ភ្នំពេញ៖ អភិបាលខេត្តព្រះសីហនុ លោក គួច ចំរើន បានធ្វើការណែនាំដល់លោក សរ កក្កដា ដែលទើបនឹងតែងតាំង ជាអភិបាលក្រុងព្រះសីហនុថ្មី ត្រូវមានភាពទន់ភ្លន់ ម៉ឺងម៉ាត់ជាមួយ មន្ត្រីក្រោមឱវាទរបស់ខ្លួន។
តាមអនុក្រឹត្យចុះថ្ងៃទី៩ ខែសីហា ឆ្នាំ២០២២ លោក សរ កក្កដា ឋានន្តរស័ក្តិវរមន្ត្រីថ្នាក់លេខ២ ដែលជាអភិបាលស្រុកព្រៃនប់ ត្រូវបានផ្ទេរភារកិច្ច ទៅជាអភិបាលក្រុង ព្រះសីហនុថ្មី ជំនួសឲ្យលោក លោក អ៊ី សុខឡេង ។
![](https://dap-news.com/wp-content/uploads/2022/09/62-1-1024x682.jpg)
ក្នុងពិធី ប្រកាសចូលកាន់តំណែង អភិបាលក្រុងព្រះសីហនុ នៅថ្ងៃទី១ ខែកញ្ញា ឆ្នាំ២០២២ លោក គួច ចំរើន បាន ណែនាំដល់លោក អភិបាលក្រុងព្រះសីហនុថ្មីថា ការដឹកនាំត្រូវមានភាពទន់ភ្លន់ ម៉ឺងម៉ាត់ជាមួយ មន្ត្រីក្រោមឱវាទរបស់ខ្លួន ត្រូវប្រកាន់ភ្ជាប់នូវអភិក្រម របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា គឺ “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់” និងបាវចនាពីរគឺ “កែទម្រង់ខាងក្នុង និងបង្កើតមិត្តខាងក្រៅ” ដោយស្មារតីឯករាជ្យ។ ត្រូវសហការ និងធ្វើការឲ្យបានព្រមគ្នា ។ ទន្ទឹមនោះត្រូវមានសមត្ថភាព ដឹកនាំមន្ត្រីក្រោមឱវាទ ឆ្លើយតបទៅនឹងលក្ខណៈសម្បត្តិ ទទួលបានលទ្ធផលផ្លែផ្កា ។
លោកបន្តថា ម្យ៉ាងទៀត ភារកិច្ចសន្តិសុខ និងសណ្តាប់ធ្នាប់នៅក្រុងព្រះសីហនុ មានគ្រប់ដណ្តប់ ៨០ភាគរយទូទាំងខេត្ត ទាមទារឲ្យគណៈបញ្ជាការឯកភាព ក្រុងព្រះសីហនុ ត្រូវបន្តអប់រំចលនា ចូលរួមពីប្រជាពលរដ្ឋ បានជាប់លាប់ជាប្រចាំ បន្តការងារត្រួតពិនិត្យអាវុធជាតិផ្ទុះ នៅតាមដងផ្លូវ ។ ការងារជួញដូរមនុស្ស ជួញដូរកម្លាំងពលកម្ម គ្រឿងញៀន និងត្រួតពិនិត្យ ទីតាំងផ្ទះជួល នៅក្រុងព្រះសីហនុ ដោយមានការចូលរួម ពីប្រជាពលរដ្ឋក្នុងការសហការ ផ្តល់ព័ត៌មាន អំពីទីតាំងប្រព្រឹត្តិអំពើល្មើស ដើម្បីឈានទៅកំណត់មុខសញ្ញា ជនល្មើស យកមកផ្តន្ទាទោសតាមផ្លូវច្បាប់៕
![](https://dap-news.com/wp-content/uploads/2022/09/61-1-1024x682.jpg)
![](https://dap-news.com/wp-content/uploads/2022/09/60-1-1024x682.jpg)
![](https://dap-news.com/wp-content/uploads/2022/09/59-1-1024x682.jpg)
![](https://dap-news.com/wp-content/uploads/2020/08/1-1.png)