កំពង់ចាម ៖ អភិបាលខេត្តកំពង់ចាម លោក អ៊ុន ចាន់ដា បានថ្លែងណែនាំដល់មន្ត្រី ឲ្យត្រូវចេះអោបក្រសោប អប់រំណែនាំគ្នា ចេះសាមគ្គីយោគយល់គ្នា សហការគ្នាឲ្យបានល្អ ដើម្បីបំពេញភារកិច្ចបម្រើប្រជាពលរដ្ឋ ។
លោកអភិបាលខេត្តបានលើកឡើងដូច្នេះនៅថ្ងៃទី២៥ ខែកក្កដា ឆ្នាំ២០២២ ក្នុងកិច្ចប្រជុំផ្សព្វផ្សាយលើសេចក្ដីណែនាំលេខ ១៦៩/២២ ស្ដីពីគោលការណ៍បែបបទ និងនីតិវិធីនៃការគ្រប់គ្រងបុគ្គលិករដ្ឋបាលក្រុង ស្រុក នៅសាលាខេត្តកំពង់ចាម ។
លោក អ៊ុន ចាន់ដា បានបន្តថា ច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌបានផ្ដល់នូវក្របខ័ណ្ឌគតិយុត្តឲ្យ រាជធានី ខេត្ត ក្រុង ស្រុក ខណ្ឌដែលជានីតិបុគ្គលសាធារណៈត្រូវគ្រប់គ្រងតាមគោលការណ៍នៃរដ្ឋបាល ឯកភាព ដើម្បីបង្កើត ជំរុញ និងធ្វើឲ្យមានចិរភាពដល់ការអភិវឌ្ឍតាមបែបប្រជាធិបតេយ្យ តាមរយៈគោល នយោបាយវិមជ្ឈការ និងវិសហមជ្ឈការ និងដើម្បីសម្របសម្រួលនូវរាល់សកម្មភាពរដ្ឋបាលសាធារណៈ នៅក្នុងដែនសមត្ថកិច្ចរបស់ខ្លួន។ អនុលោមតាមគោលការណ៍នេះ តម្រូវឲ្យមានការរៀបចំឡើងវិញនូវរចនាសម្ព័ន្ធ ប្រព័ន្ធ និងនីតិវិធីអនុវត្តការងាររបស់រាជធានី ខេត្ត ក្រុង ស្រុក ខណ្ឌដែលក្នុងនោះ ការរៀបចំឡើងវិញនូវ ប្រព័ន្ធគ្រប់គ្រង និងអភិវឌ្ឍធនធានមនុស្ស គឺជាកិច្ចការដ៏មានសារៈសំខាន់ និងចាំបាច់។
ជាមួយគ្នានោះ លោកអភិបាលខេត្ត ក៏បានស្នេីដល់អង្គភាពពាក់ព័ន្ធ និងរដ្ឋបាលក្រុង ស្រុក ត្រូវខិតខំអនុវត្តមុខងារវិស័យមុខងារឲ្យមានប្រសិទ្ធិភាព និងទទួលបានជោគជ័យ ឲ្យសាកសមទៅនឹងការប្រតិភូកម្មមុខងារពីថ្នាក់ជាតិ មកឲ្យថ្នាក់ក្រោមជាតិ ជាពិសេសត្រូវបណ្តុះបណ្តាលមន្ត្រីឲ្យមានចំណេះ ជំនាញច្បាស់លាស់ ក្នុងន័យអនុវត្តការងារជំនាញនៅតាមអង្គភាពរបស់ខ្លួនបានល្អ ហើយមន្ត្រីរាជការត្រូវ ចងចាំពីលក្ខណៈសម្បត្តិស្នូលទាំង៤ គឺ ឆន្ទៈម្ចាស់ការ ភក្ដីភាព មនសិកាវិជ្ជាវៈ និនិងវប្បធម៌សាវាសាធាណៈ និងសូមឲ្យអនុវត្តនូវសេចក្តីណែនាំលេខ ១៦៩/២២ មសសណន ចុះថ្ងៃទី១៧ ខែមករា ឆ្នាំ២០២២ របស់ក្រសួងមុខងារសាធារណៈ ស្ដីពីគោលការណ៍ បែបបទ និងនីតិវិធីនៃការ គ្រប់គ្រងបុគ្គលិករដ្ឋបាលក្រុង ស្រុក ឱ្យបានខ្ជាប់ខ្ជួន និងបានល្អប្រសើរផងដែរ ៕
