ឡុងដ៏៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៦ ខែកក្កដា ឆ្នាំ២០២២ថា កាលពីថ្ងៃសុក្រ អ្នកព្យាករណ៍អាកាសធាតុ (Met Office) របស់ចក្រភពអង់គ្លេស បានប្រកាសអាសន្នកម្រិតថ្នាក់ជាតិ ដោយបានចេញការព្រមាន “កម្តៅខ្លាំង” ពណ៌ក្រហម សម្រាប់ផ្នែកខ្លះនៃប្រទេសអង់គ្លេស សម្រាប់ថ្ងៃចន្ទ និងថ្ងៃអង្គារសប្តាហ៍ក្រោយ នៅគ្រាដែលសីតុណ្ហភាព អាចឡើងដល់កម្រិតខ្ពស់បំផុត ។
ការិយាល័យ Met បានឲ្យដឹងនៅលើគេហទំព័ររបស់ពួកគេថា “ពិសេស ប្រហែលជាការបំបែកកំណត់ត្រា សីតុណ្ហភាពទំនងជានៅថ្ងៃចន្ទ បន្ទាប់មកម្តងទៀតនៅថ្ងៃអង្គារ” ។
“ពេលយប់ក៏ទំនងជាមានភាពកក់ក្តៅ ជាពិសេសសម្រាប់ចក្រភពអង់គ្លេស ជាពិសេសនៅក្នុងតំបន់ទីក្រុង ។ នេះទំនងជានាំឱ្យមានផលប៉ះពាល់ យ៉ាងទូលំទូលាយលើមនុស្ស និងហេដ្ឋារចនាសម្ព័ន្ធ” ។
សីតុណ្ហភាពខ្ពស់បំផុតមិនធ្លាប់មាន ក្នុងប្រទេសអង់គ្លេសគឺ ៣៨.៧អង្សាសេ ដែលត្រូវបានកត់ត្រា នៅក្នុងសួនរុក្ខសាស្ត្រ សាកលវិទ្យាល័យខេមប្រ៊ីជ នៅថ្ងៃទី២៥ ខែកក្កដា ឆ្នាំ២០១៩ ។
កាលពីដើមសប្តាហ៍នេះ ស្ថាប័នទីភ្នាក់ងារសន្តិសុខ សុខភាពចក្រភពអង់គ្លេស និងការិយាល័យ Met បានចេញសេចក្តីជូនដំណឹង អំពីសុខភាពកម្រិត៣ កម្តៅសម្រាប់ផ្នែកខ្លះនៃប្រទេស ដែលតម្រូវឱ្យមានសេវាថែទាំសុខភាព និងសង្គមដើម្បីចាត់វិធានការបន្ថែម ដើម្បីការពារជនងាយរងគ្រោះ ។
ការដាស់តឿនពណ៌ក្រហមកម្រិត៤ ត្រូវបានកំណត់នៅលើ គេហទំព័ររបស់ការិយាល័យ Met office ថាត្រូវបានឈានដល់ “នៅគ្រាដែលរលកកម្តៅខ្លាំង និង/ឬអូសបន្លាយដែលឥទ្ធិពល របស់វាលាតសន្ធឹងនៅខាងក្រៅ ប្រព័ន្ធថែទាំសុខភាព និងសង្គម ៕
ប្រែសម្រួលដោយ៖ ម៉ៅ បុប្ផាមករា
