ភ្នំពេញ៖ លោកបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុក ជាអគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) និងសហការី បានចុះពិនិត្យមើលការប្រើប្រាស់ឥណទានគាំទ្រ ដល់សមកម្មភាពដាំដុះបន្លែស្ពៃក្រញាញ់ ខាត់ណាផ្កា និងបន្លែចំរុះ នៅក្នុងផ្ទះសំណាញ់ ដែលមានអាសយដ្ឋានស្ថិតនៅឃុំអន្លង់វិល ស្រុកសង្កែ ខេត្តបាត់ដំបង។
ស្របពេលជាមួយគ្នានេះលោកបណ្ឌិត និងសហការីបានចុះពិនិត្យមើលផល ប៉ះពាល់ដោយបញ្ហាខ្យល់កន្ត្រាក់ លើផ្ទះសំណាញ់ចំនួន ៤ខ្នងផ្ទះសំណាញ់ ដោយខូចខាតប្រហែល ៤០% នៃផ្ទះសំណាញ់សរុបចំនួន ១០ខ្នង ដែលបងប្អូនបានទទួលកម្ចីពី ធនាគារ ARDB ដើម្បីយកពង្រីកផ្ទះសំណាញ់។
លោកបណ្ឌិត បានចូលរួមសោកស្តាយ ជាមួយបងប្អូនកសិករ និងបានធ្វើការណែនាំ អោយជួសជុល និងកែសម្រួលឡើងវិញនូវ៖
១-ជួសជុលកែសម្រួលគ្រោងផ្ទះសំណាញ់
២-រៀបចំប្រព័ន្ធទឹក
៣-រៀបចំផែនការដាំដុះ ដោយធ្វើដី ដាក់ជី និងបាញ់ថ្នាំសំលាប់មេរោគក្នុងដី និងសត្វល្អិត
៤-ផ្សារភ្ជាប់ទីផ្សារឡើងវិញ
បន្ថែមលើនេះ លោកបណ្ឌិត លើកទឹកចិត្តឲ្យគាត់ខិតខំប្រឹងប្រែងរៀបចំដាំដុះឡើងវិញ ហើយប្រសិនបើក្នុងករណី គាត់ត្រូវការឥណទានបន្ថែម សូមរៀបចំសំណើសុំមកធនាគារ ARDB។
ជាមួយគ្នានោះ លោកបណ្ឌិត និងក្រុមការងារ បានបន្តអញ្ញើញទៅ ស្រុកសាលាក្រៅ ខេត្តប៉ៃលិន ដើម្បីចុះពិនិត្យមើលការដាំដុះបន្លែក្នុងផ្ទះសំណាញ់ និងមើលពីប្រសិទ្ធភាពនៃប្រើប្រាស់ឥណទាន ដែលធនាគារបានផ្តល់ជូន បងប្អូនកសិករនៅទីនោះផងដែរ ៕
