ភ្នំពេញ ៖ លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយម និងជាប្រធានក្រុមការងារ ថ្នាក់ជាតិចុះជួយស្រុកពញឮ ខេត្តកណ្តាល រួមជាមួយលោកអភិបាលស្រុកពញាឮ ព្រឹកថ្ងៃអាទិត្យទី ០៧ ខែឧសភា ឆ្នាំ ២០២៣ នេះ បានអញ្ជើញចុះពិនិត្យវឌ្ឍនភាព នៃការសាងសង់សាលារៀនអនុវិទ្យាល័យ ១ ខ្នង មាន៨ បន្ទប់ តម្លៃ១៤២.៧០០ ដុល្លារអាមេរិក ស្ថិតក្នុងវិហារឃ្លាំងស្បែក ភូមិឃ្លាំងស្បែក ឃុំកំពង់លួង ស្រុកពញាឮ ដែលជាអំណោយសប្បុរសធម៌ ដ៏ថ្លៃថ្លារបស់ឯកឧត្តមរដ្ឋមន្រ្តី ។
គិតត្រឹមថ្ងៃនេះ ការ ងារសាងសង់សម្រេចបានប្រមាណ ៨១% ហើយគ្រោងនឹងបញ្ចប់ការងារសាងសង់ ១០០% នៅកំឡុងចុង ខែឧសភា ឆ្នាំ ២០២៣ នេះ ។ ក្នុងឱកាសអញ្ជើញចុះពិនិត្យជាក់ស្តែងនេះ លោករដ្ឋមន្ត្រី បានទទួលយកនូវសំណូមពរ របស់លោកគ្រូ អ្នកគ្រូ និងគណៈកម្មការសាលា ដោយបានឧបត្ថម្ភនូវ តុ កៅអី សម្រាប់សិស្សានុសិស្សសិក្សា ដល់សាលាអនុវិទ្យាល័យទាំង ៨ បន្ទប់ផងដែរ ។
ឆ្លៀតក្នុងឱកាសនេះ លោករដ្ឋមន្រ្តី ក៏បានអញ្ជើញចូលរួមជួបសំណេះសំណាលជាមួយ គណៈចលនាកម្មករ-កម្មការិនីស្រុកពញាឮ បងប្អូនកម្មករ-កម្មការិនីប្រចាំឃុំទាំង ១១ នាក់ និងតំណាងមណ្ឌលតាមបណ្តាភូមិទាំង ១៥៩ នាក់ នៃស្រុកពញាឮ ៕
