ភ្នំពេញ៖ លោកបណ្ឌិត ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទ បានលើកឡើងថា ខេត្តកណ្ដាលទទួលបាន ជ័យលាភីពានរង្វាន់លេខ១ ក្នុងការបញ្ចប់ការបន្ទោបង់ ពាសវាលពាសកាល (ODF) ។
ក្នុងសិក្ខាសាលាឆ្លុះបញ្ចាំង ស្ដីពីលទ្ធផលផ្ទៀងផ្ទាត់ស្ថានភាព បញ្ចប់ការបន្ទោបង់ពាសវាលពាសកាល ខេត្តកណ្តាល នៅសាលាខេត្តកណ្ដាល នាព្រឹកថ្ងៃទី៨ ខែធ្នូ លោករដ្ឋលេខាធិការបានមានប្រសាសន៍ថា កន្លងមកក្រុមការងារចុះផ្ទៀងផ្ទាត់ ស្ថានភាពបញ្ចប់ការបន្ទោបង់ ពាសវាលពាសកាល (ODF) នៃក្រសួង អភិវឌ្ឍន៍ជនបទ និងអង្គការដៃគូពាក់ព័ន្ធ ដោយមានកិច្ចសហការពីរដ្ឋបាលខេត្តកណ្ដាល បានចុះផ្ទៀងផ្ទាត់ស្ថានភាពបញ្ចប់ការ បន្ទោបង់ពាសវាលពាសកាល (ODF) ទទួលបានលទ្ធផលជ័យលាភីពានរង្វាន់លេខ១ ក្នុងការបញ្ចប់ការបន្ទោបង់ពាសវាលពាសកាល (ODF) ខេត្តកណ្តាល។
លោកបន្តថា ខេត្តកណ្ដាលមិនមែនជាខេត្តគោលដៅ ដែលបញ្ចប់ការបន្ទោបង់ពាសវាលពាសកាលឡើយ តែដោយមានការខិតខំប្រឹងប្រែង របស់រដ្ឋបាលខេត្តកណ្ដាល មន្ទីរអភិវឌ្ឍន៍ជនបទខេត្ត និងអង្គការដៃគូពាក់ព័ន្ធនានា បានសហការណ៍ថាយ៉ាងល្អ ធ្វើឱ្យខេត្តកណ្ដាលទទួលបានជ័យលាភីលេខ១ ក្នុងការបញ្ចប់ការបន្ទោបង់ពាសវាលពាសកាល (ODF)។
ក្នុងឱកាសនោះដែរលោក គង់ សោភ័ណ្ឌ អភិបាលខេត្តកណ្ដាល បានមានប្រសាសន៍ថា ការធ្វើឱ្យប្រសើរឡើងនូវស្ថានភាពអនាម័យ គឺជាតម្រូវការចាំបាច់សម្រាប់ប្រជាពលរដ្ឋខ្មែរ ជាពិសេសនៅ តំបន់ជនបទ និងជាអាទិភាពមួយក្នុងក្របខ័ណ្ឌអភិវឌ្ឍន៍ជាតិរបស់រាជរដ្ឋាភិបាលកម្ពុជា ក្រោមការដឹកនាំប្រកប ដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា។
លោកបន្តថា ដោយអនុវត្តតាមចក្ខុវិស័យនៃផែនការយុទ្ធសាស្ត្រជាតិ នៅឆ្នាំ២០២៥ ប្រជាពលរដ្ឋគ្រប់រូបនៅ សហគមន៍ជនបទ ត្រូវទទួលបានសេវាផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថាន ដែលមានអនាម័យប្រកបដោយនិរន្តរភាព សំដៅពង្រីកអត្រាគ្របដណ្តប់សេវាផ្គត់ផ្គង់ទឹកស្អាត និងអនាម័យជនបទឱ្យ បាន១០០% នៅឆ្នាំ២០២៥ ។
លោកអភិបាលខេត្តគូសបញ្ជាក់ថា ក្រុង/ស្រុក ទាំង១១ មាន១២៧ ឃុំ/សង្កាត់ ស្មើនឹង១០១០ភូមិ បានបញ្ចប់ការបន្ទោបង់ពាសវាលពាសការ ១០០% ដោយខ្នងផ្ទះជាក់ស្តែង សរុប ២៦៣.៩៦៣ ហើយចំនួនខ្នងផ្ទះដែល បានប្រើបង្គន់អនាម័យផ្ទាល់ខ្លួន សរុប២៥១,៩៥២ ស្មើនឹង៩៥.៤%, ចំនួនខ្នងផ្ទះប្រើបង្គន់អនាម័យរួមសរុប ១២,០១១ ស្មើនឹង៤.៦%។
