ភ្នំពេញ៖ ឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការ កងរាជអាវុធហត្ថរាជធានីភ្នំពេញ នារសៀលថ្ងៃទី១២ ខែមេសា ឆ្នាំ២០២៣ បានអនុញ្ញាតឲ្យ ក្រុមយុវនិស្សិតខេត្តបន្ទាយមានជ័យ ០៧នាក់ តំណាងឲ្យយុវនិស្សិត ខេត្តបន្ទាយមានជ័យ ដែលកំពុងស្នាក់នៅ និងរៀនសូត្រ ក្នុងរាជធានីភ្នំពេញ ចំនួន ៣.៧៩២នាក់ ចូលមកបញ្ជាការដ្ឋាន កងរាជអាវុធហត្ថរាជធានីភ្នំពេញ ដើម្បីជួបសម្តែងការគួរសម និង គោរពជូនពរក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ។
លោកឧត្តមសេនីយ៍ឯក រ័ត្ន ស្រ៊ាង បានមានប្រសាសន៍ថា ឲ្យតែឮដំណឹងថា នឹងបានជួបអ្នកបន្ទាយមានជ័យ គឺតែងតែកន្ត្រាក់អារម្មណ៍លោក ឲ្យនឹករឭកដល់អនុស្សាវរីយ៍កាលពី លោក នៅជាមេបញ្ជាការ កងរាជអាវុធហត្ថ ខេត្តបន្ទាយមានជ័យ នឹកដល់មន្ត្រីរាជការ នឹកដល់កងកម្លាំងប្រដាប់អាវុធ ពិសេសនឹកដល់ប្រជាពលរដ្ឋ នៅទីនោះ។
លោកឧត្តមសេនីយ៍ឯក រ័ត្ន ស្រ៊ាង បានមានប្រសាសន៍បន្ថែមថា ថ្ងៃនេះក្មួយៗសុំមកជូនពរពូ តែពូក៏សូមជូនពរត្រឡប់ទៅក្មួយៗវិញ២យ៉ាង ទី១៖សូមឲ្យក្មួយៗនៅទីនេះ ក៏ដូចជាក្មួៗយុវនិស្សិតខេត្តបន្ទាយមានជ័យ ដែលរៀននៅរាជធានីភ្នំពេញ ព្រមទាំងក្រុមគ្រួសារទាំងអស់ សូមមានសុខភាពល្អ និងទី២៖ សូមឲ្យជោគជ័យគ្រប់ភារកិច្ច សម្រេចរាល់បំណងប្រាថ្នាដែលខ្លួនបានប៉ង។
លោកបានណែនាំថា សុខភាពមនុស្សយើងគឺសំខាន់ខ្លាំងណាស់ ដូច្នេះក្មួយៗ ត្រូវចេះតាមដាននិង ថែទាំសុខភាព ឲ្យបានល្អ ហាត់ប្រាណឲ្យបានជាប់ជាប្រចាំ រស់នៅប្រកបដោយ អនាម័យនិងបរិស្ថានស្អាត នៅពេលដែលយើងមានសុខភាពល្អ នោះទើបយើងអាចមានកម្លាំងកាយកម្លាំងចិត្ត ទៅប្រកបកិច្ចការផ្សេងៗ ឲ្យជោគជ័យ ព្រមទាំងអាចសោយសុខលើភាពជោគជ័យរបស់យើងបាន ហើយបើចង់ជោគជ័យ យើងត្រូវហ្មត់ចត់ចាប់តាំងពីការងារតូចតាចឡើងទៅ ត្រូវមានមហិច្ឆិតា និងមានគោលដៅច្បាស់លាស់ មានភាពស្មោះត្រង់ ធ្វើអ្វីក៏ដោយ ឲ្យអ្នកជុំវិញ ក៏ដូចជាថ្នាក់លើជឿទុកចិត្ត នោះយើងនឹងជោគជ័យជាមិនខាន។
ក្រោយបញ្ចប់ការសំណេះសំណាល និងជូនពររួច លោករ័ត្ន ស្រ៊ាង បានថតរូបអនុស្សាវរីយ៍ ជាមួយក្រុមតំណាងយុវនិស្សិត និងបានផ្តល់ភេសជ្ជៈថវិកា មួយចំនួន ជូនត្រឡប់ទៅវិញ ដើម្បីអបអរចូលឆ្នាំថ្មីប្រណីជាតិខ្មែរ៕
![](https://dap-news.com/wp-content/uploads/2023/04/113-1-1024x683.jpg)
![](https://dap-news.com/wp-content/uploads/2023/04/112-1-1024x683.jpg)
![](https://dap-news.com/wp-content/uploads/2023/04/111-1-1024x683.jpg)
![](https://dap-news.com/wp-content/uploads/2023/04/109-1-1024x683.jpg)
![](https://dap-news.com/wp-content/uploads/2023/04/108-1-1024x598.jpg)
![](https://dap-news.com/wp-content/uploads/2023/04/107-1-1024x683.jpg)
![](https://dap-news.com/wp-content/uploads/2023/04/106-1-1024x683.jpg)
![](https://dap-news.com/wp-content/uploads/2020/08/1-1.png)