ភ្នំពេញ៖ លោក ឃ្លាំង ហួត អភិបាលរងរាជធានាភ្នំពេញ នៅព្រឹកថ្ងៃទី៣១ ខែមករា ឆ្នាំ២០២៣នេះ បានបន្តដឹកនាំកងកម្លាំងគណៈបញ្ជាការឯកភាព រាជធានីភ្នំពេញ បើកប្រតិបត្តិការត្រួតពិនិត្យឃ្លាំងបញ្ចាំ នៅតំបន់ឃ្លាំងរំសេវ ស្ថិតនៅបណ្ដោយផ្លូវលេខ១៩២ ក្នុងសង្កាត់ទឹកល្អក់ទី៣ ខណ្ឌទួលគោក។
ក្នុងឱកាសនោះ លោក ឃ្លាំង ហួត បានមានប្រសាសន៍ថា មិនមែនគ្រប់ទីតាំងកុងស៊ីបញ្ចាំ សុទ្ធតែអាក្រក់ទាំងអស់នោះទេ ហើយត្រូវបែកចែកជាពីរ ដោយក្នុងនោះយើងត្រូវលើកទឹកចិត្តចំពោះ ទីតាំងកន្លែងកុងស៊ីបញ្ជាំដែលស្របច្បាប់ និងកន្លែងខុសច្បាប់ គឺត្រូវតែចាត់វិធានការតាមផ្លូវច្បាប់។
លោកបញ្ជាក់ថា «ទីតាំងកុងស៊ីបញ្ចាំខុសច្បាប់ គឺជាប្រភពដែលនាំឱ្យមានអំពើចោរកម្ម លួច ឆក់ ប្លន់ ដែលត្រូវតែចាត់វិធានការច្បាប់តឹងរឹង ដែលមិនអាចលើកលែងបាន»។
ពាក់ព័ន្ធទៅនឹងការប្រគល់ សម្ភារៈ (ម៉ូតូ រថយន្ត) ជូនជនរងគ្រោះ លោក ឃ្លាំង ហួត បានឱ្យដឹងថា ត្រូវទាមទារពេលវេលា និងត្រួតពិនិត្យ ឯកសារនិងមូលហេតុ ឱ្យបានច្បាស់លាស់ ទើបអាចប្រគល់ទៅឱ្យម្ចាស់ដើមវិញ។
ឆ្លៀតក្នុងឱកាសនេះ លោកអភិបាលរង ក៏បានសំណូមពរឱ្យម្ចាស់ទីតាំង ចូលមកសហការ ជាមួយអាជ្ញាធរ ដើម្បីអនុវត្តន៍គោលនយោបាយ ភូមិ-សង្កាត់មានសុវត្ថិភាព (ការបង្រ្កាប គ្រឿងញៀន ក្មេងទំនើង ល្បែងស៊ីសងខុសច្បាប់គ្រប់ប្រភេទ និងកុងស៊ីបញ្ចាំខុសច្បាប់)៕
