ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅរាត្រីថ្ងៃទី២២ ខែសីហា ឆ្នាំ២០២២នេះ បានចេញសារប្រដៅអ្នកវិភាគ មួយចំនួន ដែលតែងតែវិភាគ បែបវាយប្រហារលើ លោក ហ៊ុន ម៉ាណែត ដែលជាកូនប្រុសច្បងរបស់ សម្ដេច និងជាបេក្ខភាពបន្តវេន នាយករដ្ឋមន្រ្តី ក្នុងជួរគណបក្សប្រជាជនកម្ពុជា។
ការចេញសារនេះ ធ្វើឡើងបន្ទាប់ពីមានអ្នកវិភាគក្នុងនិងក្រៅប្រទេស មួយចំនួន បានចេញមកវិភាគ បែបវាយប្រហារយ៉ាងចាស់ដៃ លើសកម្មភាព របស់លោក ហ៊ុន ម៉ាណែត គ្រប់កាលៈទេសៈ។
តាមរយៈគេហទំព័រហ្វេសប៊ុក នៅរាត្រីថ្ងៃទី២២ ខែសីហា ឆ្នាំ២០២២នេះ សម្ដេចតេជោ ហ៊ុន សែន លើកឡើងថា” ការបង្ហោះរូបភាព របស់ លោក ហ៊ុន ម៉ាណែត ទស្សនកិច្ច នៅចិន ជប៉ុន សង្ហបុរី ថៃ ប្រុយណេនិងចុង ក្រោយ ថ្មីៗនេះ នៅវៀតណាម ជូនអ្នក វិភាគខ្លះដើម្បីបង្កើនចំណេះដឹង”។
សម្ដេចបន្តថា លោក ហ៊ុន ម៉ាណែត មិនមែនមានតែប្រធានរដ្ឋ វៀតណាមមួយទេ ដែលទទួលតែនៅមាន នាយករដ្ឋមន្ត្រីសឹង្ហបុរី នាយករដ្ឋមន្ត្រីជប៉ុន ទទួលដូចគ្នា។ ឯនៅប្រទេសផ្សេងទៀត មានរដ្ឋមន្ត្រីការពារជាតិ ឬឧបនាយករដ្ឋមន្ត្រីទទួល។
សម្ដេចបន្ថែមថា ក្នុងឋានៈជាសមភាគី នៃមេបញ្ជាការកងទ័ពជើងគោក នៅតាមប្រទេសនានា និងក៍ជាទម្លាប់ពិធីការ តែងមានពិធីត្រួត ពលទាំងយើងទៅប្រទេសគេ ទាំងគេមក ប្រទេសយើង។
សម្ដេចគួសបញ្ជាក់ថា “សោកស្តាយ ដែលអស់លោកអ្នកវិភាគ មិនបានយកទស្សនកិច្ច ហ៊ុន ម៉ាណែត នៅជប៉ុន កាលពីដើមឆ្នាំនា២០២២នេះ មកវិភាគ ព្រោះកំរិតទទួល និងជំនួបមានចំនួន ច្រើនហើយកំរិតខ្ពស់ ទៀតផង”។
សម្ដេចសង្កត់ធ្ងន់ថា ម្យ៉ាងទៀតហ៊ុន ម៉ាណែតត្រូវបាននាយក រដ្ឋមន្ត្រីជប៉ុន៣រូប ហើយទទួលជួប (ហាតូយ៉ាម៉ា២០១១ ស៊ីនហ្រូ អាបេ២០១៨ គីស៊ីដា២០២២)។
សម្ដេច សង្ឃឹមថាអ្នកវិភាគ ដែលមានឈាមជាខ្មែរ រៀនសូត្រឱ្យចេះដឹង ជាងនេះ៕
