សៀមរាប៖ រដ្ឋមន្ត្រីក្រសួងការពារជាតិរបស់ប្រទេសឥណ្ឌា លោក Rajnath Singh នៅថ្ងៃអង្គារ បានជួបសមភាគីអូស្ត្រាលី និងសហរដ្ឋអាមេរិក នៅខេត្តសៀមរាប ប្រទេសកម្ពុជា។ លោក Singh បានជួបពិភាក្សាការងារជាមួយឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិអូស្ត្រាលី Richard Marles នៅកម្ពុជា។
យោងតាមសារព័ត៌មាន The Print ចេញផ្សាយនៅថ្ងៃទី២២ ខែវិច្ឆិកា ឆ្នាំ២០២២ បានឱ្យដឹងថា ក្នុងជំនួបនោះ មេដឹកនាំទាំងពីរបានពិភាក្សាគ្នាអំពីការជំរុញទំនាក់ទំនងការពារជាតិ និងពង្រឹងកិច្ចសហប្រតិបត្តិការរវាងឥណ្ឌា និងអូស្ត្រាលី។ ជាការកត់សម្គាល់, លោក Rajnath Singh បានមកដល់ខេត្តសៀមរាប កាលពីថ្ងៃទី ២១ ខែវិច្ឆិកា ដើម្បីធ្វើជាសហប្រធាននៃកិច្ចប្រជុំរដ្ឋមន្ត្រីការពារជាតិឥណ្ឌា-អាស៊ាន និងចូលរួមកិច្ចប្រជុំរដ្ឋមន្ត្រីការពារជាតិអាស៊ានលើកទី ៩ (ADMM Plus)។
លោក Rajnath Singh បាននិយាយនៅក្នុង Twitter ផ្លូវការរបស់លោកថា “ការពិភាក្សាដ៏ស៊ីជម្រៅជាមួយឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិរបស់ប្រទេសអូស្ត្រាលី លោក RichardMarlesMP ស្តីពីការជំរុញទំនាក់ទំនងលើវិស័យការពារជាតិ និងការពង្រឹងកិច្ចសហប្រតិបត្តិការកាន់តែស៊ីជម្រៅរវាងឥណ្ឌា និងអូស្ត្រាលី នៅខេត្តសៀមរាប ប្រទេសកម្ពុជានាពេលបច្ចុប្បន្ននេះ។
ដោយចែករំលែកព័ត៌មានលម្អិតទាក់ទងនឹងជំនួបរបស់លោកជាមួយ Rajnath Singh , លោក Richard Marles វិញក៏ បាននិយាយនៅក្នុងធ្វីតធឺថា ពួកគេបានពិភាក្សាអំពីមហិច្ឆតារួមគ្នាសម្រាប់កិច្ចសហប្រតិបត្តិការនាពេលអនាគតរវាងប្រទេសទាំងពីរ និងពិនិត្យមើលការរីកចម្រើននៃភាពជាដៃគូការពារជាតិនៅឆ្នាំ ២០២២។
ក្នុងដំណើរទស្សនកិច្ចនៅកម្ពុជា លោក Rajnath Singh រដ្ឋមន្រ្តីការពារជាតិឥណ្ឌា ក៏បានជួបពិភាក្សាជាមួយរដ្ឋមន្ត្រីក្រសួងការពារជាតិអាមេរិក លោក Lloyd Austin។ លោក Singh បានសរសេរថា “រីករាយដែលបានជួបរដ្ឋមន្ត្រីការពារជាតិសហរដ្ឋអាមេរិក លោក Lloyd J. Austin នៅខេត្តសៀមរាប”។ លោកក៏បានជួបជាមួយរដ្ឋមន្ត្រីការពារជាតិនូវែលសេឡង់ Peeni Henare នៅកម្ពុជាផងដែរ៕ប្រែសម្រួលៈ ណៃ តុលា
