
ក្នុងពិធីប្រគល់សញ្ញាបត្រជូនដល់និស្សិតជ័យលាភីសាកលវិទ្យាល័យជាតិបាត់ដំបង នាថ្ងៃទី២១ ខែមិថុនា ឆ្នាំ២០២២ សម្ដេច ស ខេង បានចាត់ទុកការនិយាយ និងទង្វើនោះថា រឿងមិនត្រឹមត្រូវ និងជាវប្បធម៌នយោបាយមួយគួរបញ្ឈប់។
សម្ដេច បញ្ជាក់ថា «នេះជាបន្ទាត់នយោបាយរបស់គាត់ ឲ្យតែចាញ់គាត់ថា អ៊ីចឹង តាមមើលអ៊ីចឹង! លេងអាចក្បួនហ្នឹងអត់បានទេ វប្បធម៌ហ្នឹងមួយដែល ខ្ញុំស្នើគណបក្សនយោបាយត្រូវទទួលស្គាល់ការពិត ចង់និយាយថា បើគ្រាន់តែចោទស្មានៗអ៊ីចឹង លុបបំបាត់ទៅអាវប្បធម៌ហ្នឹង»។
ភ្ជាប់នឹងសំណើរឲ្យលុបបំបាត់វប្បធម៌ចោទស្មានៗនោះដែរ សម្ដេច ស ខេង ក៏បានស្នើឲ្យអ្នកចាញ់ឆ្នោតបង្កើតវប្បធម៌ស្វាគមន៍អ្នកឈ្នះ ដោយ សម្ដេច បានពន្យល់ថា «ពីមុនយើងធ្វើសង្គ្រាមវាយគ្នា ប្រើកម្លាំងប្រដាប់អាវុធ អំពើហិង្សាដើម្បីឡើងកាន់អំណាច អាហ្នុងមិនមែនគូប្រកួតប្រជែងទេ គេហៅគូបក្ខដិបក្ឋ មានតែសម្លាប់គ្នាទៅវិញទៅមកទេ មានឯងអត់អញមានអញអត់ឯង។តែយើងមិនមែនគូបក្ខដិបក្ខទេ យើងជាគូប្រកួតប្រជែង។ គូប្រកួតប្រជែងប្រែមកថាចាញ់គឺសូមទទួលស្គាល់ថាចាញ់ ហើយអបអរអ្នកឈ្នះ ជូនពរអ្នកឈ្នះ ធ្វើការជាមួយគ្នា»។
លើសពីនេះ សម្ដេច បានស្នើប្រជាពលរដ្ឋនៅមូលដ្ឋាន ដែលមាននិន្នាការគាំទ្រគណបក្សផ្សេងៗគ្នា បង្កើនការផ្សះផ្សាររាប់អានគ្នា មានសាមគ្គីភាពជាមួយគ្នា និងគោរពការដឹកនាំ ការសម្រេចចិត្តរបស់ក្រុមប្រឹក្សាឃុំ សង្កាត់ដែលឈ្នះឆ្នោតដាច់ ឬមានសំឡេងភាគច្រើន។
សម្ដេច ក៏ស្នើក្រុមប្រឹក្សាឃុំ សង្កាត់ ដែលឈ្នះឆ្នោតខិតខំរួមគ្នាបំពេញភារកិច្ចបំរើប្រជាពលរដ្ឋដោយគ្មានការរើសអើង មិនត្រូវដាក់ផ្លែផ្កាឲ្យអ្នកចាញ់ ឬក្រុមសំឡេងភាគតិច ប៉ុន្តែរួមសាមគ្គីគ្នាក្នុងនាមជាខ្មែរដូចគ្នា៕
