ភ្នំពេញ៖ ជាថ្មីម្ដងទៀត សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានអាស៊ាន បានបញ្ជាក់ជំហរយ៉ាងច្បាស់ថា ភាពតានតឹងនៅក្នុងប្រទេសអ៊ុយក្រែន គឺកម្ពុជាប្រកាន់ភ្ជាប់ និងគោរពគោលការណ៍ ដែលបានចែងក្នុងធម្មនុញ្ញ អង្គការសហប្រជាជាតិ និងច្បាប់អន្តរជាតិ។
ក្នុងឱកាសអនុញ្ញាត ឱ្យលោក ដឹមីត្រូ គូលេបា (Dmytro Kuleba) រដ្ឋមន្ត្រីការបរទេសអ៊ុយក្រែន ចូលជួបសម្តែងការគួរសម និងពិភាក្សាការងារ នៅថ្ងៃទី៩ ខែវិច្ឆិកា ឆ្នាំ២០២២នេះ សម្ដេចតេជោ ហ៊ុន សែន បានមានប្រសាសន៍បន្ថែមថា កម្ពុជាធ្លាប់ឆ្លងកាត់សង្គ្រាម ធ្លាប់ទទួលរងការឈ្លានពាន។ ដូច្នេះកម្ពុជាយល់ពីអារម្មណ៍ របស់ប្រជាជនអ៊ុយក្រែន។
សម្តេចបន្តថា «ជំហររបស់កម្ពុជា ចំពោះសង្គ្រាមនៅអ៊ុយក្រែន គឺការប្រកាន់ភ្ជាប់ និងគោរពគោលការណ៍ ដែលបានចែកក្នុងធម្មនុញ្ញ អង្គការសហប្រជាជាតិ និងច្បាប់អន្តរជាតិ។ កម្ពុជាប្រឆាំងនឹងការឈ្លានពាន ប្រឆាំងការគំរាមកំហែង ឬការប្រើប្រាស់ហិង្សាមកលើអធិបតេយ្យ និងមរណភាពដែនដី របស់រដ្ឋឯករាជ្យនិងមិនគាំទ្រដល់ការបំបែករដ្ឋ ឬការទន្ទ្រានយកទឹកដីពីប្រទេសដទៃឡើយ»។
លោក Dmytro Kuleba បានអគុណសម្តេចតេជោផងដែរ ដែលកម្ពុជាបានចេញសេចក្តីថ្លែងការណ៍ តាមរយ:រដ្ឋមន្ត្រីការបរទេសអាស៊ាន ការគាំទ្របង្ហាញពីកង្វល់ចំពោះស្ថានការណ៍ នៅអ៊ុយក្រែន។ ដែលបង្ហាញអំពីកង្វល់ ចំពោះស្ថានការណ៍ដែលបាន និងកំពុងកើតឡើងនៅប្រទេសអ៊ុយក្រែន ដោយបានទាមទាឲ្យបញ្ឈប់ ការប្រើប្រាស់កម្លាំងប្រដាប់អាវុធ ជាបន្ទាន់ និងងាកមករកការចរចាដោយសន្តិវិធីវិញ និងធ្វើជាសហស្ថាបនិក គាំទ្រចំពោះសេចក្តីសម្រេចចិត្តរបស់មហាសន្និបាតអង្គការសហប្រជាជាតិ ដែលពាក់ព័ន្ធនឹងការឈ្លានពានមកលើអ៊ុយក្រែន។
ឆ្លៀតឱកាសនោះ សម្ដេចបានផ្ដាំផ្ញើនូវ ការសួរសុខទុក្ខដល់ពលរដ្ឋអ៊ុយក្រែន ទាំងអស់ និងជូនពរឲ្យប្រជាជនអ៊ុយក្រែនទាំងអស់ បានទទួលនូវសុខសន្តិភាព និងការអភិវឌ្ឍក្នុងពេលឆាប់ៗខាងមុខ កុំបីខានឡើយ៕
